ZAJ NYEEM HNUB TIM 22 LUB 8 HLI 2025
HNUB NCO TXOG NIAM MAB LIAB UA POJ VAJ
COV LUS NYOB HAUV MAS TAIS NTAWV MOO ZOO (MT 22: 34-40)
Kwv tij Hmoob sawv daws, hnub no peb cov neeg ntseeg hauv lub Koom Txoos Kav Tos Liv yuav nco txog niam Mab Liab ua Poj Huab Tais. Tos peb saib niam Mab Liab ua Poj Huab Tais vim tias peb ntseeg tias Mab Liab yug los tsis muaj txhaum, nws yog ib tug nkauj ntshiab thiab Huab Tais Tswv Ntuj tau npo nws lub cev thiab nws tus plig mus nyob saum ntuj lawm.
Kwv tij Hmoob sawv daws, lub Moo Zoo hais tias cov Fas Lis Xais xa ib tug kws lij choj tuaj sim Huab Tais Yes Xus saib Huab Tais Yes Xus paub Txoj Cai npaum li cas, Huab Tais Yes Xus thiaj hais lus ua rau cov Xas Dus Kais tws lus tau. Tus kws lij choj nug tias tas nrho cov lo lus qhia hauv Txoj Cai mas lo lus twg loj tshaj, ces Huab Tais Yes Xus thiaj teb nws cov lus tias muaj 2 lo lus loj dua cov yog lo lus tias ‘Koj yuav muab tas koj lub siab, tas koj tus ntsuj plig, tas koj lub tswv yim los nyiam koj tus Huab Tais Tswv Ntuj. Koj yuav nyiam tus nyob ze koj ib yam nkaus li koj nyiam koj’. Ob lo lus no muab hais kom luv luv mas yog ‘nyiam Huab Tais Tswv Ntuj’ thiab ‘nyiam lwm tus’.
Kwv tij Hmoob sawv daws, cov Fas Lis Xais yog cov neeg kub siab coj Mais Xes txoj cai, ntawm cov Xas Dus Kais mas lawv yog cov nom thiab cov Leej Choj tswj kev teev hawm Tswv Ntuj nyob hauv lub Tuam Tsev Teev Ntuj.
Cov Fas Lis Xais thiab cov Xas Dus Kais yog cov muaj kev kawm, ces lawv thiaj yog cov Kws Ntawv Ntshiab, tab sis lawv txoj kev ntseeg tsis sib xws, yog li mas cov Fas Lis Xais thiab cov Xas Dus Kais thiaj nyiam muaj lus sib cav ntau txog lawv zaj ntseeg.
Hnub no cov Fas Lis Xais xav tias yog lawv ua kom Huab Tais Yes Xus tws lus, mas yog lawv tau yeej cov Xas Dus Kais lawm vim cov Xas Dus Kais twb swb rau Huab Tais Yes Xus lawm.
Kwv tij, cov Fas Lis Xais thiab cov Xas Dus Kais xav zoo li ntawd, ces lawv thiaj tsuas paub txoj kev ntseeg xwb, lawv tsis to taub txog qhov lawv ntseeg; lawv nyias xav kom nyias tog yeej, lawv tsis yog sib cav kom nkag siab txog qhov lawv ntseeg.
Hnub no Huab Tais Yes Xus cov lus teb thiaj ua rau tej tus Fas Lis Xais thiab Xas Dus Kais pom tias yav tas los lawv yuam kev loj. Lawv paub txoj cai tab sis lawv tsis to taub txoj cai, mas lawv thiaj tsis txawj sib nyiam thiab sib haum. Hos Huab Tais Yes Xus tsis yog paub Txoj Cai xwb, Huab Tais Yes Xus tseem to taub Txoj Cai thiab ua raws li Txoj Cai qhia; yog kom nyiam Tswv Ntuj thiab hlub lwm tus.
Kwv tij Hmoob, peb cov ntseeg txog Yes Xus, mas tsis yog peb yuav tsum ‘paub’ peb txoj kev ntseeg xwb; tab sis peb tsum ‘to taub’ qhov peb ntseeg thiab, mas peb thiaj yuav ua tau raws li peb txoj kev ntseeg.
Hais txog lo lus tias ‘Koj yuav muab tas koj lub siab, tas koj tus ntsuj plig, tas koj lub tswv yim los nyiam koj tus Huab Tais Tswv Ntuj. Koj yuav nyiam tus nyob ze koj ib yam nkaus li koj nyiam koj’, mas yog lo lus qhia uas peb cov neeg ntseeg txog Yes Xus yuav khaws coj mus ua raws.
Peb cov neeg ntseeg coob leej hais tias lawv nyiam Huab Tais Tswv Ntuj tab sis lawv muab siab dai ncuv rau lwm yam; xws li nyiaj txiag, hauj lwm, lub xov tooj, dej caw, kev ua si; mas lawv puas yog nyiam Huab Tais Tswv Ntuj tiag?
Lawv hais tias lawv nyiam Huab Tais Tswv Ntuj, tab sis lawv tsis qab siab thov Ntuj, tsis kub siab mus koom lub Txoos Txi Ntuj; mas puas yog lawv nyiam Huab Tais Tswv Ntuj tiag”
Lawv hais tias lawv nyiam Huab Tais Tswv Ntuj, tab sis thaum lawv muaj mob los yog ntxhov siab, lawv tseem mus saib hmoov saib yaig, lawv tseem mus rau luag tej ua khawv koob; mas lawv puas nyiam Huab Tais Tswv Ntuj tiag?
Lo lus tias ‘Koj yuav nyiam tus nyob ze koj ib yam nkaus li koj nyiam koj’, mas leej twg yog tus nyob ze peb?
Puas yog peb niam peb txiv?
Puas yog peb tsev neeg?
Puas yog peb cov kwv tij?
Puas yog peb cov phooj ywg?
Los puas yog peb cov yeeb ncuab?
Tus nyob ze peb yog txhua tus neeg nyob hauv lub qab ntuj no, tsis hais tus peb ntsib nyob hauv peb lub neej, los tus peb tsis tau pom dua ib zaug.
Peb nyiam peb zoo li cas mas peb kuj yuav nyiam sawv daws zoo li ntawd.
Muab hais mas ntshai yog ib yam to taub tsis yooj yim. Tab sis muab piv li no;
Lub Koom Txoos kom peb pab thov Ntuj rau tus neeg mob, mas peb puas thov?
Muaj ib tug neeg tso lub ntiaj teb no tseg, peb puas mus thov Ntuj rau nws?
Peb hnov lub moo tias muaj tej tus neeg ntsib xwv txheej txom nyem, peb puas pab tus neeg ntawd?
Peb pom tej tus neeg tsis muaj xws li peb, peb puas pub yam peb muaj rau nws?
Kwv tij Hmoob sawv daws, tsis yooj yim kiag li, tab sis peb yuav thov Tswv Ntuj pab thiab xyaum hloov peb lub siab lub tswv yim kom dai ncuv rau 2 lo lus qhia no.
‘Koj yuav muab tas koj lub siab, tas koj tus ntsuj plig, tas koj lub tswv yim los nyiam koj tus Huab Tais Tswv Ntuj. Koj yuav nyiam tus nyob ze koj ib yam nkaus li koj nyiam koj’.
Tshwj xeeb, hnub no peb nco txog niam Mab Liab ua Poj Huab Tais nyob ntawm nws Leej Tub peb tus Huab Tais Yes Xus Pleev ib sab, mas peb yuav vam txog niam Mab Liab pab nrog thov Ntuj rau peb, thov kom Huab Tais Leej Txiv pub nws lub txiaj ntsim rau peb kom yoog tau raws niam Mab Liab tus piv txwv nyiam Tswv Ntuj thiab nyiam lwm tus.
Nyob zoo sawv daws.
