Cov thawj coj CCBI muab Catholic Connect ua qhov platform txuas nrog cov neeg Kav Tos Liv nyob Is Ntias teb uas muaj ntau haiv neeg.
Txiv Plig Cyril uas yog tus tuav cov hauj lwm xa xov ntawm cov Txiv Plig Kav Tos Liv nyob Is Ntias (CCBI), tau hais txog Catholic Connect hauv kev sau siab hnub tim 11 lub 9 hlis, ntawm cov tub tshaj Ntuj Lus Online nyob As Xias thawj zaug hauv lub nroog Quezon City.
Txiv Plig Cyril muab Is Ntias teb los piv ua ib lub teb chaws As Xias me, ua kom pom txog ntau yam hauv xeem lus, hauv tej kab lis kev cai thiab tus yam ntxwv hauv cov xeev ntuj uas muaj ntau yam. Is Ntias teb muaj 22 xeem lus uas siv kam nrog rau lwm cov haiv neeg ntau pua xeem lus, ces yog qhov nyuab rau cov Kav Tos Liv hauv kev sib xa xov. Nws hais tias : “Cov hauj lwm digital nyob Is Ntias teb zim txwv no, yog hais txog tej pab neeg coob coob. Tshwj xeeb tshaj yog cov tub ntxhais hluas, cov teev lwm txoj kev ntseeg thiab cov muaj kab lis kev cai, xeem lus thiab kev cai hauv kev ua sib txawv.” Nws hais ntxiv tias ; digital pub lub sij hawm rau lub Koom Txoos kom tau nkag mus txog cov neeg tsis muaj kev paub txog kev ntseeg, thiab hauv cov zej zog uas muaj ntau haiv neeg nyob Is Ntias teb. Kev xa xov digital tseem muaj feem pab txhawb nqa kev sib tham ntawm cov kev teev hawm, kev sib haum xeeb thiab kev thaj yeeb. Qhov Platform Catholic Connect, hais tau tias tshwm sim nyob nruab nrab ntawm txhua yam sib txawv no. Lub hom phiaj yog txuas nrog cov Kav Tos Liv nyob hauv txhua xeev ntuj nyob Is Ntias teb kom sib sau los ua ke. Ua ke ntawd kuj pub lub sij hawm rau lwm cov neeg ntseeg kom txuag tus yam ntxwv hauv xeem lus thiab nyias tej kab lis kev cai cia.
Txiv Plig Cyril hais tias kev tshaj xov xwm qub qub xws li TV thiab xov tooj cua nws muaj qhov txwv. Vim yog qhov nyuab kawg uas yuav tshaj xov xwm kom thoob Is Ntias teb hauv tib xeem lus. Tsis tas li ntawd platform digital pub lub sij hawm ntau dua kev tshaj cov ntsiab lus uas haum rau zej zog thiab kev siv xeem lus. Nws hais tias : “Muaj sij hawm ntau hauv kev tsim cov ntsiab lus, tsis hais yog Video kev txawj ntse los cov ntsiab lus kev ntseeg uas siv xeem lus hauv zej zog los lwm xeem lus.” Hais txog Txiv Plig Cyril mas qhov tseem ceeb yog kev siv Technology digital kom tau kev txuas nrog tsoom pej xeem coob coob uas muaj ntau yam sib txawv. Uas tsis cia kom kev sib tawg hauv xeem lus, keeb kwm thiab tej kab lis kev cai rais ua teeb meem tav kev. Catholic Connect yog kev muab siab rau hauv kev sib raug zoo thiab kev tshaj xov xwm ntawm cov Kav Tos Liv. Thiab pub lub sij hawm tshiab hauv kev tshaj lub Moo Zoo, kev kawm, fab ntsuj plig thiab kev sib tham ntawm cov kev teev hawm.
