ZAJ NYEEM HNUB TIM 13 LUB 2 HLIS 2024
HNUB PEB LUB LIS PIAM 6 CAIJ NYOB NRUAB XYOO
COV LUS NYOB HAUV MAS KOS NTAWV MOO ZOO (MK 8: 14-21)
Cov Hmoob sawv daws, thaum peb mus ua teb txog tav su, peb los so peb pom tias tsis nco qab ntim su tuaj, mas peb ib tug yuav liam rau ib tug tias tim koj mas wb thiaj tsis muaj su noj.
Thaum peb tshaib plab ces peb tsis nco txog dab tsi, peb tsuas nco txog peb lub plab lawm xwb.
Hnub no Huab Tais Yes Xus hais rau cov thwj tim tias “Nej xyuam xim mog, nej ceev faj rau cov poov xwb Fas Lis Xais thiab cov poov xab Hes Los”, mas lawv thiaj xav tias yog Huab Tais Yes Xus tab tom liam tias vim lawv tsis nco faj mas lawv thiaj tsis tau su noj.
Qhov tseeb mas Huab Tais Yes Xus tsuas ntuas lawv kom txhob ua zoo li cov Fas Lis Xais thiab Hes Los cov tub txib uas tos ntsoov saib puas yuam tau kom Huab Tais Yes Xus rau cov txwj laus.
Cov kwv tij, thaum peb raug ib tug mob hnyav rov zoo los, mas peb nco ntsoov txog qhov mob ntawd, peb mloog ntsoov saib peb puas yuav mob ntxiv. Peb hnov lub cev ib nyuag mob mas peb yeej xav tias ntshai tsam yuav rov mob hnyav li qhov qub, ces peb lub siab yuav fab, yuav ntxhov siab. Tab sis yog peb txawj tso siab rau Tswv Ntuj, peb saib tias qhov mob hnyav ntawd yog nrog Huab Tais ris kev txom nyem, mas peb lub siab yuav kaj.
Lub lis piam tom ntej no yog lub caij Plaub Caug, yog lub sij hawm rau peb tau them txim txhaum, rau peb tau koom nrog Huab Tais Yes Xus ris kev txom nyem. Muaj ib yam peb yuav ua nyob hauv lub caij Plaub Caug, yog coj kab ke yoo.
Thaum coj kab ke yoo, mas peb yuav tshaib thiab nqhis, tab sis qhov peb ua ntawd yog peb tab tom tu siab rau peb cov txhaum, peb yoo mas peb txhob mloog ntsoov lub plab nqhis, tiam sis peb yuav ib siab rau Tswv Ntuj mas peb lub siab thiaj yuav nyob kaj.
Nyob zoo sawv daws.
