ZAJ NYEEM HNUB TIM 18 LUB 12 HLIS: HNUB PLAUB LUB LIS PIAM 3 CAIJ TOS HUAB TAIS
COV LUS NYOB PHAU NTAWV YES LES MIAS (YLM 23: 5-8)
LUB MOO ZOO RAWS LI MAS TAIS (MT 1: 18-24)
Kwv tij Hmoob sawv daws, tus Yaj Saub Yes Les Mias xub hais tseg li 600 xyoo ua Yes Xus ntej tias Huab Tais Tswv Ntuj cog lus tias yuav tsa ib tug kaus siab ncaj hauv Das Vis tsev neeg los ua vaj, tas sawv daws yuav hu nws ua ‘Huab Tais, peb txoj kev ncaj’.
Nyob hauv xeem lus Hes Nplaws uas yog cov His Xas Lais xeem lus mas lo lus ‘Huab Tais, peb txoj kev ncaj’ lawv yuav hais zoo li no ‘Yasweh Zidqenu’; yog lo lus piav txog Tswv Ntuj tus Pleev tus yam ntxwv thiab tus xeeb ceem coj ncaj.
Nyob hauv cov His Xas Lais mas thaum lawv yuav tsa tus twg ua vaj los yog ua Yaj Saub mas lawv yuav muab roj los pleev tsa tus ntawd; lawv hais tias yog Tswv Ntuj pleev nws.
Kwv tij, tas nrho cov vaj His Xas Lais thiab cov vaj Yus Das mas tsis muaj tus twg muaj tus yam ntxwv thiab xeeb ceem coj ncaj li. Li ntawd, tus Yaj Saub Yes Les Mias cov lus thiaj yog hais txog tus Pleev uas Tswv Ntuj cog lus yuav xa tuaj cawm cov His Xas Lais. Tus ntawd, yuav tawm hauv Das Vis tsev neeg los.
Hnub no peb hnov tus Tshiab hais rau Yos Xes tias “Yos Xes, Das Vis leej tub; koj txhob ntshai coj Mab Liab los nyob hauv koj tsev. Mab Liab yuav yug ib tug tub; yog Leej Ntuj Plig Ntshia ua kom xeeb nws, koj yuav tis tus tub lub npe hu ua Yes Xus, nws yuav cawm nws haiv neeg ntawm lawv cov txhaum.”
Tus Tshiab cov lus no ua pov thawj tias tus me nyuam Yes Xus yog tuaj ntawm Tswv Ntuj tuaj, nws yuav yog tus Mes Xias los yog tus Pleev vim nws tuaj cawm cov neeg ntseeg txog nws, nws yuav yog Das Vis tsev neeg vim muaj Yos Xes uas yog Das Vis cov xeeb ntxwv lees ua Yes Xus txiv.
Kwv tij, Yos Xes tsim los mas nws ntseeg cov lus tus Tshiab hais rau nws, ces Yos Xes thiaj coj Mab Liab los nrog nws nyob kom xwv cov lus Tswv Ntuj cog nrog cov His Xas Lais tsheej xeeb tuaj, kom Tswv Ntuj kev cawm tuaj txog lub qab ntuj.
Peb tseem hnov tus Hauv Paus Xa Lus Mas Tais sau cov lus no tseg hauv nws phau Ntawv Moo Zoo tias “Tas ib puas tsav yam ntawd tshwm sim raws li lo lus uas Huab Tais Tswv Ntuj kom tus Yaj Saub xub hais tseg tias ‘tus ntxhais nkauj xwb yuav xeeb tub, nws yuav yug ib tug tub. Luag yuav tis nws npe hu ua Es Mas Nus Es.”
Lo lus ‘Es Mas Nus Es’ txhais tias ‘Tswv Ntuj nrog peb nyob’ los raws li peb nquag hnov hauv lub Txoos Txi Ntuj tias ‘Huab Tais Ntuj nrog nej nyob’.
Lub npe ‘Yes Xus’ txhais tias ‘Huab Tais Ntuj cawm’.
Kwv tij, tus Tshiab hais tias “Yos Xes, koj txhob ntshai coj Mab Liab los nyob hauv koj tsev.”
Lo lus no kuj zoo ntuas peb tias “Hnub no, peb txhob ntshai ntseeg tias Yes Xus yog Tswv Ntuj Leej Tub, Yes Xus yog tus cawm peb, Yes Xus yog peb tus Huab Tais, thiab txhob ntshai txais Yes Xus tuaj nyob hauv peb.”
Yog peb txais Yes Xus tuaj nyob hauv peb mas Tswv Ntuj yuav nrog peb nyob vim Huab Tais Yes Xus yog Es Mas Nus Es.
Thaum peb txais Yes Xus tuaj nyob hauv peb lawm, peb yuav tsis muaj kev ntshai ntxiv vim tias peb muaj Tswv Ntuj nrog peb nyob.
