GPH Hnub 3: Tswv Qhia Liab As Npos Das Vis nqua hu lub Koom Txoos nyob As Xias kom thov cia Huab Tais Yes Xus tawm tuaj nyob hauv lub Koom Txoos

Hnub tim 29 lub 11 hlis 2025 yog hnub tim peb hauv lub Rooj Sau Siab Kev Tso Siab Tawm Rooj Fiv Ntuj Loj nyob Pis Naas, Mas Les Xias teb, Tswv Qhia Liab Paj Lug Vaws Ntsis Los Das Vis tus Tswv Qhia nyob Kas Lus Kas As, tus Lwm Tswj Rooj Tswv Qhia nyob As Xias (FABC) thiab tus Thawj Tswj Rooj Tswv Qhia nyob Fis Lis Pees (CBCP) yog tus sawv los hais cov lus txhib lub Koom Txoos nyob As Xias kom rov los nrhiav kev piav zaj uas yog lub suab hu los ua tus neeg ntseeg lub plawv thiab txoj lw kev ncaj mus rau Xyoo Ntshiab loj 2033.

Tswv Qhia Liab Das Vis sawv los tham rau cov sawv cev tuaj koom lub rooj li ntawm 900 tawm leej mloog nyob hauv lub tsev txais qhua The Light Hotel chav tsev lom zem txog zaj lus tias ‘Kev ua neej thiab kev faib Huab Tais Yes Xus zaj dab neeg – tsoom neeg nyob As Xias ntoj kev mus rau xyoo 2033’. Nws muab zaj lus hauv Lus Kas Ntawv Moo Zoo, zaj 24 hais txog Huab Tais Yes Xus nrog ob tus thwj tim taug kev mus Es Mas Ws los tham nthuav rau sawv daws mloog. Qhov nws hais mas yog lub zeem muag hais txog kev sib faib lub siab ntseeg uas nrhau cag tob nyob hauv kev ua phooj ywg, kev koom ua tib neeg, thiab Leej Pleev tawm los nyob hauv cov thwj tim lub neej.

“Ua cas Huab Tais Yes Xus thiaj li ploj lawm?”

Tswv Qhia Liab Das Vis muab ib lo lus ntsia ruaj puag hauv nws nruab siab los ua lo lus qhib cov zaj nws yuav tham; yog lo lus tias “Yog vim tus dab tsi Huab Tais Yes Xus thiaj li ploj ntais ntawm ob tus thwj tim qhov muag mus, thaum nkawd pom Huab Tais Yes Xus muab lub ncuav mov ntais, ces nkawd nco tau?”

Nws piav zaj hais txog Es Mas Ws tias Huab Tais Yes Xus tawm tuaj zaum ib mas zoo li tus neeg txawv nrog ob tus thwj tim qaug zog mus kev. Huab Tais Yes Xus tsis hais lus qhia rau nkawd tam sid, nws los ze ze nkawd thiab mloog saib nkawd tham txog dab tsi, ces Huab Tais Yes Xus nrog nkawd tham.

Peb tus Tswv Ntuj yog tus qauv hais txog txoj kev sib tuav xam cov Leej Choj. Huab Tais Yes Xus yog tus xub pib, nws mus ze thiab nrog tsoom neeg mus kev ua ke, nws xub mloog ua ntej mam hais lus.

Thaum Huab Tais Yes Xus txais lub ncuav mov, nws foom hmoov rau, thiab nws muab ntais, mas yog lub sij hawm nco txog thiab lees paub, vim tias tsis yog Huab Tais Yes Xus tus yeeb yam xwb tab sis vim yog Huab Tais Yes Xus tsis tsim nyog yuav ua li ntawd. Tus neeg txawv yog tus qhua, tsis yog tus tswv tsev. Tab txawm li ntawd, kev ua tus tswv tsev rais los ua Huab Tais Yes Xus tus qauv pom tseeb hais txog kev tos txais thiab koom nco txog.

Tab sis yog vim dab tsi Huab Tais Yes Xus thiaj li ploj lawm thaum nkawd zeem tau Huab Tais Yes Xus?

Tswv Qhia Liab Das Vis muab ib lo lus teb muaj ceem li no “Huab Tais Yes Xus ploj mus kom rov tau tawm tuaj dua nyob hauv lawv vim lawv. Thiab Huab Tais Yes Xus tseem tawm tuaj thiab ploj mus thiab rov tawm tuaj li ntawd vim koj thiab vim kuv.” Qhov no yog lub plawv ntawm kev hu peb los ua neeg ntseeg; tsis yog nyob deb deb taw mus rau Huab Tais Yes Xus, tab sis yog Huab Tais Yes Xus tseem nyob nraim hauv qab ntuj neeg.

Ua neej mus raws Huab Tais Yes Xus zaj dab neeg.

Tswv Qhia Liab Das Vis nthuav hais txog lub ntsiab ntawm cov neeg ntseeg nyob As Xias niaj hnub no kev ua neej mus raws li Huab Tais Yes Xus zaj dab neeg.

Nws hais tias As Xias teb to taub txog lub zog ntawm kev hais dab neeg zoo tshaj lwm cov txuj txoog. Tau ntev los lawm, As Xias kev huaj txhaij tau xa qhov tseeb ib tiam dhau ib tiam nyob hauv cov kwv huam, kwv txhiaj, kab ke, thiab cov zaj lus piav. Nyob As Xias, qhov tseeb tuaj txog peb tsis yog lub ntsiab lust seem ceeb xwb, tseem yog zaj dab neeg muaj peb txuam nrog thiab.

Zaj hais txog Es Mas Ws ua tus qauv rau peb pom; Huab Tais Yes Xus mloog nkawd piav txog cov thwj tim kev tu siab, thiab rov piav tib zaj no dua nyob hauv kev sawv rov los qhov pom kev. Tswv Qhia Liab Das Vis hais tias “Yog tsis muaj kev zoo siab, mas tseem tsis tau txog qhov xaus. Peb rov piav peb zaj dab neeg nrog Huab Tais Yes Xus dua kom mus txog ntu xaus, uas yog kev txhiv peb ntawm kev txhaum.”

Nws txhib sawv daws kom nug tias “Nyob hauv As Xias mas Huab Tais Yes Xus mus rau thaj tsam twg lawm?”

Raws li nws hais mas Huab Tais Yes Xus mus rau ntawm cov neeg no:

- Cov neeg thoj nam nrhiav lub neej pib dua tshiab.

- Cov tsev neeg tawg vim kev cov nyom thiab kev pluag txom nyem.

- Cov hluas poob rau hauv lub ntiaj teb ntiv ntsis taw.

- Cov raug xwv txheej kub ntxhov, raug iab hiam, quav tshuaj.

- Cov neeg nyiaj txuag lawv thaj chaw ntshiab.

- Cov pab pawg tab tom rov txhim tsa lawv vaj tse vim kev puas ntsoog ntawm huab cua.

- Cov pej xeem vam kom lwm tus ntsia pom txog lawv, nkag siab lawv, thiab nyiam lawv.

Kev ua neej raws Huab Tais Yes Xus zaj dab neeg thiaj li txhais tau tias yog kev ras txog Huab Tais Yes Xus nyob hauv tus neeg tshaib, tus neeg nqhis, tus neeg raug txom nyem, thiab tus neeg nyiaj ntxeem, tsis yog zaj tswv yim ntsia tsis pom tab sis yog hauv cov neeg nyob puag ncig peb uas lawv muaj lub cev thiab muaj ntshav uas lawv pab kom peb pom tau Leej Pleev lub ntsej muag nyob hauv lawv. Huab Tais Yes Xus tawm tuaj nyob hauv tus neeg txawv, tus neeg raug kev mob kev ntsaj, tus neeg pluag. Thiab yog peb tsob hwb lawv, peb yuav nrhiav pom tias Huab Tais Yes Xus ua yam muaj txiaj ntsim qab hau rau peb, yog Huab Tais Yes Xus tsa qhov zoo tshaj hauv peb kom tsim los.

Sib faib Huab Tais Yes Xus zaj dab neeg: As Xias txoj kev.

Nyob hauv ntu ob yog taw mus rau cov neeg As Xias txoj hau kev sib faib lub Moo Zoo. Tswv Qhia Liab Das Vis hais tias kev sib faib lub Moo Zoo nyob As Xias xeev ntuj yog kev piav zaj, tsis yog kev ua tus tswv kav. Nws lees tias thaud cov neeg Xib Fab tuaj tshaj Ntuj Lus, lawv yuam neeg kom tig los ntseeg, qhov no ua ib lub qhov txhab rau Koom Txoos zaj liv xwm.

Nyob rau As Xias niaj hnub no, peb kev sib koom mus ua ke pib ntawm:

- Kev sib ntsib sib fim.

- Kev muab siab rau mloog.

- Kev koom piav tib zaj lus.

- Kev hwm thiab saib tau tej txuj txoog thiab kab lis kev cai hauv kev teev hawm.

Lub Moo Zoo hlob huam vam tau kawg yog hauv daim teb muaj lub siab xav qhov zoo xwb. Lo lus no yog Tswv Qhia Liab Das Vis xav ntuas sawv daws kom nrog luag lwm tus taug kev mus ua ke tau, thiab ua tus neeg me tim ntsej nrog luag tej cov lus nug tob tob. Zoo ib yam li Huab Tais Yes Xus, nws siv paj lug los hais kom tau txhib sawv daws muaj feem xyuam nrog thiab lawv yog tus nrhiav tau lo lus txhais rau lawv.

Tswv Qhia Liab Das Vis muab tej yam hauv qab no los txuas nrog plaub txoj lw kev uas FABC tau sib tuav xam:

1. Txuj txoog – kev cog cag thiab nthuav tawm txog lub siab ntseeg nyob hauv haiv neeg qauv tes zoo nkauj, yas suab, kab ke, kwv txhiaj, thiab kev hwm poj yawm txwv koob.

2. Kev teev hawm – txhim tus choj kom sawv daws tau kev tsim phooj tsim ywg thiab sib tham.

3. Kev pluag – ntsib Leej Pleev thaum muab siab hlob lawv.

4. Kev tsim tawm -  sib pab tus peb lub tsev thiab mloog ntiaj teb thiab cov neeg pluag lub suab quaj suab nyiav.

Ntoj kev mus ua ke rau xyoo 2033 – Kev Tso Siab Tawm Rooj Fiv Ntuj.

Lub Koom Txoos tab tom ntsia mus rau xyoo 2023 uas yog txwm 2,000 xyoo Leej Pleev raug txom nyem, tuag, thiab sawv rov los. Tswv Qhia Liab Das Vis hais kom sawv daws ras tias Xyoo Ntshiab Loj tsis yog cia rau nco txog cov xwm tas los, li no “Xyoo Ntshiab Loj yog muaj tuaj kom peb tau ua hmoov txog cov zaj uas tseem niaj hnub tshwm sim tuaj. Peb yog cov thwj tim nyob hauv txoj kev. Tej lub caij peb qaug zog, tej lub caij peb tsis paub yuav ua li cas, txawm li ntawd los peb tseem nrhiav.”

Nws hais ntxiv tias As Xias xeev ntuj tsis muaj cov Tuam Tsev Teev Ntuj loj xws li lwm xeev ntuj, tab sis As Xias xeev ntuj muaj kev sim haum xeeb, kev ua tswv yim kom ntaug, kev sib tos txais, kev sib hlub, thiab kev tso siab nplua mias. Cov paj tshab no pab kom As Xias teb npaj txhij faib lub Moo Zoo mus raws li txoj kev ua tshiab thiab zoo kho.

Kawg no, Tswv Qhia Liab Das Vis muab zaj hais txog Huab Tais Yes Xus nrog ob tug thwj tim mus rau Es Mas Ws los ua daim duab hais txog kev tawm rooj fiv Ntuj mus rau xyoo 2033 li no:

- Peb tsis pom Huab Tais Yes Xus, tab sis nws nrog peb mus kev ua ke.

- Huab Tais Yes Xus mloog tas mam hais.

- Huab Tais Yes Xus pab peb kom muaj kev tso siab thiab nws qhib peb qhov muag.

- Huab Tais Yes Xus muab lub ncuav mov ntais kom peb rais ua Huab Tais Yes Xus lub cev rau lub qab ntuj.

- Huab Tais Yes Xus ploj mus kom nws rov tawm los rau nws cov thwj tim pom.

“Qhov no yog peb txoj kab xwm tshwj cia rau xyoo 2033. Kom Huab Tais Yes Xus rov tawm tuaj dua nyob hauv peb lo lus, peb tus yeeb yam, peb pawg neeg, thiab peb kev hais txog lub Moo Zoo mus raws li As Xias tu lw.”