Hnub chiv tim 22 lub 12 hli ntuj 2024
Lus Kas 1:39-45
Lub lis piam 4 hauv Lub Caij Tos Huab Tais
“Ua cas Tswv Ntuj thiaj pub kom kuv tus Huab Tais leej niam tuaj xyuas kuv?.”
Nyob zoo…
Kwv tij hmoob sawv daws, hnub no yog hnub chiv hauv lub lis piam 4 hauv lub caij Tos Huab Tais. Lub ntsiab lus ntawm tswm ciab hauv lub lis piam no yog “kev nyiam kev hlub.” Yog Tswv Ntuj txoj kev nyiam kev hlub rau tib neeg nyob thoob qab ntuj.
Hauv lub Moo Zoo hnub no, peb pom tias Tswv Ntuj txoj kev hlub tib neeg yuav tshwm sim tuaj tiag tiag, vim tias Tswv Ntuj Leej Tub xeeb los ua neeg hauv Mab Liab lub plab. Tus Cawm Seej ntawm thoob qab ntuj yuav tuaj txog lawm. Sawv daws yuav tsum zoo siab dhia hom khaj tos txais nws, vim tias Tswv Ntuj nrog peb nyob lawm.
Hauv lub Moo Zoo hnub no peb pom tias muaj 2 tug neeg thaum nkawd paub tias Tswv Ntuj tuaj xyuas nkawd, nkawd zoo siab tshaj plaws. Nkawd yog Es Lis Xas Npes thiab tus me nyuam Zam. Es Lis Xas Npe lo lus hais tias “Ua cas Tswv Ntuj thiaj pub kom kuv tus Huab Tais leej niam tuaj xyuas kuv?” muaj lub ntsiab lus tshaj, tsim nyog peb yuav xav tswv yim txog.
Kwv tij sawv daws, Es Lis Xas Npes paub tias nws yog ib tug poj niam laus laus xwb, yog ib tug neeg me me xwb, tsim nyog uas Tswv Ntuj Leej Tub tuaj xyuas nws nyob tom tsev. Tiam sis, qhov no yog Tswv Ntuj txoj kev hlub tib neeg. Tswv Ntuj mus nhriav tib neeg nyob tom tsev, Tswv Ntuj mus nhriav tib neeg nyob tom lawv qhov chaw, Tswv Ntuj mus nhriav tib neeg nyob hauv lawv lub neej, Tswv Ntuj xub mus nrhiav peb. Zoo li Leej Ntshiab Paj Lug hais tias “Tswv Ntuj nyiam peb yog qhov tias thaum peb tseem yog neeg txhaum” (Los Mas 5:8). Tswv Ntuj nyiam peb txawm tias peb yog neeg txhaum, Tswv Ntuj nyiam peb txawm tias peb tseem ua txhaum txhua txhia hnub. Peb ua txhaum dua thiab dua, Tswv Ntuj kuj tseem nyiam peb li qub.
Li ntawd, mas lub caij no, peb thiaj li yuav tsum saib ntawm yus lub neej, peb tseem muaj dab tsi xav ntxeev kom zoo dua tuaj, peb kuj maj ua muaj pauv. Peb ntseeg txog Tswv Ntuj mas, peb yeej ntseeg tias Tswv Ntuj yuav pab peb kom pauv tau ua lub neej zoo, peb thiaj muaj kev kaj siab lug, muaj Tswv Ntuj lub txiaj ntsim nyob hauv peb.
Lub caij Tos Huab Tais no, cia peb muab kev nyiam kev hlub rau ib leeg, rau cov nyob ib puag ncig peb, vim tias qhov paj tshaj loj tshaj plaws uas peb yuav muab rau ib leeg yog kev nyiam kev hlub los yog “tus me nyuam Yes Xus” uas yog Tswv Ntuj qhov paj tshaj loj tshaj plaws rau qab ntuj neeg sawv daws txhua leej txhua tus.
