Kev ntseeg ua kom peb muaj kev cia siab. (Faith gives us hope)
Charles Peguy uas nws yog ib tug kws txawj ntse neeg Fab Kis hauv tiam 19, hais tseg tias : “Txoj kev ntseeg uas Tswv Ntuj nyiam tshaj, yog kev cia siab.”
Leej Ntshiab Paj Lug hais tias : “Nov yog kev ntseeg raws li Has Nplas Has, leej txiv ntawm peb txoj kev ntseeg.” Nws yog tus piv txwv rau peb, uas vam txog cov lus cog. Nws thiab Xas Las uas yog nws poj niam, nkawd lub hnub nyoog laus lawm. Nkawd tawm hauv nkawd lub teb chaws thiab mus rau ib lub teb chaws deb uas tsis muaj leej twg paub. Vim Has Nplas Has ntseeg, mas nws thiaj mloog ntuj hu nws kom sawv kev mus rau ib lub teb chaws uas nws yuav txais los ua nws lub cuab tam. Ces nws sawv kev, nws tsis paub tias nws yuav mus txog qhov twg. Raws li qhov kev xav txoj kev ntseeg uas muaj zog thiab saib mus rau tom ntej no, txawv txoj kev ntseeg uas kuv ib txwm nkag siab thiab loj hlob los, thiab nws muaj hwj chim rau kuv lub neej. Txoj kev ntseeg uas qhuas nyob hauv zaj hu nkauj cav txog Tswv Ntuj thiab raug siab, yog txoj kev ntseeg ntawm peb cov poj yawm txwv koob. Kev ntseeg yog kev ncaj ncees rau tej kab ke ntshiab. Kev ntseeg ntawm Has Nplas Has yog kev tshais ruam mus tom ntej hauv kev tso siab. Tiag tiag yuav ruaj nreb hauv qee yam uas ib txwm coj los. Nws txoj kev ntseeg yog “kev yeej hauv kev cia siab.” Kuv ntseeg tias txoj kev ntseeg uas cia siab thiab tso siab no, nws tseem ceeb heev rau peb zim txwv no. Peb tab tom ua lub neej nyob hauv lub ntiaj teb ntxhov quav niab thiab tab tom ntsib lub neej tom ntej uas tsis ruaj khov. Kev ntseeg uas tab tom tshais ruam mus tom ntej hauv kev cia siab, ua kom pom nyob hauv peb thawj zaj nyeem uas yog ntawv Thoob Tsib.
Phau ntawv no sau nyob hauv thawj tiam neeg ua ntej Yes Xus yug los, kom ua lub zog txhawb siab rau cov Yus Das uas lawv nyob deb vaj deb tsev. Thiab ntxiv kev ntseeg hauv lub teb chaws uas Tswv Ntuj npaj tseg rau lawv yav tom ntej. Cov lus no hais txog hmo uas Tswv Ntuj daws tso lawv cov poj yawm txwv koob kom dim ntawm kev ua qhev nyob Hais Nkws Tos teb, thiab pub lub zog rau lawv mus txog teb chaws suab puam hauv kev cia siab tias; lawv yuav tau mus txog thaj av cog lus.
Hmo ntawd twb xub qhia rau peb cov poj yawm txwv koob lawm. “Tswv Ntuj, peb cov yawg koob twb xub paub txog hmo uas koj yuav muab cov Hais Nkws Tos tua. Koj ua kom lawv xub paub vim koj xav pab lawv tso siab rau cov lus koj cog, koj xav pab lawv ua siab loj. Thaum lawv pom cov lus koj cog, mas lawv yuav muaj kev zoo siab.”
Kev ntseeg uas muaj zog thiab zoo siab no, yog qhov yug peb cov poj yawm txwv koob
txoj sia. Tsis hais poj niam txiv neej, cov uas lawv muab tus kheej los tseb cov noob uas yog Tswv Ntuj cov lus mus thoob ntiaj teb. Coob leej twb tuag thaum lawv tsis tau pom lawv cov hauj lwm txi txiv. Cov theej lawv yog cov sau qoob loo ntawm qhov lawv tau tseb. Raws li Paraic Pearse hais tseg tias :
“Thaum lawv txaus siab yuav tseb noob.”
Cov lus hauv Lus Kas ntawv Moo Zoo, muaj ib lo lus uas Yes Xus hais rau nws cov Thwj Tim tias; kom lawv txhob ntshai, kom lawv tso siab rau lub hom phiaj uas Leej Txiv npaj tseg rau lawv. “Pab me yaj, nej txhob ntshai mog, vim nej Txiv zoo siab muab lub Ceeb Tsheej rau nej.” Kev ntshai, tsis yog kev ua xyem xyav thiab yog qhov txawv kev ntseeg. Yes Xus kheev kheev hais rau nws cov Thwj Tim tias :
“Txhob ntshai”. Kev ntshai tuaj yeem ua kom peb qaug zog thiab muaj mob, kaw peb tus kheej nyob nrog yav tag los thiab ua rau peb tsis tuaj yeem tshais ruam mus tom ntej tau. Kev ntseeg uas Yes Xus nrhiav ntawd, yog hais txog tso yam uas peb xav tias nws yuav ua kom peb nplua nuj pov tseg. Ntawd yog peb lub cuab tam. Kom peb nrhiav yam uas ruaj khov tiag nyob saum ntuj.
“Muab nej lub cuab tam muag, nej muab pub rau cov neeg pluag. Nej tsim tej nas nyiaj tsis txawj qub, tsim ib txhab kub uas tsis txawj nqig rau saum ntuj. Nyob saud, tsis muaj tub sab tuaj ze, tsis muaj kab rws xwv. Vim tias nej txhab kub nyob qhov twg, mas nej lub siab kuj yuav nyob qhov ntawd.”
Kev ntseeg uas muaj cuab kav ntsia rau tom ntej, yog lub zog txhawb siab rau Has Nplas Has thiab cov His Xas Lais. Qhov uas Yes Xus taij thov ntawm peb ntawd, nws tsis yooj yim. Hauv lub caij muaj kev txhawj xeeb thiab tsis ruaj khov hauv peb lub neej, txoj kev ntseeg no yog qhov peb xav tau. Leej Txiv lub Ceeb Tsheej, lub Ceeb Tsheej ntawm kev ncaj ncees, kev thaj yeeb thiab kev nyiam kev hlub uas Yes Xus tshaj, saib zoo li nws nyob deb heev. Niaj hnub nyem no tej xov xwm yog hais txog kev ntshai hauv tsov rog, kev txom nyem, kev ploj tuag thiab kev tu siab. Yav tom ntej tsaus nti zoo li tag kev cia siab. Yog ua raws li neeg xav, thaum lub ntiaj teb tab tom ntsib kev piam sij hauv yam muaj txoj sia, kev tseev tsim thiab kev teev hawm tsis sib haum xeeb heev zuj zus. Thiab tsis tuaj yeem sib koom tes kom tau daws tej xwm txheej phem uas neeg tau ntsib tag los. Lub sij hawm zoo li no, peb kheev kheev nyob nrog tej kev ntxhov siab yav tag los. Tiag tiag mas tsim nyog xav txog lub neej yav tom ntej uas tsis paub, tab sis peb txoj kev ntseeg hu kom peb tshais ruam mus tom ntej hauv kev cia siab nyob hauv peb nruab siab. Nov yog kev ntseeg uas txhua zaus peb tsuj xeeb nyob hauv lub Cim Yug. Hauv lub Cim Yug peb nco txog yam uas Yes Xus ua nyob hauv hmo kawg ua ntej Yes Xus yuav ntsib kev tuag. Yes Xus tuav lub ncuav mov thiab lub ntim cawv, nws foom hmoov zoo, nws muab faib rau nws cov Thwj Tim. Yes Xus ntsib kev ntxeev siab, kev txom nyem thiab kev tuag. Nov thiaj yog txoj kev ntseeg loj tshaj uas muaj kev cia siab thiab ntiaj teb paub. Peb txoj kev ntseeg hu kom peb ua tim khawv txog txoj kev cia siab no ntxiv mus. Tab txawm zoo li peb lub ntiaj teb yuav puas tsuaj, tsis kav kev ntseeg tsis tau ua kom txhua yam tawm los zoo tas mus li, thiab tsis yog zoo li qhov peb xav.
Peb nco txog Václav Havel uas yog Tses Nias tus qub Txoov Tim Tswv cov lus tias: “Kev cia siab tsis yog qhov ntseeg tias qee yam yuav tawm los zoo, tab sis yog kev ntseeg tias qee yam tsim nyog, tab txawm nws yuav zoo li cas kuj xij.”
Thiab kev ua lub neej nrog kev ntseeg uas muaj kev cia siab no, yog kev muaj txoj sia puv npo. Yog kev muaj txoj sia hauv txhua yam xwm txheej hauv lub ntsiab muag qhov pom kev thiab ci ntsa hauv nruab siab. Yog daim phiaj qhia kev uas tseeb tiag, thiab tos txog lub tsheej muaj taw ntsa uas Tswv Ntuj yuav txhim thiab yuav tsa.
Kwv tij Hmoob sawv daws ! Hnub no peb tham txog kev ntseeg ua kom peb muaj kev cia siab los xaus li no xwb. Thov nej nco ntsoov Yes Xus cov lus no :
“Muab nej lub cuab tam muag, nej muab pub rau cov neeg pluag. Nej tsim tej nas nyiaj tsis txawj qub, tsim ib txhab kub uas tsis txawj nqig rau saum ntuj. Nyob saud, tsis muaj tub sab tuaj ze, tsis muaj kab rws xwv. Vim tias nej txhab kub nyob qhov twg, mas nej lub siab kuj yuav nyob qhov ntawd.” Nov yog cov lus uas Yes Xus hais rau nws cov Thwj Tim, tab sis ntawm peb mas Yes Xus xav kom peb nrhiav qhov tseeb nyob saum ntuj, vim yam nyob saum ntuj thiaj yog qhov nyob mus ib txhis.
Thov Huab Tais Yes Xus Pleev lub txiaj ntsim nrog nej nyob, ua nej siab kaj lug.
