Cov Kav Tos Liv Mas Les Xias tig los saib cov dej pub txoj sia yog qhov tseem ceeb, hauv lub caij txhim kho xyoo 2026.
Dej tsis yog lub Cim ntawm txoj sia thiab kev txhawb nqa Ntawv Ntshiab xwb, tab sis dej yog yam ntuj tsim uas tab tom raug neeg ua kom piam sij heev zuj zus los ntawm huab cua phem, muaj khib nyiab ntau thiab kev piam sij ntawm txhua yam nyob ib puag ncig. Lub caij no cov neeg ntseeg nyob thoob ntiaj teb thiaj ua hmoov tsuj xeeb. Yog hnub tim 1 lub 9 hlis mus txog hnub tim 4 lub 10 hli, muaj lub ntsiab lus tias : “Dej pub txoj sia.”
Dej pub txoj sia uas tau txais kev txhawb nqa los ntawm Es Xes Kias zaj 47, qib 1 txog qib 12. Cov dej ntws tawm hauv lub tuam tsev teev Ntuj los, pub txoj sia rau txhua qhov chaw uas nws ntws mus nyob Mas Les Xias, hauv cov tsev teev Ntuj, cov tub ntxhais hluas thiab pab neeg ncaj ncees hauv kev txhim kho tab tom ua kom Ntawv Ntshiab haum nrog kev txhawj xeeb tej niam dej, tej hav zoov, tej kwj ha thiab cov neeg uas lawv vam txog tej yam no. Cov Tswv Qhia cov kav xwm kev ncaj ncees hauv kev txhim kho nyob Mas Les Xias teb, Xees Cas Pos teb thiab Nplus Nes teb, tau pib cov hauj lwm Regenerate xyoo ob. Yog pib nyob hauv hnub tim 30 lub 8 hli, kom tau txhawb nqa cov Kav Tos Liv hloov pauv lawv tej kev xav fab txhua yam nyob ib puag ncig mus rau kev nqis tes ua thiab kev pauv ntxeev txog txhua yam muaj txoj sia.
Txij ntawm Ntawv Ntshiab mus txog kev nqis tes ua nyob hauv zej zog.
Cov neeg ntseeg Kav Tos Liv nyob thoob teb chaws tau muab lub tswv yim no khaws tseg rau hauv tsev teev Ntuj thiab cov tub ntxhais hluas tej hauj lwm. Ntawm lub tsev teev Ntuj Niam Mab Liab nyob Lourdes hauv lub nroog Klang, mas cov tim xyoob hauv tsev teev Ntuj tau xav txog kev lees paub ntawm cov neeg ntseeg hauv kev txuag xyoob ntoo. Hauv lub nroog Ipoh lub tsev teev Ntuj Oblates ntawm Niam Mab Liab tus dawb huv tau ua thaj txi Ntuj rau cov tub ntxhais hluas thiab sau siab, uas yog siv nroj tsuag thiab dej ntws ua kom pom txog Es Xes Kias lub caij. Lub Cheeb Koom Txoos Kuala lumpur tau npaj cov hauj lwm hais txog txhua yam nyob ib puag ncig, nrog rau kev ncig kawm mus rau lub yeej Red Bukit Tinggi thiab kev mus kev ntawm kev ntseeg hauv digital 30 hnub. Uas yog sib xyaws nrog kev muab Ntawv Ntshiab los xav nrog kev ua rau txhua yam nyob ib puag ncig kom muaj qab muaj quag. Nyob hauv lub nroog Kulim, mas lub tsev teev Ntuj hwm Yes Xus Lub Siab tau pub lub caij rau kev txhim kho hauv lub thaj txi Ntuj kom muaj kev saib xyuas thiab txuag xyoob ntoo ntau dua qub.
Dej, tib neeg thiab yam muaj txoj sia.
Kev saib dej yog qhov tseem ceeb ua kom pom txog kev txuag txhua yam nyob ib puag ncig, lub meej mom kev u aneeg thiab yog kev ncaj ncees rau zej zog. Xyoob ntoo pab ua kom muaj dej, kom muaj dej rau neeg ua liaj ua teb, tau ntes ntses thiab muaj dej rau zej zog. Li ntawd, huab cua phem thiab kev txiav xyoob ntov ntoo tsis yog ua kev piam sij rau yam muaj txoj sia xwb, tab sis tseem yog tib neeg kev ua lub neej uas vam txog yam muaj txoj sia thiab. Txiv Plig Fabian Dicom tus thawj tswj ntawm Caritas nyob Mas Les Xias nyuam qhuav hais tias : “Dej yog yam tseem ceeb rau txoj sia, tab sis neeg nyiam nkim pov tseg, ua kom tsuas thiab faib tsis sib npaug tas mus li. Yog qhov ua kom pom txog kev ntseeg ntawm lub Koom Txoos hais txog yam muaj txoj sia, uas txuas nrog kev saib xyuas txhua yam nyob ib puag ncig thiab saib xyuas tib neeg. Tshwj xeeb tshaj yog cov zej zog uas pluag txom nyem nrog rau cov neeg nyob hauv nroog Sabah thiab Sarawak, uas lawv lub neej tseem nyob ze tej hav zoov, tej niam dej thiab thaj av qub.
Ntawm kev tsuj xeeb mus txog kev lees txais saib xyuas.
Kev txhawj xeeb ntawm cov neeg ntseeg Kav Tos Liv nyob Mas Les Xias teb, yog kev ua kom ntseeg tias txhua yam nyob ib puag ncig yog qhov dhau ntawm lub thaj txi Ntuj thiab yog qhov raws caij nyoog. Xws li cov dej nyob hauv Es Xes Kias lub caij uas ntws tawm ntawm lub tuam tsev teev Ntuj mus thiab hloov daim av. Kev ntseeg raug thov kom tawm ntawm phab ntsa tsev teev Ntuj mus rau kev ua muaj qab muaj quag. Thaum lub caij txhim kho no xaus hauv hnub tim 4 lub 10 hli, mas cov neeg ntseeg Kav Tos Liv nyob Mas Les Xias teb raug thov kom saib cov dej pub txoj sia, tsis yog tias ua lub Cim hauv kev txhim kho fab ntsuj plig xwb, tab sis tseem yog kev nqua hu kom pab txuag tej niam dej, xyoob ntoo thiab tib neeg lub neej.
