ZAJ NYEEM HNUB TIM 10 LUB 8 HLI 2025
HNUB CHIV, LIS PIAM 19 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 12:32-48)
Nyob zoo,
Kwv tij hmoob hmov thiab tshua, lub Moo Zoo hnub tseem qhia peb ntxiv txog lub cuab tam muaj nqis tshaj plaws yog lub cuab tam nyob saum Ntuj lub Ceeb Tsheej. Peb yuav tsum nrhiav Ntuj lub cuab tam, tsis yog ntiaj teb lub cuab tam. Huab Tais Yes Xus hais li no ntau ntau zaus kuj vim tias tsis muaj leej twg tau txais txoj sia nyob mus li vim ntiaj teb lub cuab tam. Ntuj lub cuab tam xwb thiaj ua kom neeg tau txais txoj sia nyob mus li. Vim li no, Huab Tais Yes Xus thiaj hais tias “Nej txhab kub nyob qhov twg, nej lub siab kuj yuav nyob qhov ntawd.” Huab Tais Yes Xus xav kom peb xub nrhiav Tswv Ntuj lub Ceeb Tsheej tso, ces Ntuj yuav pub tej ntawd huv tib si los ntxiv rau peb.”
Kev nrhiav Tswv Ntuj lub Ceeb Tsheej yog txoj kev npaj yus tus kheej kom txhij, npaj yus lub neej kom zoo, npaj yus tus tsuj plig kom dawb kom huv, npaj yus lub siab kom mos. Qhov no yog txoj kev zov hmo, npaj yus tus kheej kom txhij. Huab Tais Yes Xus hais tias “Cov tub txib uas thaum tus tswv los txog, nws pom lawv tseem zov hmo, mas lawv txoj hmoov zoo.” Txog lub sij hawm ntawd, peb yuav txhij txais Huab Tais Yes Xus los nyob hauv peb lub tsev. Lub caij ntawd, peb yuav tau txais Ntuj lub cuab tam, uas yog Huab Tais Yes Xus.
Kwv tij zoo nyiam sawv daws, nej txhob ua siab me los txhob tu siab uas nej yog neeg ntseeg txog Tswv Ntuj, uas nej ntseeg txog Huab Tais Yes Xus. Nej txiav siab raug lawm, nej tsis mus yuam kev lawm. Nej yeej yuav tum zoo siab uas peb yog neeg ntseeg vim tias Huab Tais Yes Xus yog lub cuab tam tuaj ntawm Tswv Ntuj tuaj. Nws yog Tswv Ntuj lub cuab tam rau peb. Nws Lo Lus qhia yog txoj kev tseem ceeb yuav ua kom peb ua neej zoo, ua neej ncaj ncees. Huab Tais Yes Xus Lo Lus, Huab Tais Yes Xus lub cev thiab cov tshav yog cov mov pub txoj sia, yug peb tus tsuj plig, ua kom peb txhij tos hnub uas Tswv Ntuj yuav pub txoj sia nyob mus li ua lub cuab tam rau peb. Li ntawd, txhob tu siab los txhob ua siab me, yog tej zaum txoj kev ntseeg Ntuj muaj teeb meem dab tsi, thov kom peb npuab Tswv Ntuj, thov Tswv Ntuj pab peb kom ntseeg txog nws mus txog qhov kawg. Tsis tso Tswv Ntuj pov tseg. Tswv Ntuj lub cuab tam nyob hauv peb txhais tes lawm, Tswv Ntuj lub cuab tam nyob ntawm peb lub xub ntiag lawm. Thov kom peb khaws cia kom zoo mog.
“Cov tub txib uas thaum tus tswv los txog, nws pom lawv tseem zov hmo, mas lawv txoj hmoov zoo.” Nyob zoo sawv daws.
