Sunday 24 August 2025
Luke 13:22-30
Lub Caij nyob Nruab Xyoo
Cov kwv tij hmoob sawv daws, hauv lub Moo Zoo hnub no Huab Tais Yes Xus teb rau ib tug neeg tuaj nug nws tias “cov yuav txais kev cawm puas yog cov tsawg? Cov kwv tij, kuv xav caw nej sawv daws twm txog Huab Tais Yes Xus cov lus teb rau ib tug neeg ntawd. Huab Tais Yes Yus hais li no. “Nej ua tiag mus hauv lub qhov rooj nqaim mog. Coob leej yuav nrhiav kev mus lawm hauv, tab sis lawv yuav mus tsis txog.” Huab Tais Yes XUs hais li no, tsis yog txhais tias nws yuav xaiv ib txhia neeg xwb, tsis txhais tias tsuas yog cov Kas Tos Liv los cov Protestant los cov Christian xwb thiaj tau txais kev cawm ntawm Tswv Ntuj. Tiam sis, Huab Tais Yes XUs qhia kom cov xav tau txais kev cawm kom mus kev hauv lub qhov rooj nqaim. Huab Tais Yes Xus qhia kom peb paub txoj kev, nws tsis yuav peb, nws cia kom peb txiav siab. Yog koj xav tau kev cawm koj ua raws li nws txoj kev uas yog nws cov lus qhia. Yog koj tsis xav tau kev cawm, koj kuj txiav txim siab. Li ntawd, mas peb yuav tau txais kev cawm los tsis tau txais kev cawm, kuj nyob ntawm peb xwb. Nyob ntawm peb, peb yuav ua neeg zoo li cas. Yus ua neej nyob mas, yus ua neej zoo li cas. Yus puas nyiam Tswv Ntuj thiab nyiam luag tej, pab lwm tus los yus tsis nyiam leej twg li, yus nyiam yus xwb. Huab Tais Yes Xus hais tias Tswv Ntuj txoj kev los Tswv Ntuj qhov rooj nqaim me tsis, vim tias tsis muaj leej twg xav mus hauv. Ua cas ho tsis muaj leej twg xav mus hauv lub qhov rooj nqaim? Kuj vim tias Huab Tais Yes Xus txoj kev los lub qhov rooj, Huab Tais Yes Xus cov lus qhia xav kom tib neeg sib nyiam sib hlub. Nyiam Tswv Ntuj thiab nyiam luag tej. Lo lus qhia no hais lus yooj yim tiag, tiam sis ua nyuaj kawg nkaus li. Huab Tais Yes Xus qhia kom tib neeg nrauj yus tus kheej kom tsob hwb lwm tus, txawm tias lawv tsis tshua nyiam yus kuj xij. Qhov tseeb hais tias yus yuav tsum nrauj yus tus kheej tsob hwb lwm tus tsis yooj yim kiag li os cov kwv tij. Yus ua ua ces tej zaum tsis muaj leej twg pom yus, tsis muaj leej twg pom muaj nqi, yus yuav xav li cas. Yus pab tsob hwb lub tsev teev Ntuj, yus tuaj koom thaj txi Ntuj txhua hnub chiv, yus pab luag tej, yus teev Ntuj rau lawv. Tej zaum, luag tej tsis to taub qhov yus ua, yus yim neeg tsev neeg tsis to taub qhov yus hais, yus yuav xav li cas, yus yuav ua dab tsi?
Nco ntsoov tias Huab Tais Yes Xus hais hnub no tias “Nej ua tiag mus hauv lub qhov rooj nqaim mog. Coob leej yuav nrhiav kev mus lawm hauv, tab sis lawv yuav mus tsis txog.” Thov kom Tswv Ntuj Lo Lus hnub no txhawb nqa peb lub zog kom muaj cuab kav ua raws li Tswv Ntuj Lo Lus Qhia, kom peb ntseeg txog Tswv Ntuj tsis tu ncua, tsis ua xyem xyav. Thov kom peb muaj zog ua raws li Tswv Ntuj Lo Lus, ces peb yuav tau txais kev cawm zoo li Huab Tais Yes Xus hais. Nyob zoo sawv daws.
