ZAJ NYEEM HNUB TIM 11 LUB 3 HLIS 2025
HNUB PEB, LIS PIAM 1 CAIJ PLAUB CAUG
(HX 55:10-11; MT 6:7-15)
Kwv tij Hmoob sawv daws, zaj thov ntuj twg ntxim Tswv Ntuj siab tshaj plaws thiab muaj txiaj ntsim tshaj rau tus neeg thov ntuj, kawg yog zaj Peb Txiv Nyob Saum Ntuj’ vim tias zaj no yog zaj Huab Tais Yes Xus qhia rau cov thwj tim. Li ntawd, ttxhua zaus thaum peb thov ntuj los teev Ntuj peb thiaj hais zaj Peb Txiv ntxiv rau peb cov lus thov.
Txawm tias peb yuav hais cov lus thov ntau npaum cas los muaj nqis tsis cuag cov lus nyob hauv zaj Peb Txiv no. Txawm tias peb yuav hais tib co lus thov txhiab vam pua zaus los tsis muaj kuab npaum peb hais zaj Peb Txiv no. Li ntawd, Huab Tais Yes Xus thiajs hais rau cov thwj tim tias “Thaum nej teev Ntuj mas nej txhob ntuas mus ntuas los. Nej txiv yeej paub tias qhov twg yog qhov nej yuav tsum muaj, tab yog nej tseem tsis tau thov los nej txiv twb xub paub lawm.”
Huab Tais Yes Xus tsis qhia kom peb thov kom tau raws li peb lub siab ntshaw, Huab Tais Yes Xus xav kom peb ua xis Tswv Ntuj siab. Yog li thaum peb thov los teev Ntuj mas thiaj tsis yog peb cev cov lus peb xav kom Tswv Ntuj pab peb xwb, peb tseem xav raws saib Tswv Ntuj xav kom peb ua dab tsi thiab.
Huab Tais Yes Xus hais tias “Nej yuav teev Ntuj zoo li no; Peb Txiv nyob saum ntuj.” Lo lus no yog Huab Tais Yes Xus kom peb nco ntsoov tias Tswv Ntuj tsis yog tus tsim peb xwb, nws tseem yog peb Txiv thiab, ces peb yog Tswv Ntuj cov me nyuam. Li ntawd, Tswv Ntuj thiaj nyob ze ze peb, ces peb yuav nrog Tswv Ntuj tham xws li thaum peb tseem yog me nyuam yaus es peb nrog peb niam peb txiv tham.
Peb hais tias peb Txiv nyob saum ntuj mas tsis yog lub ntuj ntsuab saum peb taub hau tab sis yog Tswv Ntuj lub hwj chim loj vov tag nrho lub sim ceeb xws li lub ntuj vov lub ntiaj teb, ces thaum peb hais tias peb Txiv nyob saum ntuj mas thiaj yog peb tab tom tsia siab rau Leej Txiv tus muaj hwj chim loj tas nrho.
Huab Tais Yes Xus qhia ntxiv tias “Nej yuav hais ntxiv tias; Koj lub npe ntshiab nto moo lug”, mas yog kom peb nco tias Tswv Ntuj lub npe yog ib lub npe ntshiab uas peb yuav tau hwm, tsis lam tau lam muab los hais ua si dog dig, ib yam li peb hwm peb niam peb txiv mas peb tsis lam muab peb niam peb txiv lub npe los hais ua si los yog tso dag tso luag.
Huab Tais Yes Xus hais ntxiv tias “Nej kuj yuav hais tias: Koj lub Ceeb Tsheej los txog” mas yog peb thov Tswv Ntuj pub kev nyiam kev hlub, kev ncaj ncees, kev thaj yeeb rau peb thiab rau lub qab ntuj neeg.
Huab Tais Yes Xus kuj qhia kom peb hais ntxiv li no “Kom muaj raws li koj nyiam nyob ntiaj teb no li nyob saum ntuj”, mas yog thov Tswv Ntuj tshoj peb siab kom peb txawj ua raws li Tswv Ntuj lub siab nyiam tsis yog ua raws li peb lub siab nyiam siab ntshaw. Li ntawd, thaum peb teev Ntuj thiaj tsis yog peb taij Tswv Ntuj yam li tus me nyuam yuav nws siab taij niam thiab txiv, tab sis peb ua li tus me nyuam mloog lus thov niam thiab txiv txib peb.
Huab Tais Yes Xus tseem qhia tias “Nej yuav thov li no: Thov koj pub mov txaus peb noj hnub no”, tsis yog ‘rau peb noj’ tab sis yog ‘txaus rau peb noj kom thawm hnub’ ib yam li thaud Tswv Ntuj tso Mas Nas los yug cov His Xas Lais kom txaus rau lawv noj ib hnub txwm xwb, tag kis Tswv Ntuj mam pub dua tshiab.
Huab Tais Yes Xus hais ntxiv tias “Nej yuav thov li no tias: Koj zam peb cov nuj nqis zoo li peb zam rau cov txhuav nqi ntawm peb”, ces Huab Tais Yes Xus nthuav tias nuj nqhis yog yam tsis zoo uas lwm tus ua rau peb. Yog li Huab Tais Yes Xus thiaj xav kom peb zam rau cov neeg ua txhaum ua tsis zoo rau peb, txhob pauj rau luag. Peb zam rau lawv mas peb thiaj muaj cuab kav thov Tswv Ntuj kom zam pub rau peb thiab. Thaum peb thov Tswv Ntuj zam rau peb mas yog peb tab tom tu siab rau peb cov txhaum thiab peb lees tias peb yog ib tug me nyuam neeg me me mas thoV Tswv Ntuj hlub peb tsis txhoab muab txim rau peb.
Huab Tais Yes Xus tseem hais tias tsis yog peb thov kom Tswv Ntuj yug nej thiab zam rau peb xwb, peb tseem yuav thov kom Tswv Ntuj txuag peb ntawm tus phem thiab, ces Huab Tais Yes Xus hais tias “Nej yuav thov tias: Koj txhob tso peb raug kev ntxias, thov koj npo peb dim ntawm kev phem.”
Kwv tij, hnub no peb los hais zaj Peb Txiv ua ke:
“Peb Txiv nyob saum ntuj, koj lub npe ntshiab nto moo lug.
Koj lub ceeb tsheej los txog,
kom muaj raws li koj nyiam nyob ntiaj teb no li nyob saum ntuj.
Thov koj pub mov txaus peb noj hnub no,
koj zam txhaum rau peb zoo li peb zam rau luag.
Koj txhob tso peb raug kev ntxias, koj npo peb dim ntawm kev phem.
Ua li.”
