ZAJ NYEEM HNUB TIM 11 LUB 3 HLIS 2024
HNUB OB LUB LIS PIAM 4 CAIJ PLAUB CAUG
COV LUS NYOB HAUV ZAM NTAWV MOO ZOO (ZM 4: 43-54)
Kwv tij Hmoob sawv daws, zaj tus Hauv Paus Zam sau txog Huab Tais Yes Xus lo lus ua tau kom tus neeg mob yuav tuag zoo rov los no mas muaj ntsis yuav zoo li zaj tus xab txheej tuaj hais kom Huab Tais Yes Xus pab mus kho nws tus tub txib tus me nyuam nyob hauv Mas Tais Ntawv Moo Zoo thiab Lus Kas Ntawv Moo Zoo; tej zaus yuav yog tib zaj. Tab sis nyob hauv Zam Ntawv Moo Zoo, mas Zam piav tias Huab Tais Yes Xus hais rau tus neeg tuaj thov Huab Tais Yes Xus tias “Yog nej tsis pom ib co cim thiab tej yam hwj huam mas nej tsis ntseeg.”
Tab sis tus neeg ntawd tsis hais dab tsi ntau, nws tsuas taij tas zog kom Huab Tais Yes Xus mus kho nws tus tub xwb, ces Huab Tais Yes Xus hais rau nws ntxiv tias “Koj rov mus mog, koj tus tub zoo lawm.”
Nws ntseeg thiab mloog lo lus Huab Tais Yes Xus hais ntawd, ces nws rov mus. Nws tus tub zoo lawm tiag!
Nyob hauv Mas Tais Ntawv Moo Zoo, mas tus Hauv Paus Mas Tais sau piav ntxiv tias Huab Tais Yes Xus hais tias nws tsis tau pom ib tug neeg muaj lub siab ntseeg loj npaum li tus xab txheeb tuaj thov nws zaum no li.
Cov kwv tij Hmoob, zaj no qhia dab tsi rau peb?
Yog peb muab ob zaj no los sib ntxiv ua ke, peb yuav pom tias tus neeg tuaj thov Huab Tais Yes Xus mus pab kho nws tus me nyuam no, nws muaj 2 yam yog ‘ntseeg lo lus’ thiab ‘muaj lub siab ntseeg’.
Nyob hauv peb sawv daws, Huab Tais Yes Xus xav kom peb muaj 2 yam no nyob hauv peb thiab.
Tsis yog muaj lub siab ntseeg tias Huab Tais Yes Xus yog Tswv Ntuj Leej Tub, nws muaj hwj huam ua tau tas txhua yam xwb; peb tsum ntseeg txog cov lus Huab Tais Yes Xus hais rau peb thiab.
Nyob zoo sawv daws.
