GPH hnub 2: Poj niam tsis yog tsav tuaj tom qab, tab sis yog ntuj tsim teb raug lub koob meej
Tus kws txuj Npis Nas Mas Nob uas yog tus kws qhia kev kawm thiab teeb txheeb sab ntsuj plig haiv neeg Is Ntias pib hais nws cov lus tias “Poj niam yog tsav tsom txog Tswv Ntuj lub siab mos, Tswv Ntuj lub siab tawv, Tswv Ntuj lub siab hlub, thiab Tswv Ntuj lub siab nyiam yeem pub txoj sia rau lawm tus nyob hauv txoj kev txawv tab sis ntxiv rau tus txiv neeg.” Nws tseem nqua hu kom lub Koom Txoos nyob As Xias hwm, pov hwm, thiab koom tuav tes nrog poj niam kev txawj ntse.
Mas Nob yog ib tug hauv cov neeg raug caw kom tuaj tham nyob hauv kev cob qhia nyob Pis Naas hauv hnub tim 28 lub 11 hlis. Mas Nob zaj hau lus mas yog hais txog ‘Poj niam kev txawj ntse, kev tsom txog Tswv Ntuj kev nyiam thiab txoj sia.’ Qhov chaw nws cob qhia yog nyob hauv chav tsev Os Les Nkas Nos, qib M hauv lub tsev txais qhua The Light Hotel. Muaj 120 tus neeg uas yog cov Tswv Qhia, cov Leej Choj, thiab cov Leej Nrog tuaj mloog nws hais. Xis Ntis tus saib xyuas hauj lwm fab Social Media hauv RVA, nws tau tuaj koom mloog tus kws txuj Mas Nob hais lus, nws sau txog Mas Nob lo lus tias “Txhua zaus kuv tuaj koom mloog hais txog poj niam kev txawj ntse, mas kuv pom muaj cov txiv neej tuaj koom mloog thiab, qhov no ua kev txhawb siab rau kuv thiab cov poj niam.”
Hnub tim ob hauv Kev Tso Siab Tawm Rooj Fiv Ntuj (GPH) 2025 muaj kev cob qhia tag nrho 7 zaj thooj txhij ua ke.
Zaig no Npis Nas Mas Nob tuav kab xwm tus hau ntawm fab lub neej sab ntsuj plig thiab kev teev hawm nyob hauv Leej Ntshiab Tes Les Xas lub tsev qhia ntawv qib siab nyob Kes Las Las. Nws qhia ntawv cov ntxhais hluas tsis hais sab ntsuj plig los sab laj lim tswv yim los tshaj 36 xyoo lawm. Qhov tseem ceeb mas nws yog tib tug poj niam Leej Nrog haiv neeg Is Ntias uas tau raug caw mus koom lub rooj tuav xam cov Tswv Qhia nyob As Xias (Asian Synod of Bishops) hauv xyooo 1998 thiab raug caw mus ua tus cob qhia hais txog cov poj niam lub luag hauj lwm thiab poj niam kev ua tus coj nyob hauv lub Koom Txoos.
Poj niam kev txawj ntse.
Kws txuj Mas Nob muab Vaj Qhia Zam Paj Lug Ob tsab ntawv Mulieris Dignitatem uas hais txog ‘poj niam kev txawj ntse’ qhia txog poj niam lub tsim, luag hauj lwm, thiab paj tshab. Nws hais tias nws tau nyeem tsab ntawv no ze ntawm kaum tawm xyoos tas los, thaum nws nyeem tas mas nws hloov nws kev to taub txog tus kheej thiab poj niam lub luag hauj lwm, vam tias tas nrho cov poj niam hauv lub Koom Txoos yuav tau txais swm txheej ib yam li nws.
Mas Nob hais tias poj niam kev txawj ntse tsis yog siav lus tab sis yog qhov tseeb hauv cov txuj hais txog Tswv Ntuj. Poj niam tsom txog Tswv Ntuj lub siab mos, Tswv Ntuj lub siab tawv, Tswv Ntuj lub siab hlub, Tswv Ntuj lub siab nyiam yeem pub txoj sia rau lawm tus nyob hauv txoj kev txawv tab sis ntxiv rau tus txiv neeg. Tus txiv neej thiab tus poj niam nkawd sib pab nthuav Tswv Ntuj tus duab kom tawm los rau sawv daws pom txhij.
Nyob hauv rooj cob qhia no, tab txawm muaj tus cag tuaj ntawm cov txuj hais txog Tswv Ntuj tuaj, tsis kav kuj muab kev tseem ceeb rau hais txog kev tu sab ntsuj plig thiab. Mas Nob muab nws lub neej, cov lus pab ntxiv tswv yim nws khaws tau hauv Ntawv Ntshiab, tej yam piv txwv ntawm kev ua neej coj los ua ib zag dab neeg hais qhia txog tias poj niam lub paj tshab pab txhim lub cuab tsev neeg, pab pawg, thiab lub Koom Txoos. Nws hais kom sawv daws ras tias poj niam tsis yog Tswv Ntuj tsim tawm los ua yam tuaj tom qab, tab sis poj niam yog ntuj tsim teb raug lub koob meej, poj niam muaj tsim sib txig, muaj paj tshab sib txawv, thiab tau txais lub luag hauj lwm tu txoj sia.
Nws hais tias tsis muaj tus neeg twg yuav nkag siab cov poj niam cuag li Huab Tais Yes Xus lawm thiab cov poj niam yog cov sawv ntawm qab ntoo cuam thaum sawv daws khiav tas. Lawv kev cuab kav, lawv kev xav tam sid, thiab lawv lub siab hlub nthuav qhia txog Tswv Ntuj tej yam uas ntiaj teb neeg niaj hnub no vam txog.
Poj niam kev txawj ntse plaub tus ncej txheem.
Tus kws txuj Npis Nas Mas Nob hais tias Leej Ntshiab Vaj Qhia Zam Paj Lug Ob tau hais txog poj niam kev txawj ntse plaub tus ncej txheem tias muaj li no: lub siab lees, lub siab xav sai, lub siab dav, thiab lub siab ua niam. Plaub tus ncej txheem no tsis yog daim qauv los lub laug hauj lwm, tab sis yog lub paj tshab sab ntsuj plig thiab lub paj tshab tsim txiaj uas Tswv Ntuj pub rau cov poj niam kom tau coj mus tus kev ua neeg kom huaj txhaij mus ntxiv.
1. Lub siab lees – Cia Tswv Ntuj txoj sia chaws nkag los.
Lub siab lees tsis yog ua siab qeeb, tab sis yog ua siab cus thiab siab ntse rau Tswv Ntuj, lwm tus, thiab qhov tseeb. Nyob hauv hnub tus Tshiab xa lub moo tuaj rau niam Mab Liab, mas niam Mab Liab muaj kev cia siab nces nws hais tias “Thov koj muaj tuaj raws li koj hais.” Qhov no yog tus piv txwv zoo txhij ntawm cov poj niam. Nyob hauv cov txuj txoog pom zoo rau cov txiv neej ua tus tswj thiab ua tswv kav cov poj niam, Lub siab lees yog ua tim khawv txog Ntuj kev nyiam uas hwm neeg kev twj lij. Raws li txoj kab, lub siab lees yog muab siab rau mloog kom tob, tsim qhov chaw uas luag twj pom tias muaj neeg zoo siab tos txais lawv, thiab yeem cia Tswv Ntuj ua hauj lwm tsis yog yuam ua. Poj niam lub cev muaj peev xwm lees txais txoj sia, tab sis hauv sab ntsuj plig mas poj niam tau lub paj tshab lees txais tsoom neeg, tos txais, puag, thiab qhib chav.
2. Lub siab xav sai – Muab lub siab lub qhov muag ntsia.
Lub siab xav sai yog kev paub hlo yam tsis tas yuav xav tam sid, tsis hais tej yam twb tsis tau qhib ncauj hais, los yog tej yam vam txog, los tej qhov mob, los lwm tus lub tsim. Poj niam ntsia pom tej yam uas luag ntsia tsis pom: yam li cuj siab hloov, kev mob nkeeg ntsiag, kev ntshai zais ntshis. Qhov no ua tsom iav tsom txog Tswv Ntuj lo lus hauv ntawv Kev Tsiv tias ‘Kuv pom kuv haiv neeg txoj kev txom nyem; kuv hnov lawv lub suab quaj” (KT 3: 7). Lub siab xav sai pab kom cov poj niam ntsia pom neeg tus quag, ces lawv rau nqi rau neeg kev sib npuab sib khaub zig, thiab lawv ruaj siab tias yuav tsis nco hnov txog leej twg, qhov no ua kom muaj kev kho cawm thiab kev hlub rau pab pawg thiab cheeb tsam.
3. Lub siab dav – Tso kev nyiam ntws tawm los yam tsis hais txog tus nqe.
Lub siab dav yog poj niam kev txawj ntse lub plawv. Poj niam muab luag lwm tus saib hlob thiab yeem muab tag nrho tus kheej fij rau yam tsis nco xam tias yus puas tau txais luag txij ntsim ntau los tsawg. Poj niam tsom kom pom txog Leej Pleev kev nyiam tas siab tas ntsws, tsis hais thaum lawv nyob tom tsev, tim tsev kawm ntawv, los hauv lub cheeb tsam Koom Txoos. Mas Nob piav txog cov ua niam, ua xib hwb qhia ntawv, cov Leej Phauj lawv txoj kev qee tus kheej los ua txoj hauj lwm pab txhawb lawv tsev neeg thiab pab pawg. Lub siab nyiam dav fo li no tsis yog txhim tsa lawv tsev neeg xwb, tseem txhim tsa lub Koom Txoos thiab.
4. Lub siab ua niam – Kev tu txoj sia sab cev nqaij thiab ntsuj plig.
Lub siab ua niam mas tseem loj dua kev ua niam lawm thiab, vim lub siab ua niam mas hais mus txog kev ua niam hauv sab ntsuj plig, rab peev xwm cog lub siab ntseeg, kev kho, kev tu kom hlob, thiab kev muaj feem xyuam nrog. Poj niam tsim ‘tsev neeg’ nyob tau rau txhua qhov, tsis hais hauv tsev kawm ntawv, hauv lawv pab pawg, hauv lawv cheeb tsam, hauv lawv chaw ua hauj lwm. Lub siab ua niam pom tseeb nyob hauv tiv thaiv, kev nyob ua luag, kev ua siab ntev nyiaj, thiab rab peev xwm txua luag kom tsheej neeg. Peb txhua leej puav leej yog Tswv Ntuj me nyuam thiab yog tus Tswv Ntuj nyiam; poj niam kev txawj ntse ras txog qhov no nyob hauv lawv lub siab xav tam sid.
Npis Nas Mas Nob plov meej tias poj niam kev txawj ntse yog ib lub zog muaj zog hwwv rau lub Koom Txoos txoj hauj lwm nyob As Xias. Thaum cov poj niam ua lub neej mus raws li cov paj tshab no yam twj lij, yam tiag tiag, thiab yam xyiv fab hlo, mas cov poj niam yuav rais ua Tswv Ntuj kev nyiam tus mlom thiab kev kho thiab kev tso siab tus kis. Kawg no Mas Nob tseem txhib cov txiv neeg kom hwm, txuag, thiab muaj koom tes nrog cov paj tshab no, kom lub Koom Txoos nyob As Xias tsom rau sawv daws pom txog kev zoo nkauj zoo txhij raws li Tswv Ntuj tau teeb tseg.
Lub rooj cob qhia los xaus rau kev thov niam Mab Liab, uas yog As Xias xeev ntuj leej niam, thov kom pub lub txiaj ntsim rau kom sawv daws ua neej thiab ua ntxhais txib mus raws li poj niam kev txawj ntse.
