ZAJ NYEEM HNUB TIM 10 LUB 9 HLI 2025
HNUB PLAUB, LIS PIAM 23 LUB CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 6: 20-26)
Kwv tij sawv daws, yog cia peb xaiv, txoj hmoov zoo, los yog kev nyob kaj lug kaj nrig, thiab txoj hmoov phem, kev piam sij, peb yuav xaiv qhov twg?
Nyob rau hauv zaj no, Leej Ntshiab Lus Kas hais txog cov tau txoj hmoov zoo, nws hais ua luv luv thiab hais ncaj ncaj xwb, nws hais 4 nqe lus yog cov tau txoj hmoov zoo thiab 4 nqe yog cov tau txoj hmoov phem. Nyob rau ntawm Lus Kas, mas kev xaiv txoj kev ua neeg me, neeg pluag, neeg qis qis thiab qhov tseem ceeb yog hwm Tswv Ntuj cia Tswv Ntuj ua tus Tswv kav yus, qhov ntawd yog txoj hmoov zoo. Tswv Ntuj yog qhov tseeb, yog kev vam meej, thiab yog txhua tsav txhua yam nyob rau hauv yus, los yog yuav xaiv, kev muaj nyiaj nplua nuj raws ntiaj teb neeg kev ntshaw, tab sis, ua lub neej nyob nrug deb Tswv Ntuj. Yes Xus cov thwj tim yuav tsum xaiv txoj kev raws Yes Xus thiab coj lub neej zoo li Yes Xus lub, uas yog ua neeg pluag, Yes Xus yug hauv lub dab nyuj, hos tuag saum tus ntoo cuam, kom xwv nyob ze cov neeg pluag, cov neeg qis qis uas tsis muaj dab tsi yog lawv tug, qhov ntawd yog txoj kev coj peb mus cuag, kev nyob kaj lug kaj nrig, thiab nyob ruaj nreb hauv Tswv Ntuj.
Nyob zoo sawv daws.
