Cov lus xaus lub rooj Kev Tso Siab Tawm Rooj Fiv Ntuj Loj yog lo lus tias “Taug Huab Tais qhov pom kev.”

Nyob hauv hnub tim 30 lub 11 hlis 2025 tas los, yog hnub kawg hauv rooj Kev Tso Siab Tawm Rooj Fiv Ntuj Loj uas muaj li ntawm 900 leej neeg sawv cev ntawm 32 lub teb chaws nyob As Xias xeev ntuj tuaj sau siab ua ke, sawv daws tau koom lub Txoos Txi Ntuj kaw nyob hauv lub tsev txais qhua The Light Hotel chav tsev lom zem, nyob Pis Naas.

Lub Txoos kaw rooj sau siab no, muaj Tswv Qhia Liab Fis Lis Nes Lis Faws Laus tus Tswv Qhia nyob Nkos As thiab Das Mas As, thiab Thawj Tswj Rooj Tswv Qhia nyob As Xias ua tus coj lub Txoos. Nws nthuav Tswv Ntuj Lo Lus los txhib lub Koom Txoos nyob As Xias kom taug Huab Tais qhov pom kev, rau siab faib lub siab ntseeg, thiab kom lub swm txheej sawv daws tau txais no hloov sawv daws lub neej thaum rov mus tsev.

Nws hais li no “Tuaj mas, tuaj ua lub neej nyob hauv Huab Tais qhov pom kev.”

Cov lus Tswv Qhia Liab Faws Laus coj los nthuav ntuas sawv daws yog nyob hauv ntawv His Xais, zaj 2 qib 1-5 yog hais txog tas ib tsoom kuj cuab khiav ua npoj ntws mus pem Tswv Ntuj lub roob, kom tau txais kev cawm.

Nws hais tias “Yaj Saub His Xais pom tsoom neeg lawv muab lawv cov cuab yeej ntaus rog ua voom thiab ua liag. Qhov no yog lub zeem muag cia tau kho As Xias.”

Nws xam pom tias Kev Tso Siab Tawm Rooj Fiv Ntuj Loj zaum no tsom txog kev tso siab no tias “Cov Tswv Qhia Liab, cov Tswv Qhia, tsoom Leej Choj, Leej Qee, Leej Nrog, cov hluas, cov muaj cuab, cov txuj txoog, cov xeem lus, thiab cov keeb kwm liv xwm, lawv sawv ua ib cag. Peb ib tug mloog ib tug zaj dab neeg hais txog nws qhov mob thiab nws kev tso siab. Kev thaj yeeb tsis yog zaj tswv yim nyob deb; tab sis yog lub txiv ntawm kev rhais ruam mus ua ke.”

Tswv Qhia Liab Faws Laus hais lo lus caw sawv daws yam li Yaj Saub His Xais tau caw tias “Nej tuaj, peb mus tau Huab Tais qhov pom kev.” Lo lus no tsis yog lus ntuas, tab sis yog lo lus txhib kom sawv daws muaj feem xyuam nrog: xaiv qhov tseeb ua ntej qhov tau nyob zoo, xaiv sib tham ua ntej qhov cia lub siab ua xyem xyav, xaiv sib koom ua ntej xaiv sib cais ib leeg rau ib qho. Nws tseem ntuas cov ntseeg kom txhob rov mus taug txoj qub kev uas yog txoj kev tsis liam fab rau, los yog txoj kev ua rau sib tawg, tom qab lub rooj sau siab no taws lawm.

Tus tawm rooj fiv Ntuj paub ris txiaj ntsig, nws yog tus pov hwm kev koom ua ib tug.

Tswv Qhia Liab Faws Laus muab zaj Nkauj Paj Nruag 122 los nthuav hais txog cov neeg tawm rooj Fiv Ntuj lawv tuaj txog lub tsev hauv sab ntsuj plig kev xyiv fab thiab lub luag hauj lwm tias “Zaj Nkauj Paj Nruag 122 ntuas peb kom ras tau tias kev tawm rooj Fiv Ntuj lub txiv tsis yog tau xav txog, tab sis yog tau tsob hwb. Qhov tseeb yog hauv As Xias xeev ntuj yam li kev ua nruj hauv cov kev teev hawm, kev pluag txom nyem, kev tsiv teb tsaws chaw, ib puag ncig qhov tsis zoo, tej no ua teeb meem rau peb txhua hnub. Li ntawd, peb tsum rais ua tus kwv txaug kev thaj yeeb nyob hauv peb cuab tsev neeg, peb cheeb tsam Koom Txoos, peb lub Ceeb Koom Txoos, thiab peb lub teb chaws.”

Nws hais tsis tseg tias lub swm txheej sib koom ua ib tsev neeg As Xias no tsum hloov mus ua kev rov muab yus tus kheej fij rau kev faib lub siab ntseeg thiab kev koom nyob ua ke yam muaj siab sib hlub dua.

“Lub sij hawm los txog lawm… muab Huab Tais Yes Xus Pleev los hnav.”

Tswv Qhia Liab Faws Laus muab cov lus hauv tsab ntawv xa mus rau cov ntseeg nyob Los Mas (LM 13L 11-14) los hais ntuas sawv daws tias kev rov plhis tshiab sab ntsuj plig tsis txaus, yog tias tsis muaj kev hloov uas pom tau. “Paj Lug nqua hu peb kom sawv txhob tsaug zog,” nws hais. “Muab Leej Pleev los hnav, mas yog hnav Leej Pleev lub siab hlub, Leej Pleev kev yooj yim, Leej Pleev lub siab tawv, Leej Pleev lub siab nyiam mloog luag.”

Koom Txoos nyob As Xias lub neej yav tom ntej tsis yog yuav vam txog cov phiaj xwm thiab cov txhooj xwb, tsum yog pib ntawm cov thwj tim uas lawv lub siab raug hloov lawm.

“Kev tshaib Tswv Ntuj nyob hauv As Xias xeev ntuj mas tob heev. Kev vam txog qhov ncaj muaj tseeb. Kev nqhis uas yog hais txog ntawm peb cov tub ntxhais hluas mas muaj zog.”

“Sawv… npaj kom txhij.”

Tswv Qhia Liab Faws Laus muab lub Moo Zoo (MT 24: 37-44) hauv thawj Lis Piam caij Tos Huab Tais los nthuav ntuas sawv daws kom ua tus thwj tim muab siab rau, tshwj xeeb mas yog ras ntsoov tias Tswv Ntuj nyob nraim ntawm qhov chaw yus tsis nco txog.

“Kev Tso Siab Tawm Rooj Fiv Ntuj qhia peb kom ntsib Tswv Ntuj nyob nruab nrab hauv cov neeg tsiv teb thiab thoj nam, nyob nruab nrab hauv kev ntaus phooj ywg nrog lwm txoj kev teev hawm, nyob nruab nrab hauv peb cov tub ntxhais hluas kev npau suav, nyob nruab nrab hauv cov neeg pluag kev nyiaj ntxeem, nyob nruab nrab hauv lub ntiaj teb raug sib faib cov qhov txhab, thiab nyob nruab nrab hauv peb txoj kab xwm thiab peb tsev neeg.”

Xws li cov Kws Hnub Qub rov mus tsev, lawv mus dua lwm txoj kev. Cov ntseeg nyob As Xias tsum zoo li ntawd, tsum muaj lub zeem muag tshiab, muaj lub cuab kav tshiab, thiab paub tias yam twg yog yam ua ntej ua qab tshiab.

Kev Tawm Rooj Fiv ntuj xa As Xias teb tawm mus.

Nyob hauv lub rooj sau siab zaum no, sawv daws tau thov Ntuj rau cov teb chaws muaj kev sib cov nyom, sawv daws tau sib hloov teeb meem hais txog kev saib xyuas pawg ntseeg, tau ua hmoov txog As Xias cov txuj txoog thiab As Xias lub tswv yim tus plig uas muaj kev sib txawv ntau tsav yam.

“Yog tias cov hnub peb tuaj sib sau nyob ntawm no dhau mus tsuas tseg kev nco cia rau nruab siab xwb, mas hais tau tias peb ua tsis muaj txij ntsim.” Tswv Qhia Liab Faws Laus hais li. “Tab sis yog cov hnub peb sib sau no hloov tau peb lub siab, hloov tau peb cov hauj lwm, thiab rub peb kom koom tau ua ib pab ib pawg, mas thiaj hais tau tias Kev Tawm Rooj Fiv Ntuj zaum no rais mus yua As Xias lub neej lawm pem suab lub noob.”

Nws txhib cov sawv cev kom rov qab:

- tig los ua tus neeg tsis muab hlob tshiab, npaj txhij kawm ntawm lawv tsoom pej xeem thiab ntawm luag tej lwm tus;

- tig los ua tus muaj cuab kav tshiab, npaj txhij pub Leej Pleev rau luag tej nyob hauv lawv kev ua siab muag siab mos thiab xyiv fab;

- tig los ua phooj ywg tshiab, nrog cov neeg pluag, cov tsiv teb, cov poj niam, cov hluas, thiab cov nrhiav chaw kom tau koom Tswv Ntuj rooj qav mus kev ua ke;

- tig los muaj kev tso siab tshiab, ntseeg tias Tswv Ntuj tab tom puab As Xias teb nyob hauv lawv kev ua neeg pheej xeeb tsob hwb;

Taug dua lwm txo kev mus tsev.

Qhov kawg, Tswv Qhia Liab Faws Laus hais zoo li no tias ziag no Huab Tais xa cov neeg tawm rooj rov mus tsev nrog rau lawv txoj kab xwm mus dua lwm txoj kev; yog txoj kev sib tuav xam cov Leej Choj, txoj kev sib tham, txoj kev tsim kev thaj yeeb, txoj kev sib mloog hais, thiab txoj kev ua kwv luag mus ua ke.

“Thov kom tej no yog peb kev sib cog lus.” nws hais:

- Mus kev ua ke.

- Muab siab mloog.

- Ua siab dav sib tsob hwb.

- Zoo siab xyiv fab ua tim khawv.

- Mus dua lwm txoj kev, yog Leej Pleev txoj kev.

Ua ntej yuav xaus, Tswv Qhia Liab Faws Laus thov cev sawv daws rau niam Mab Liab tus yog lub siab ntseeg lub hnub qub, thiab thov Ntuj kom Leej Ntuj Plig Ntshiab txuag sawv daws kom zov hmo thiab thov Leej Txiv coj tas tsoom pej xeem As Xias mus nyob hauv nws kev thaj yeev qhov pom kev.

Nws xaus li no “Nej mus. Nej kev tawm rooj fiv Ntuj rais ua kev tso siab lub suab hu lawm.”