Txwm 135 xyoos ntawm Vaj Qhia Leo 13 tsab ntawv Rerum novarum.
Vaj Qhia Leo 14 thiaj tshaj tawm nws thawj tsab ntawv uas muaj lub npe tias ‘Magnifica Humanitas’. Txhais tias kev loj hlob ntawm tib neeg thiab kev txuag tib neeg lub meej mom hauv txheej neeg AI lub tswv yim tsim tawm. Thov kom zej zog sib pab txuag neeg qhov muaj nqis, txhawb nqa qhov tseeb, txhawb nqa lub meej mom hauv kev ua hauj lwm, txhawb nqa kev ncaj ncees hauv zej zog thiab kev thaj yeeb.
Tswv Ntuj tsim neeg nyob hauv kev loj hlob thiab lub meej mom, tab sis neeg tab tom xaiv ua tej yam loj dua hauv keeb kwm. Qhov ntawd puas yog txhim tus pej thuam Npas Npes tshiab, los puas yog tsim ib lub tsheej rau Tswv Ntuj thiab neeg nyob ua ke ? Lo lus qhib tsab ntawv Magnifica humanitas, tau hais meej tseeb kawg txog lub ntsiab hauv tsab ntawv no. Tsab ntawv no raug nthuav tawm hnub tim 25 lub 5 hlis, uas yog tsab ntawv Vaj Qhia sau yuas hnub tim 15 lub 5 hlis. Yog ncaj rau hnub txwm 135 xyoos ntawm Vaj Qhia Leo 13 tsab ntawv Rerum novarum. Yog tsab ntawv tseem ceeb hauv kev ntseeg ntawm lub Koom Txoos Kav Tos Liv. Vaj Qhia Leo 14 txais cov lus no, nws thiaj sau tsab ntawv teb lo lus nug tseem ceeb ntawm lub ntiaj teb zim txwv no. Qhov ntawd yog teeb meem kev kub ntxhov ntawm AI lub tswv yim tsim tawm. Vaj Qhia tsab ntawv no faib ua 5 zaj, uas muaj qhov xav tias Technology tsis yog lub zog yeeb ncuab rau neeg thiab nws kuj tsis tau phem. Txawm li cas kuj xij, Technology tsis yog qhov chaw nruab nrab, vim nws ua kom pom txog qhov muaj nqis, qhov xav ua thiab txiaj ntsim qab hau ntawm cov neeg tawm tus qauv, txhawb nqa, saib xyuas thiab siv nws ua hauj lwm. Vim li no Vaj Qhia thiaj thov kom ib tsoom neeg siv Technology kom muaj txiaj ntsim qab hau rau sawv daws thiab pab txuag neeg lub meej mom. Los ntawm kev ua tib zoo xav txog qhov phem qhov zoo ua ke thiab sib koom siab. Kom lub ntiaj teb nco ntsoov tias ‘neeg lub siab yog qhov chaw Tswv Ntuj nyob.’
Kev ntseeg ntawm lub Koom Txoos.
Thawj zaj : yog hais txog kev qhia thiab kev ncaj nees rau lub Moo Zoo. Qhia lub Koom Txoos kev ntseeg mus raws kev ntseeg txheej tshiab ntawm Vaj Qhia thiab raws lub Rooj Ncauj Lus Vas Tis Kas Ob. Yog qhia tias kev ntseeg tsis yog txoj cai los yog qhov yuav tsum ua, tab sis yog kev ntseeg hauv kev sib koom ua ib tug nyob hauv tej liv xwm, uas pab kom cov neeg ntseeg txawj mem txog txhua yam xwm txheej nyob hauv ntawv Moo Zoo. Vaj Qhia rov xav txog tas cov Vaj Qhia tag los tej lus, txij Vaj Qhia Pis Os 12 los txog Vaj Qhia Fas Ntshis Kus. Nws qhuas txog tsab ntawv Rerum novarum tias ; yog lub hom phiaj tseem ceeb hauv kev txhim kho lub Koom Txoos cov kev ntseeg. Txhua txhia tus Vaj Qhia tau piav txog kev pauv ntxeev hauv cov liv xwm raws lub Moo Zoo uas yog hais txog tib qho. Xws li neeg lub meej mom, tus nqi ntawm kev ua hauj lwm, kev siv peev txheej kom muaj txiaj ntsim qab hau rau txhua tus, kev sib koom ua ib lub siab, kev siv lub hwj chim kom tsim nyog, kev saib xyuas yam tsim tawm mus txog qhov tseem ceeb hauv kev thaj yeeb thiab kev ua kwv ua tij.
Kev txuag lub meej mom hauv kev ua neeg.
Hauv zaj ob : Vaj Qhia tau piav txog lub hauv paus thiab qhov tseem ceeb ntawm lub Koom Txoos cov kev ntseeg. Yog pib ntawm neeg lub meej mom uas raug tsim raws Tswv Ntuj tus duab. Vaj Qhia hais tias : kev ua raws txheej tshiab thiab tej txiaj ntsim qab hau ntawm qee pab neeg yuav txo neeg qhov muaj nqis kom rais ua cov peev txheej siv rau txiaj ntsim qab hau. Los yog ntsuas qhov muaj nqis hauv kev ua tiav thiab qhov tsim tawm. Ua ke ntawd neeg lub meej mom tsis yog yam yuav nrhiav tau, tsim tau los yog ua kom pom tau, tab sis yog qhov muaj nqis nyob hauv txhua tus neeg txij thaum pib los.
Ib qhov tseem ceeb ntxiv, yog hwm tib neeg kev ncaj ncees uas hla tsis dhau. Tshwj xeeb tshaj txoj cai hauv kev ua lub neej txij thaum yug mus txog qhov kawg raws ntuj tsim. Vaj Qhia zeem tseeb txog lub Koom Txoos qhov ntsia pom tias : kev nchuav me nyuam, kev tua neeg dawb huv thiab kev txhob txwm ua yog kev txhaum loj kawg. Dhau no lawm, Vaj Qhia tseem hais txog kev txuag txoj cai hauv cov haiv neeg tsawg. Tshwj xeeb tshaj yog cov poj niam kom muaj txoj cai lij choj, muaj kev kawm, kev ntiav zog thiab muaj feem cuam nyob hauv zej zog thiab kev tseev tsim. Kom muaj neeg mloog lawv lub suab thiab pom lawv qhov muaj nqis tseeb tiag.
Kev caij tsuj los yog rhuav tshem ib haiv neeg twg, yog hla kev ncaj ncees phem kawg.
Vaj Qhia Leo 14 tau hais txog 5 yam tseem ceeb hauv lub Koom Txoos cov kev ntseeg. Thawj yam : yog txiaj ntsim qab hau ua ke. Yog hais txog saib neeg lub meej mom hauv zej zog kom sib luag zos. Vaj Qhia zeem tseeb tias ; kev txhawb nqa txiaj ntsim qab hau ua ke yuav tsis cais tawm ntawm kev hwm txhua haiv neeg txoj cai hauv kev ua neej nyob, txuag tus kheej thiab muaj feem cuam nrog ib tsoom neeg. Li ntawd, kev muab siab rau thiab lwm yam uas npaj rhuav tshem, xav tswj kav los yog caij tsuj ib haiv neeg twg thiaj yog kev hla kev ncaj ncees phem kawg uas lees txais tsis tau.
Technology tsis yog poob nyob hauv ib pab neeg twg tes.
Yam ob : yog lub hom phiaj kawg ntawm lub cuab tam. Hauv zim txwv no Vaj Qhia muab los ua kom haum nrog Technology thiab AI lub tswv yim tsim tawm. Nws hais tias Technology tsis tsim nyog khi nrog ib tus neeg twg los ob peb lub Koom Haum xwb, vim yuav ua qhov khoob rau cov nkag mus txog thiab cov raug tso tseg nyob hauv Digital.
Yam peb : yog kev siv lub hwj chim kom tsim nyog. Thov kom cov zej zog hla dhau tej kev tswj hwm los yog tswj hwm ntau dhau thiab txhawb nqa kev sib koom ua hauj lwm ua ke ntawm txhua lub Koom Haum.
Yam plaub : yog kev sib koom ua ib lub siab. Yog qhov tsim nyog thiab ncaj ncees uas tiv kev tsis quav ntsej thiab xav txog cov neeg zim txwv no thiab txheej neeg tom ntej.
Kev ncaj ncees hauv zej zog thiab kev sim hais txog cov neeg thoj nam.
Yam tsib : yog kev ncaj ncees hauv zej zog. Hauv txheej neeg Digital yog qhov tsim ua kom muaj kev sib luag rau txhua tus. Txuag cov neeg pluag txom nyem, tiv nrog kev ntxub ntxaug thiab tej lus cuav, nrog rau kev saib xyuas tsoom pej xeem kev siv Technology. Kom neeg lub meej mom thiab txiaj ntsim qab hau ua ke yog lub hom phiaj tseeb tiag, tsis yog kev nrhiav nyiaj txiag xwb.
Vaj Qhia hais tias cov neeg thoj nam, cov tsiv teb tsaws chaw, cov raug ntiab tawm yog zoo li daim ntawv Litmus ntsuas kev ncaj ncees hauv zej zog. Vim lub tswv yim uas zej zog ua rau cov neeg no, ua kom pom tias zej zog nyob hauv kev ntshai. Nws thiaj thov kom txhua lub teb chaws pab txuag cov neeg raug ntiab tawm hauv lawv tej zej zog, hauv kev nyab xeeb thiab raug kev cai. Tos txais yam muaj meej mom thiab txhawb nqa txoj cai uas yuav tau nyob nyab xeeb sov siab ib yam li lawv nyob hauv lawv tej qub zog. Daws cov teeb meem ntawm kev ua neeg tsiv teb tsaws chaw.
Lub Koom Txoos yuav rov soj ntsuam tus kheej.
Vaj Qhia txhib hais tias : tas 5 yam no tsis yog muaj cia rau zej zog xwb. Nws tseem raug muab los siv hauv lub Koom Txoos thiab. Lub Koom Txoos thov kom muaj kev soj ntsuam tus kheej txoj kev ncaj ncees, ntxuav kev sib raug zoo thiab lwm yam uas ua kom muaj kev tsis ncaj ncees, kev tsis dawb huv thiab kev siv lub hwj chim mus rau qhov yuam kev. Qhov no yog nrog rau cov poob rau txhua yam kev ntxias dag. Tsis hais fab ntsuj plig, kev lag luam, cov Koom Haum, poj niam txiv neej los siv lub hwj chim hla lwm tus kev ncaj ncees. Vaj Qhia hais tias kev lees txais qhov yuam kev, kev kho kev piam sij kom ncaj ncees thiab kev tiv thaiv tsis pub muaj cov xwm txheej no tshwm sim ntxiv, yog qhov tseem ceeb hauv kev mus txog kev ncaj ncees.
