ZAJ NYEEM HNUB TIM 21 LUB 1 HLIS 2025
HNUB NCO TXOG LEEJ NTSHAB AS NYES
HN 6: 10-20; MK 2: 23-28
Kwv tij Hmoob zoo nyiam, ntawm cov Yus Das mas hwm hnub Xas Npas Tos heev, vim lawv saib hnub Xas Npas Tos yog lub hauv ntsis ntawm txoj cai twj lij. Lawv ua cov Hais Nkws Tos qhev tau plaub puas tawm xyoo, lawv tsis muab ib hnub yuav tau so li. Thaum Huab Tais Tswv Ntuj npo cov Yus Das ntawm cov Hais Nkws Tos txhais tes, Huab Tais Tswv Ntuj thau lawv tawm hauv kev ua qhev los txais kev twj lij, mas Huab Tais Tswv Ntuj pub Txoj Cai rau lawv. Txoj Cai hais tias txhua hnub xya hauv lub lis piam mas lawv tsum so txhob ua hauj lwm, ces lawv coj raws li Txoj Cai qhia. Cov Yus Das tsis yog coj raws Txoj Cai xwb, lawv tseem coj nruj thiab.
Hnub no nyob hauv lub Moo Zoo, peb hnov Mas Kos sau piav tias cov Fas Lis Xais pom Yes Xus cov thwj tim de tej hnab nplej noj ces lawv hais tias Yes Xus cov thwj tim hla hnub xas npas tos!
Ua cas thiaj hais tias ‘hla’ hnub xas npas tos?
Vim cov Yus Das coj Txoj Cai nruj mas lawv saib tias thaum ib tug neeg twg de tej hnab nplej mas yog nws tawm lub zog los de ces hais tau tias yog nws ‘ua hauj lwm’ lawm.
Cov Fas Lis Fais yog cov Yus Das coj Txoj Cai nruj, lawv pom tias Txoj Cai sau li cas mas yuav li ntawd, ces ntau zaus ua rau lawv rov qab raug Txoj Cai muab lawv khi; lawv poob ua Txoj Cai qhev! Lawv tsis saib tias puas ‘tsim nyog’ los tsis tsim nyog.
Muaj ntau zaus nyob hauv peb lub neej, mas peb kuj ua me ntsis zoo li cov Fas Lis Xais; peb muab neeg txoj cai los yog tej kev cai los saib nruj dhau, peb tsis nco qab nsia txog tej yam tob tob zais nyob hauv cov cai ntawd.
Muaj ib tug Txiv Plig piav tias muaj ib hnub nws mus ua lub Txoos Teev Ntuj rau cov ntseeg nyob hauv ib lub tsev teev Ntuj. Hnub ntawd yog Hnub Xya ces lawv ua lub Txoos Teev Ntuj raws li ua kam hauv cov hnub, tab sis muaj ib yim neeg yuav sawv kev mus txawv teb chaws; lawv mus mas yuav ua rau lawv tsis tau koom ua lub Txoos Teev Ntuj nyob hauv Hnub Chiv ces lawv los hais rau tus Txiv Plig, thov kom Txiv Plig muab lub Txoos cov ntseeg tab tom ua ntawd hloov los ua lub Txoos Teev Ntuj hauv Hnub Chiv. Lawv hais tias “Peb tsis xav ntxuam Thaj Txi Ntuj nyob hauv Hnub Chiv.”
Qhov no yog ib tug piv txwv hais txog cov neeg coj Txoj Cai nruj dhau. Qhov lawv tsis xav ntxuam lub Txoos Teev Ntuj hauv Hnub Chiv mas yog ib yam zoo kawg, tab sis lawv txhob muab los khi lawv tias lawv tsum teev Ntuj mloog Tswv Ntuj Lo Lus hauv Hnub Chiv xwb.
Txoj cai tsis yog ib txog saw hlau tshwj cia khi peb, tab sis txoj cai yog ib rab twj pab peb kom nyiam Tswv Ntuj!
Muaj ib tus neeg tuaj thov kev pab ntawm ob tus neeg; ib tug hais tias “Hnub no yog Hnub Chiv mas kuv yuav mus teev Ntuj, kuv tsis ua lwm yam”, ces nws tsis pab tus neeg tuaj thov. Ib tug hais tias “Hnub no yog Hnub Chiv mas kuv yuav mus teev Ntuj tab sis yog koj muaj hauj lwm tseem ceeb kom kuv pab koj, mas tsis ua cas cia kuv pab koj es tag kis kuv mam mus teev Ntuj los sis lis piam tom ntej kuv mam mus los tsis lig.”
Nej xav, saib ob tus neeg no Huab Tais Tswv Ntuj yuav nyiam tus twg dua.
Kwv tij, Huab Tais Yes Xus xav kom cov Yus Das muab hnub xas npas tos saib ua hnub tshwj cia nyiam thiab hlub lwm tus. Hnub no Huab Tais Yes Xus tsis xav kom peb muab cov txoj cai tsis hais Tswv Ntuj Txoj Cai los haiv neeg txoj cai saib ua qhov loj. Huab Tais Yes Xus xav kom peb muab ‘lub siab nyiam thiab hlub’ saib yog qhov loj dua cov npe ntawv sau nyob hauv cov txoj cai, mas peb thiaj yuav ua tau xis Tswv Ntuj siab, ces nyob hauv tsab ntawv xa mus rau cov Hes Nplaws, peb thiaj pom muaj cov lus sau li no tias Tswv Ntuj tsis yog ib tug siab nkhaus. Tswv Ntuj nco ntsoov tej yam nej ua, Tswv Ntuj nco ntsoov nej txoj kev nyiam nws lub npe thiab pab cov ntshiab. Peb tsuas xav kom nej txhua leej muaj lub siab kub mus li kom txoj kev tso siab nyob ruaj mus txog hnub kawg xwb. Peb tsis xav kom nej ua ib co neeg qaug zog. Peb xav kom nej yoog cov uas lawv ntseeg thiab lawv lub siab ruaj xwm yeem, vim lawv tau txais Tswv Ntuj lo lus cog. Nyob zoo sawv daws.
