Kev ntseeg pab kom cov Kav Tos Liv Karen zam kev txo txoj sia thiab ua kom lub siab nyob tus tau.

Yav tag los cov Karen Kav Tos Liv nyob Thaib qaum teb lawv ntshai cov neeg tuag, tab sis nyem no lawv teev Ntuj thiab thov Ntuj pab lawv.

Kev ntseeg Kav Tos Liv tau ua kev nkag siab hais txog cov neeg tuag ntawm ntau lub zos Karen nyob Thaib qaum teb. Kom tej kev ntshai cov neeg tuag raws li poj yawm txwv koob hloov los ua kev thov Ntuj pab, kev nco txog thiab kev cia siab hauv kev ntseeg.  

Hais txog Teresa uas nws muaj 73 xyoos, nws yog neeg Kav Tos Liv nyob hauv lub zos Huay Tong ze nroog Chiangmai. Kev nco txog cov neeg tuag hauv yim neeg, yog kev ua tawm txog kev ntseeg thiab kev nyiam kev hlub. Hauv nws tsev muaj Yes Xus daim duab thiab cov txheeb ze uas tuag lawm cov duab nrog rau tswm ciab thiab txoj Saw Mab Liab. Nws hais tias : “Hnub txwm xyoo ntawm cov neeg tuag, peb yuav caw Txiv Plig thiab cov neeg ntseeg tuaj koom ua thaj txi Ntuj nyob hauv peb tsev, yog tom qab peb mus tu cov ntxa tas los.”

Raws kev cai mas ib txhia neeg Karen ntseeg tias ; cov neeg tuag tus ntsuj plig tsis tau nyob kaj siab lug. Yog qhov laij thawj ntawm kev muaj mob nkeeg los sis hmoov phem. Tsev neeg yuav tsum ua thaj txi Ntuj thiab cev txhiam xws noj los yog tua tsiaj rau cov ntsuj plig ntawd. Txiv Plig Tidkham Jailertrit uas nws yog ib tug Txiv Plig Karen hauv lub Koom Haum hwm Yes Xus Lub Siab hais tias : “Kev ntseeg Kav Tos Liv tau ua kev nkag siab txawv hais txog cov neeg tuag, uas yog hais txog kev teev Ntuj ntau dua kev ntshai tus ntsuj plig phem.” Txawm li cas kuj xij, kev pauv ntxeev ntawd yog qhov maj mam mus. Kab ke pam tuag raws li qhov qub muaj qee yam kuj tseem ua xyaw nrog kev ntseeg Kav Tos Liv. Ua kom pom txog kev sib raug zoo ntawm kev hloov kev ntseeg thiab tus yam ntxwv hauv tej kab lis kev cai.

Txiv Plig Niphot Thianwihan hais tias : “Cov Txiv Plig thaum ub lawv tsis txhawb nqa kab ke pam tuag raws tej kev cai qub qub, tab sis tom qab lub Rooj Ncauj Lus Vas Tis Kas Ob rov hais txog qhov no, kom hwm zej zog tej kab lis kev cai thiab muab tej kev cai qub hloov kom haum nrog kev ntseeg Kav Tos Liv.”

Ntawm cov neeg Karen Kav Tos Liv txheej tshiab, mas kev ntshai tej poj yawm txwv koob yog qhov nco cia ntau dua kev ua hauv kev ntseeg lub neej niaj hnub. Pranom Manee uas nws yog ib tug neeg ntseeg nyob hauv lub xeev Lampang hais tias : “Nws txoj kev ntseeg tau daws tso nws ntawm tej kev ua raws tus ntsuj plig siab. Nyem no peb paub tias Tswv Ntuj yog kev nyiam kev hlub.”

Hais txog Teresa tus uas coj kev ntseeg Kav Tos Liv los 70 xyoo, mas kev nco txog cov neeg tuag ntawd tsis cuam tshuam txog kev ntshai ntxiv mus. Nws hais tias :

“Kev nco txog cov neeg tuag tsis yog kev ntshai, tab sis yog kev ua tawm txog kev nyiam kev hlub.”

Hmong Survey Popup Image