ZAJ NYEEM HNUB TIM 11 LUB 2 HLIS 2025
HNUB NIAM MAB LIAB YEES TAWM NYOB LUB NROOG LUS DAWS
HP 1: 20-2: 4; MK 7: 1-13
Kwv tij Hmoob, hnub no peb hnov hais txog lub npe ‘Fas Lis Xais’, lub npe ‘Kws Ntawv Ntshiab’ thiab lo lus ‘Neeg zoo sab nraud’.
Lub npe ‘Fas Lis Xais’ txhais tias ‘muab cai’; lawv yog pab neeg kub siab coj Mais Xes txoj cai thiab nthuav Mais Xes txoj cai ua 613 qib cia rau sawv daws coj raws. Lawv muab cov qib lus nthuav ntawd los ua cov kab ke.
Lub npe ‘Kws Ntawv Ntshiab’ yog txhais tias ‘cov kawm cov phau ntawv’; lawv yog pab neeg kawm His Xas Lais cov Kauj Ntawv Ntshiab yam li ntawv Tos Las, cov ntawv kwv huam, cov ntawv Yaj Saub uas niaj hnub no nyob hauv peb cov neeg ntseeg phau Ntawv Cog Lus Qub.
Cov Fas Lis Xais thiab cov Kws Ntawv Ntshiab thiaj yog cov neeg coj thiab ntuas cov Yus Das kom ua raws li Mais Xes txoj cai. Lawv hais tias yog tej laus qhia kom ua.
Lo lus ‘neeg zoo sab nraud’ mas yog hais txog cov neeg qhia ib yam tab sis nws tsis ua raws raws li nws qhia luag. Yam li tus neeg ntuas luag tej kom txhob ze luag poj luag sev, tab sis nws nyiam nyiam tawm rooj mus tham hluas nkauj. Yam li tus neeg ntuas cov neeg muaj kom pub nyiaj pab cov txom nyem, tab sis nws tsis kam qee nws ib feem mus pub rau tus pluag nyob ze nws.
Hnub no lub Moo Zoo hais tias cov Yus Das muaj ib txog kab ke xub ntxuav tes ua ntej mam noj mov. Tab sis Huab Tais Yes Xus cov thwj tim cia li noj mov tsis ntxuav tes, ces cov Fas Lis Xais thiab cov Kws Ntawv Ntshiab thiaj nug txog qhov cov thwj tim tsis ua raws li cov Yus Das li kab ke.
Kwv tij, yog peb muab saib rau lub zim txwv no mas peb yeej pom zoo cia ntxuav test so mam noj mov, vim peb tsis paub tias peb tau mus tuav dab tsi thiab dab tsi los, peb tes puas lo tej yam tsis huv yuav ua mob rau peb lub cev. Tab sis nyob rau ob txhiab tawm xyoo ua ntej no, cov Yus Das kab ke ntxuav tes mam noj mov, mas lawv ntxuav tsis yog vim lawv tes lo av los khib liab. Lawv ntxuav tes vim lawv hais tias yog lawv ntxuav yam tsis huv pov tseg mas txoj kev txhaum thiaj tsis poob rau saum lawv.
Hnub no, Huab Tais Yes Xus tsis hais tias puas phim yuav xub ntxuav tes los tsis ntxuav. Qhov Huab Tais Yes Xus xav qhia mas yog lo lus hais rau cov tuaj nug ntawd tias “Nej tso Tswv Ntuj lo lus qhia tseg, nej muab nej khi rau neeg tej kev cai.”
Huab Tais Yes Xus hais li ntawd, vim tias Tswv Ntuj lo lus yog qhia kom nyiam Tswv Ntuj thiab hlub lwm tus, tab sis cov Fas Lis Xais thiab cov Kws Ntawv Ntshiab muab nthuav muab ntxiv ntau yam rau, ces lawv tsis nco tias Tswv Ntuj lo lus qhia kom sis nyiam; lawv tsuas hais tias leej twg tsis ua raws li cov lus lawv nthuav thiab ntxiv rau, tus ntawd yog hla txoj cai.
