Vaj Qhia qhuas txog cov tub tshaj Ntuj Lus uas ua hauj lwm rau cov neeg pluag txom nyem

Vaj Qhia Leo 14 qhuas txog cov txiv neej thiab poj niam uas lawv muab tus kheej los ua Tswv Ntuj tub txib. Cov uas lawv mus rau tej chaw pluag txom nyem nyob thoob ntiaj teb thiab tsis kam tso lawv cov neeg tseg. Tab txawm yuav nyob hauv lub caij sib cav sib ceg kuj xij. Lawv nyob ruaj nreb, tab txawm tsis muaj kev nyab xeeb kuj xij. Yog qhov qhia lub siab muaj sia, yog qhov ntaus nqi tau ntau dua lo lus hais txog kev ntseeg uas hla tsis dhau hauv lub neej uas pluag txom nyem tshaj plaws.”

Vaj Qhia hais cov lus no hnub tim 2 lub 2 hlis, hauv cov lus qhuab qhia hnub tsuj xeeb Niam Mab Lias txais lub Cim Ntxuav. Uas yog ncaj rau lub Koom Txoos Kav Tos Liv cov tub tshaj Ntuj Lus hnub. 

Lub thaj txi Ntuj yog pib ntawm qhov Vaj Qhia foom hmoov zoo hauv cov dej ntshiab. Cov poj niam thiab txiv neej 10 tawm leej uas muab lawv tus kheej los ua Tswv Ntuj tub txib nquam tswm ciab. Thaum cov nplaim teeb hauv lub tuam tsev teev Ntuj hwm Leej Ntshiab Pob Zeb pib qauj zuj zus, mas cov neeg nyob puv nkaus hauv tsev teev Ntuj puav leej tuav tswm ciab. Tom qab lub tsev teev Ntuj tsaus ntuj dub nciab, mas qhov pom kev maj mam ci tuaj. Vaj Qhia Leo 14, tus uas nkag mus hauv lub Koom Haum Aus Nkus Tis Nus yav hluas thiab ua tub tshaj Ntuj Lus nyob Pes Lus ntau caum xyoo. Tau rov nco txog tsoom tub tshaj Ntuj Lus poj niam thiab txiv neej hauv lub Koom Txoos nyob thoob ntiaj teb cov hauj lwm. 

Nws hais tias : “Cov neeg tsim cov Koom Haum thiab tsim tej pab neeg ntseeg, uas lawv mloog Leej Ntuj Plig Ntshiab cov hauj lwm, yog tus piv txwv zoo hauv kev ua txoj hauj lwm no,  hauv kev ncaj ncees thiab zoo tiag.”