Vas Tis Kas tsab ntawv xov xwm Fides News tshaj tawm hnub tim 31 lub 8 hli tas los tias : “Tswv Qhia Paul Liu Honggang raug teeb tsa nyob hauv hnub tim 31 lub 8 hli, hauv lub tuam tsev teev Ntuj hwm Niam Mab Liab lub Siab nyob Pingcheng, hauv lub xeev Shanxi. Ntawv xov xwm tshaj tias Vaj Qhia Leo 14 tau tsa Tswv Qhia Liu hnub tim 10 lub 8 hli, tom qab soj ntsuam tus yam ntxwv los ntawm Vas Tis Kas thiab Suav kev cog lus. Txiv Plig Liu yog tus Tswv Qhia tim 17 uas raug teeb tsa los ntawm Vas Tis Kas, txij thaum Suav thiab Vas Tis Kas sib cog lus hauv xyoo 2018 los. Chiv thawj mas tsuas muaj hnub nyoog 2 xyoos, thiab tau txais kev txuas hnub nyoog nyob hauv xyoo 2020 thiab 2022. Hauv lub 10 hli xyoo 2024, muaj xov xwm tshaj tias kev sib cog lus no tau txais kev txuas hnub nyoog 4 xyoos ntxiv.
Muaj cov Txiv Plig tshiab 6 leej uas tau txais kev teeb tsa, txij li thaum Vaj Qhia Leo 14 pib ua Vaj Qhia hnub tim 8 lub 5 hlis xyoo 2025. Tswv Qhia Shen Bin nyob Saas Hais, nws yog tus thawj coj cov Txiv Plig ntawm lub Koom Txoos Kav Tos Liv nyob Suav teb (BCCCC), uas cov tseem hwv lees txais thiab yog tus lwm thawj tswj lub Koom Haum Kav Tos Liv cov Suav nyiam teb chaws CCPA. Yog lub Koom Haum uas tseem hwv txhawb nqa kom ua tus coj cov kab ke.
Muaj 4 tug Txiv Plig nyob hauv lub Cheeb Koom Txoos Shanxi, xws li Txiv Plig Ding Lingbin nyob Changzhue, Txiv Plig Liu Genzhu nyob Linfen, Txiv Plig Ma Cunguo nyob Shuozhou thiab Txiv Plig Ji Weizhong nyob Lüliang tuaj sib koom ua thaj txi Ntuj. Cov neeg ntseeg tuaj koom ua thaj txi Ntuj li ntawm 200 leej, xam nrog rau cov Txiv Plig, cov Leej Phauj thiab cov neeg ntseeg huv si.
Tswv Qhia Liu yug hnub tim 2 lub 11 hlis xyoo 1970, hauv lub zos Wufuying ze lub nroog Taiyuan. Nws kawm nyob hauv lub tsev kawm ua Txiv Plig Fenyang Seminary txij xyoo 1988-1992, thiab kawm txuas ntxiv rau National Seminary nyob Pej Ceeb. Nws tau txais daim ntawv pov thawj fab kev ntseeg. Nws txais lub Cim Tiag Tes ua tus Txiv Plig saib lub tsev teev Ntuj Datong hnub tim 24 lub 11 hlis xyoo 1996. Thiab ua hauj lwm rau ntau lub tsev teev Ntuj ua ntej nws yuav tau ua tus tsav lub Cheeb Koom Txoos hnub tim 15 lub 3 hlis xyoo 2005. Cov neeg ntseeg hauv Datong muaj txij tiam 17 los lawm. Lub Cheeb Koom Txoos Datong teeb tsa xyoo 1922 thiab raug sawv cev lub Cheeb Koom Txoos xyoo 1932, thiab raug tsa ua Cheeb Koom Txoos tiav log hauv xyoo 1964. Zim txwv no lub Cheeb Koom Txoos no muaj cov neeg ntseeg li ntawm 10,000 leej, Txiv Plig 15 leeg, 16 lub tsev teev Ntuj thiab muaj cov Leej Phauj cev tus kheej rau Yes Xus lub Siab. Lub Koom Txoos Kav Tos Liv txoj kev kav nyob Suav teb, yog kev chawj chim ntawm Pej Ceeb thiab Los Mas txij thaum Suav tsis pub Vas Tis Kas muaj tiam lis thiab tom qab koom tshaj txeeb hwj chim xyoo 1950. Cov Kav Tos Liv ntau plhom leej nyob Suav teb raug faib ua 2 pab. Xws li pab zwm rau tseem hwv Suav thiab pab tsis kam zwm rau tseem hwv Suav, uas yog lub Koom Txoos zais ntshis los ntau caum xyoo. Kev tsis sib haum xeeb muaj ua ntu zus, vim kev tsa Tswv Qhia tsis raug cai uas tau txais lus tso cai los ntawm cov tseem hwv koom tshaj Suav (CCP).
Vas Tis Kas hais tias : “Vas Tis Kas thiab Suav cov lus cog yog xav sau tas cov neeg ntseeg nyob Suav teb, thiab pab txuag kev cog lus thiab tiv thaiv kev txais lub Cim Tiag Tes tsis raug cai.” Cov kws xyav moo hais tias : “Cov lus cog no yog kev ntxeev siab rau cov neeg Kav Tos Liv zais ntshis uas zwm rau Vas Tis Kas. Tab txawm yuav raug cov tseem hwv hiam thiab liam cov koom tshaj Suav tias : “Siv cov lus cog no los kaw Vas Tis Kas lub qhov ncauj hais txog kev hla tib neeg txoj cai.”
Pab neeg saib xyuas tib neeg kev ncaj ncees hais tias : “Cov koom tshaj Suav siv cov lus cog no los rhuav tshem lub Koom Txoos zais ntshis thiab ua kom lub Koom Txoos nyob hauv tseem hwv Suav qab tswj hwm tas mus li.”
