Tswv Qhia Liab Das Vis hais tias “Peb tsum lees paub qhov peb qaug, mas peb thiaj li ntsia mus rau xyoo 2033 tau.”
Hnub tim 29 lub 11 hlis lub Rooj Kev Tso Siab Tawm Rooj Fiv Ntuj Loj tsa lub rooj xov xwm rau cov tub xov xwm ntsig nug, muaj Tswv Qhia Liab Das Vis tus Tswv Qhia nyob Kas Los Kas As thiab tus Thawj Tswj lub Rooj Tswv Qhia nyob Fis Lis Pees teb, yog tus tawm los ntsib sawv daws thiab teb lawv cov lus nug txog lub Xyoo Ntshiab 2033 uas yog xyoo txwm 2,000 xyoo Huab Tais Yes Xus tuag thiab sawv rov los.
Tswv Qhia Liab Das Vis qhib siab hais tias lub Koom Txoos nyob As Xias tsis txhob dai ncuv rau txoj kev xav tias yus yog tus yeej lawm, qhov yuav muab siab dai rau mas yog yus tsum ua tus neeg me tsis muab hlob, mloog, thiab rov muab siab rau lub Moo Zoo lub zog tsim txiaj.
Ntsia mus rau xyoo 2033.
Muaj lus nug tias lub Koom Txoos yuav ua li cas faib tau lub Moo Zoo kom mus thoob As Xias teb thaum yuav txog xyoo 2033, mas Tswv Qhia Liab Das Vis hais tias lub Koom Txoos tsum xub lees paub txog qhov yuam kev nyob rau yav tas los.
Nws teb li no “Muaj ntau pab pawg neeg ntseeg xav kom lawv xwb ua tus yeej. Qhov ntawd pab tsis tau dab tsi.”
Nws maub lub Cim Ntshiab Rov Sib Haum Xeeb los txhais ua 4 nqe rau sawv daws khaws coj mus siv; yog 1) kev lees txhaum, 2) kev tu siab, 3) kev them txim, 4) kev zam txhaum. Plaub nqe no yog lub Koom Txoos tshwj cia rau yus tau coj los soj ntsuam yus tus kheej.
“Ib yam li ntawd thiab, peb tsum lees paub qhov peb qaug, vim kev qaug ntawd rais ua yam thaiv lub Koom Txoos kom tsis txhob tshwm los rau ntau lub teb chaws pom.”
Nws hais ntxiv tias kev tshuaj ntsuam ncaj ncaj no tsis ua rooj vag thaiv tab sis yog ib yam tseem ceeb ua ntej rau kev tshaj lub Moo Zoo. Nyob hauv kaum xyoo tom ntej no, lub Koom Txoos kev muaj feem tsum pom tseeb nyob hauv kev ua neeg me, hwm neeg cov txuj txoog, thiab kev qhib siab sib tham, tej no yog txoj cai uas lub rooj tuav xam cov Leej Choj hauv lub zim txwv no muab siab rau hais tsis tseg.
“Lub rooj tuav xam cov Leej Choj pub tus qauv rau peb yoog raws. Tsis yog tias yuav ua li cas xwb, nws tseem yog lub tswv yim tus plig, lub neej txoj kev. Peb tsum nthuav qhia lub Moo Zoo nrog rau kev hwm neeg txuj txoog, hwm neeg kev teev hawm, thiab hwm neeg lub tsim.
Tus cwj pwm no tsom txog Vaj Qhia Fas Ntshis Kus cov lus zeem tseeb tias kev sib faib lub Moo Zoo, mas tsis txhob yuam. Tswv Qhia Liab Das Vis hais li no “Peb tsis txhob muab lub zog los yuam neeg lub siab ntseeg ntxiv. Peb tsum ua tim khawv xwb.”
“Puas deeg txog sawv daws lub siab ntseeg?”
Tswv Qhia Liab Das Vis raug cov tub xov xwm nug txog lub Rooj Tuav Xam Kev Tshaj Ntuj Lus nyob As Xias teb thawj zaug uas hais txog muab kev piav tham los tshaj txog lub Moo Zoo lub zog haub uas muaj feem deeg ua rau muaj kev txhim tsa lub rooj Kev Tso Siab Tawm Rooj Fiv Ntuj no.
Nws muab lo lus nug no nthuav kom pom dav txog cov Kav Tos Liv lub peev xwm uas haub tau lub sawm fem, mas nws xav kom mus ntsuam xyuas txog lub zog deeg, tshwj xeeb mas nyob rau lub ntuj tiam ntiv ntsis taw no.
Nws hais tias “Ib tug twj ntsuas mas yog social media. Peb tsum tig mus saib tias cov tub ntxhais hluas lawv puas mloog peb? Peb txoj kev piav los tham lus ntawd puas siv tau los tsis tau? Puas deeg txog neeg siab?”
Nws hais tias kev piav dab neeg tseem yog lub ntsiab tseem ceeb hauv kev tham txog Huab Tais Yes Xus. Tsis yog vim xav zam kom dhau kev tshaj Ntuj Lus, tab sis yog qhov qhib ib qho chaw rau tau sib tham, sib ntsib, thiab sib hloov tswv yim.
“Nyob hauv kev sib fim, sib tham txuas lus, yuav muaj kev hloov. Yam li hloov siab, hloov kev xav pom. Tsis yog raug yuam; tab sis yog yeem. Qhov no yog kev hloov siab tshiab.”
Kev xam npaj thiab tshuaj xyuas, mas lub Koom Txoos kheev ua tau heev, tab sis qhov lub Koom Txoos tsis nco faj mas yog kev soj tias nyob hauv qhov lub ntuj tiag puas yuav siv tau.
“Neeg mas nyiam xyuas tias qhov npaj tseg ntawd tiav los tsis tiav, tab sis tsis tshua muaj tus hais tias puas deeg txog lub siab ntseeg.”
Nws muab lub teb chaws Fis Lis Pees los hais ua piv txwv, nws taw ncaj rau tseem hwv kev nyiag noj nyiaj uas muaj tau tsis ntev los no, yam li cov lus sib cav hais txog kev tiv thaiv tsis pub dej nyab, qhov no yog lub cim qhia kom pom tias lub siab ntseeg thiab lub sawm fem kev hloov nyias mus rau nyias ib sab lawm.
“Kuv hais ncaj ncaj tias kuv txaj muag qhia tias neeg feem coob hauv lub teb chaws yog cov Kav Tos Liv.” Nws hais li ntawd. “Muaj kev nyiag noj nyiaj ntau heev. Txhais tau tias peb tsis muaj cuab kav coj lub Moo Zoo mus deeg txog lawv lub siab ntseeg tau.”
Tswv Qhia Liab Das Vis hais ntxiv tias lub Koom Txoos tsum ua chaw txuag sab ntsuj plig thiab kev tsim txiaj, tsis yog ua chaw rau neeg cais pab faib pawg. Lub Koom Txoos tsum muaj cuab kav.
“Peb yog cov sawv nyob pem ntej ntawm kev hais lus. Peb tsum ua tus pab kom kev sib tham mus tau yooj yim thiab kom kev sib tham txi tau txiv tawm los. Peb tsum lees peb qhov qaug, thiab rov nug tias peb puas yuav kho tau peb kev tshaj lub Moo Zoo kom zoo dua qub.”
Cog cag tob hauv kev tsis muab hlob thiab kev tso siab.
Tswv Qhia Liab Das Vis rov tig mus hais txog nqe ‘Kev sib faib lub Moo Zoo yuav txaus ntseeg tau mas yog tsum cog cag hauv kev tsis muab hlob, kev ncaj ncees, thiab raws nraim Huab Tais Yes Xus tus piv txwv’ tias “Peb tus qauv yog Huab Tais Yes Xus. Huab Tais Yes Xus hloov tsoom sid, Huab Tais Yes Xus hloov lawv lub neej. Qhov no yog peb txoj hauj lwm yuav ua mus ntxiv, nyob hauv kev ua neeg me tsis muab hlob, kev sib hwm, thiab kev sib koom tes.”
