Vaj Qhia Leo 14 tsa Is Ntias tus Tswv Qhia Liab Oswald Gracias ua tus sawv cev hauv lub rooj sab laj loj zaum tim 12, ntawm cov Tswv Qhia As Xias los yog FABC nyob Jakarta.

Hauv tsab ntawv uas sau rau Tswv Qhia Oswald Gracias, Vaj Qhia tau muab kev cia siab txog qhov loj hlob ua ntu zus ntawm lub Koom Txoos As Xias. Thiab nws txhib kom cov Tswv Qhia tab meeg tiv kev txhawj xeeb ntawm lub ntiaj teb tshiab. Txhob ntshai nqes tes ua tiag tiag nyob hauv peb txheej neeg. Vaj Qhia Leo 14 sau cov lus no thiab thov kom lub Koom Txoos muab Tswv Ntuj tso nyob nruab nrab hauv cov hauj lwm. Thiab yuav tsum saib cov neeg pluag txom nyem, cov neeg mob, cov tsiv teb tsaws chaw thiab cov me nyuam yaus yog qhov tseem ceeb.

Vaj Qhia tseem hais txog cov lus nyob hauv Nkauj Paj Nruag zaj 85 qib 11, thiab thov kom lub Koom Txoos ua tus tsim kev sib koom siab, uas yog kev nyiam kev hlub thiab qhov tseeb los sib ntsib, kev ncaj ncees thiab kev thaj yeeb los sib puag. Tswv Qhia Oswald Gracias kav lub Cheeb Koom Txoos Bombay txij xyoo 2006 txog 2025, thiab tau ua tus thawj tswj cov Tswv Qhia nyob Is Ntias teb. Nws yuav ua tus coj lub Txoos hauv FABC lub rooj sab laj, thiab theej Vaj Qhia cov lus rau cov neeg tuaj koom lub rooj sab laj. FABC lub rooj sab laj yuav sau tas cov Tswv Qhia As Xias hauv lub ntsiab lus ‘Kev nqua hu kom tig los yuav lub siab tshiab raws lub pwm tsav txoj cai thiab cov hauj lwm hauv kev ua tus choj, thiab ua tus tuam coj nyob As Xias.”

Yog hais txog tsim kom muaj kev sib haum xeeb, kev sib tham thiab kev muaj feem cuam hauv kev tshaj lub Moo Zoo nyob thoob plaws xeev ntuj.