Nov yog qhov ua rau kuv xav ntau zuj zus tuaj, hauv lub caij kuv pw nyob hauv tsev kho mob 2 xyoos dhau los. Vim ntau yam mob, xws li mob hauv siab thiab leeg tsis muaj zog. Ua tsaug rau Tswv Ntuj uas pom tias tej mob no tsis hnyav pes tsawg. Txawm li cas kuj xij, nws ua rau kuv xav tias ; txog qhov kawg peb txhua tus yog ib feem ntawm tib tsev neeg. Lub caij kuv pw nyob hauv tsev kho mob tsaib no, kuv pw nyob hauv chav tsev uas cov neeg mob pw coob coob ua ke, vim kuv mob hauv siab. Qhov kawg mas kev soj ntsuam hais tias teeb meem yog los ntawm ncauj plab thiab hnyuv. Kuv lub txaj pw nyob ib sab ntawm ib tug poj niam uas nws xav tau kev pab ib sab. Muaj ntau zaus uas nws quaj thiab ntsaj, nws tsis kam noj tshuaj. Lub caij cov kws kho mob tab tom saib xyuas nws ntawd, mas nws tso quav lo tus kheej tas. Ua rau quav tsw mus thoob plaws lub tsev kho mob. Cov kws kho mob thiaj rub ntaub thaiv nws lub txaj thiab ntxuav txhua yam kom huv. Ib tug kws kho mob txiv neej tau tsuag tshuaj tsw qab rau kom lub tsev txhob tsw ntxhiab.
Thaum ntawd kuv tab tom noj hmo thiab xav nyob ntsiag to. Kuv zoo siab thiab qhuas txog cov kws kho mob tej kev ua hauj lwm sai thiab ua zoo heev. Kuv txoj kev hwm lawv txhab ntxiv thaum kuv xav tias ; tej zaum tej yam no yog qhov lawv ua xwm yeem nyob hauv niaj hnub. Muaj ib qho ntxiv yog thaum kuv tab tom nyob tos kuv lub txaj pw hauv chav tsev. Muaj ib tug poj niam laus ntxim li nws yog neeg puas hlwb. Nws ntsaj vim mob thiab qw nrov nrov thov kom nws tau tawm mus tsev. Cov kws kho mob ua siab ntev nrog nws tham thiab lawv nplij nws kom txhob ntshai. Txhua yam no ua kom kuv pom txog tib neeg tej kev txom nyem. Yog kuv tsis nrog lawv nyob hauv tsev kho mob, mas tej zaum kuv twb tsis tau pom tej yam no thiab. Nws yog qhov kuv tau paub txog kev muab siab rau thiab kev sib pom dej siab. Dhau no lawm tej kev sib raug zoo li phooj ywg kuj tshwm sim nyob hauv tsev kho mob. Thaum paub tias peb txoj kev noj qab nyob zoo yog nyob ntawm cov kws kho mob thiab lawv cov neeg tes. Tib yam uas yuav ua yog lees tias; peb cov uas yog neeg mob, mas peb tab tom mus ua ke kom txog kev noj qab nyob zoo uas peb vam tseg. Nov yog lub sij hawm kev vam khom tus kheej thiab tus kheej tej kev khav theeb raug tshem tawm. Peb rov ntsia pom peb nyob hauv peb txoj kev ua neeg. Qee zaus kuv pom tau tias nyob hauv lub caij tag kev cia siab no, Tswv Ntuj qhia peb tias peb yog leej twg. Tswv Ntuj cov me nyuam uas tsis muaj zog, yuav vam txog Tswv Ntuj kev khuv leej thiab kev saib xyuas.
Thaum zoo li no lawm, peb pom txog qhov tsim nyog uas yuav vam txog lwm tus kev thov Ntuj los kho thiab txhawb nqa peb. Yog qhov qhia kom peb nco txog qhov tsim nyog hauv zej zog. Kuv ntseeg tias kev faib peb tej kev tsis muaj zog rau lwm tus, ua kom hauv tej zej zog muaj kev sib raug zoo tiag.
Kuv nco tau tias Txiv Plig John Powell uas nws yog ib tug Txiv Plig Yes Xus Is neeg As Mes Lis Kas thiab yog tus kws sau ntawv uas twb tuag lawm, nws tau hais li no tseg tias : “Cov neeg nrog peb luag, mas hnov qab yooj yim kawg. Tab sis cov neeg nrog peb quaj, mas hnov qab nyuab.”
Tsis muaj leej twg xav mus pw nyob tsev kho mob, tab sis kuv yog ib tug neeg ntseeg, kuv pom tias nov yog ib qho uas Tswv Ntuj qhia peb tias peb yog leej twg. Peb tsis muaj leej twg nyob mus ib txhis, uas yog tau txais kev txhawb nqa los ntawm peb cov neeg ntseeg, thiab qhov kawg peb lub neej nyob ntiaj teb no tsuas yog kev mus kev uas yuav coj peb mus txog peb lub tsev tseeb tiag.
