ZAJ NYEEM HNUB TIM 1 LUB 2 HLIS 2025
HNUB RAU LUB LIS PIAM 3 CAIJ NYOB NRUAB XYOO
HN 11: 1-2, 8-19; MK 4: 35-41
Kwv tij Hmoob sawv daws, peb nquag hnov cov lus nthuav zaj Huab Tais Yes Xus txwv cua thiab dej ntuj no rau peb lub neej; yam li peb ua neej nyob zoo li lub nkoj nyob hauv plawv dej ntuj, peb raug xwv txheej tsis tseg, yog peb tso siab rau Huab Tais Yes Xus mas nws yuav pab peb kom dim ntawm cov xwv txheej tuaj raug peb ntawd.
Peb tso siab li ntawd, vim Huab Tais Yes Xus yog tus muaj zog loj, txhuam tsav yam mloog Huab Tais Yes Xus hais xws li cov cua thiab dej ntuj rov nyob tus yees thaum Huab Tais Yes Xus tsa tes txwv lawv.
Li ntawd, peb yuav tsis hais dab tsi ntau txog Huab Tais Yes Xus lub Moo Zoo peb tau hnov hauv hnub no.
Qhov peb yuav muab los tham me ntsis mas yog Huab Tais Yes Xus lo lus hais rau cov thwj tim tias “Ua cas nej ntshai ua luaj?”
Huab Tais Yes Xus hais lo lus ntawd rau cov thwj tim mas yog Huab Tais Yes Xus xav nug lawv tias “Nej muaj kuv nrog nej nyob, nej tseem yuav ntshai dab tsi. Nej twb nrog kuv ua ke, nej hnov kuv cov lus qhia, nej pom kuv ua hwj huam. Los yog tej lus nej hnov, tej hwj huam nej pom ntawd, nej tsis ntseeg li.”
Kwv tij, qhov cov thwj tim ntshai, mas yog qhov ntawd; lawv tsis ntseeg.
Hmoob lo lus ‘ntseeg’ muaj ob peb lub ntsiab; yam li thaum peb hnov ib tug hais txog tej yam peb tsis tau pom los tsis tau paub txog, ces peb xav tias muaj raws li nws hais ces peb ‘ntseeg’ nws; yam li tej tus neeg hais lus rau peb, peb hwm nws ces peb mloog nws hais ces peb ‘ntseeg’ nws cov lus; yam li tej tus neeg ua piv txwv rau peb pom kom peb ua raws, ces peb tso siab rau nws, peb thiaj ‘ntseeg’ nws.
Lo lus ‘ntseeg’ Huab Tais Yes Xus hais hauv ntu no yog ‘ntseeg’ vim cov thwj tim tau pom Huab Tais Yes Xus ua hwj huam thiab tso siab rau Huab Tais Yes Xus. Huab Tais Yes Xus cov lus thiaj yog hais tias “Nej pom kuv ua hwj huam ntau zaus, nej tseem tsis tso siab rau kuv thiab lod.”
Kwv tij, ‘ntseeg’ vim tso siab no mas nyob hauv Ntawv Moo Zoo ntau zaus peb siv lo tias ‘lub siab ntseeg’ los yog ‘ntseeg txog’; yam li Huab Tais Yes Xus hais tias “Koj lub siab ntseeg cawm koj lawm” los Huab Tais Yes Xus hais tias “Nej ntseeg txog kuv.”
Cov thwj tim lawv nrog Huab Tais Yes Xus, lawv pom Huab Tais Yes Xus ua hwj huam, lawv ntseeg tias Huab Tais Yes Xus yog tus Tswv Ntuj xa tuaj cawm lawv haiv neeg, tab sis lawv tsis ntseeg txog Huab Tais Yes Xus; lawv tseem tsi tso siab rau Huab Tais Yes Xus mas thaum lawv ntsib cua daj cua dub thiab dej ntuj nphau los vov lub mkoj lawv thiaj ntshai.
Thaum Huab Tais Yes Xus hais tias “Tswm Seeb! Koj nyob twj ywm” ces cua cia li ntaug dej ntuj rov tus yees. Cov thwj tim pom li ntawd, lawv lub tswv yim xav tsis tau tsis kav nyem no lawv ntseeg txog Yes Xus lawm, ces lawv hais tias “Yes Xus yog leej twg tiag, cua thiab dej ntuj thiaj mloog nws lus.”
Kwv tij Hmoob sawv daws, lo lus peb xav hais rau nej hauv hnub no mas yog lo lus tias “Yog peb hais tias peb ntseeg txog Yes Xus, mas tsis phim peb yuav ntshai dab tsi ntxiv.”
