ZAJ NYEEM HNUB TIM 24 LUB 6 HLI 2025
HNUB HWM ZAM NTXUAV PLIG YUG LOS
COV LUS NYOB HAUV LUS KAS NTAWV MOO ZOO (LK 1: 57-66, 80)
Kwv tij Hmoob sawv daws, hnub no Koom Txoos Kav Tos Liv tshwj cia ua hnub hwm tus Ntxuav Plig Zam hnub yug. Lub Moo Zoo thiaj hais txog thaum Zam yug los. Leej Ntshiab Lus Kas sau tias Zam yog Ntxas Kas Lias thiab Es Lis Xas Npes tus tub. Ntxas Kas Lias yog ib tug Leej Choj, nws thiab tus poj niam tsis muaj me nyuam. Txawm li ntawd, los nkawd yog neeg ncaj thiab ua neej raws nraim Huab Tais cov lus qhia. Muaj ib hnub, Ntxas Kas Lias ua tus hlawv xyab hauv Kem Tsev Ntshiab hauv lub Tuam Tsev Teev Ntuj. Lub caij hlawv xyab tas, Tswv Ntuj tus Tshiab tawm tuaj rau Ntxas Kas Lias pom thiab hais rau nws tias Tswv Ntuj yuav pub ib tug tub rau nws, kom nws muab tis npe hu ua ‘Zam’.
Tus Tshiab qhia ntxiv tias Zam yuav yog ib tug loj nyob ntawm Huab Tais xub ntiag. Nws yuav tsis haus kua txiv cawv, tsis haus cawv ntsim. Leej Ntuj Plig Ntshiab yuav nyob puv hauv nws. Nws yuav coj coob leej tub His Xas Lais rov los rau Huab Tais Tswv Ntuj. Zam yuav taug kev mus ntawm Huab Tais hauv ntej. Nws yuav tau Es Lias lub tswv yim thiab lub hwj huam, kom nws coj cov ua txiv lub siab rov los rau lawv cov me nyuam, coj cov neeg qig lus rov los taug cov neeg ncaj txoj kev thoob tsib. Nws yuav npaj ib haiv neeg qhib siab lug tos Huab Tais.
Ntxas Kas Lias hnov tus Tshiab cov lus, mas nws tsis tshua xav ntseeg, vim nws thiab tus poj niam twb laus laus lawm. Ces Tswv Ntuj thiaj ua kom Ntxas Kas Lias hais tsis taus lus mus txog hnub tus me nyuam yug.
Thaum tas Ntxas Kas Lias lub sij hawm leg kab xwm Leej Choj lawm, ces nws rov mus tsev. Tsis ntev tom qab, Ntxas Kas Lias poj niam Es Lis Xas Npes xeeb tub. Thaum yug tus tub, mas nkawd thiaj muab tis npe hu ua Zam raws li tus Tshiab qhia.
Leej Ntuj Plig Ntshiab los nyob puv hauv Ntxas Kas Lias, ces nws ua Yaj Saub hais txog Zam lub neej tias luag yuav hu Zam ua Tswv Ntuj tus Yaj Saub. Zam yuav mus tom Huab Tais hauv ntej, Zam yuav npaj Huab Tais txoj kev. Zam yuav qhia Huab Tais haiv neeg paub txoj kev cawm uas tawm ntawm txoj kev zam txhaum los.
Nyob hauv Mas Tais, Mas Kos, Lus Kas, thiab Zam cov phau Ntawv Moo Zoo kuj tau piav txog Zam cov lus qhuab qhia cov Yus Das kom hloov siab tshiab thiab ua kab ke ntxuav lawv raws nraim li cov lus Ntxas Kas Lias tau ua Yaj Saub hais tseg.
Kwv tij, vim Zam yog tus Tswv Ntuj xa tuaj npaj txoj kev rau Huab Tais Yes Xus, Zam tsis yog yug ntawm ntiaj teb cev nqaij los, yog Leej Ntuj Plig Ntshiab ua kom Zam yug los, Zam thiaj yog ib tug tuaj tawm Tswv Ntuj tuaj xws li niam Mab Liab thiab Huab Tais Yes Xus. Lub Koom Txoos saib hnub Zam yug yog ib hnub loj vim tias hnub Zam yug hnub Huab Tais Tswv Ntuj lub siab khuv leej neeg tawm tuaj rau lub qab ntuj pom, raws li thaud Huab Tais Tswv Ntuj tau cog lus rau ntiaj teb neeg tias muaj ib hnub Huab Tais Tswv Ntuj yuav xa ib tug tuaj cawm lub qab ntuj.
Kwv tij, yog peb muab Ntxas Kas Lias, Es Lis Xas Npes, thiab Zam lub npe los txhais ua lus Hmoob mas peb yuav pom txog qhov hais los no.
Ntxas Kas Lias txhais tau tias ‘Huab Tais nco txog’. Es Lis Xas Npes txhais tias ‘Kuv tus Tswv Ntuj tau hais tseg’. Thiab Zam lub npe txhais tias ‘Huab Tais yog tus khuv leej neeg’.
Yog li thiaj hais tau tias Huab Tais Tswv Ntuj nco txog cov lus nws tau cog tseg tias nws yuav khuv leej neeg ntiaj teb.
Yog li hnub yug Zam thiaj yog hnub Huab Tais Tswv Ntuj tau nco txog nws cov lus, ces nws thiaj cia Zam ua ib lub cim tawm tuaj rau ntiaj teb neeg pom tias txog lub caij Tswv Ntuj teem tias yuav tso tus tuaj cawm ntiaj teb neeg lawm.
Li ntawd, hnub no peb ua kab ke teev Ntuj hwm Zam yug los, lub ntsiab thiaj yog peb tab tom cav txog Huab Tais Tswv Ntuj qhib nws lub siab khuv leej neeg rau peb pom.
Huab Tais Tswv Ntuj khuv leej neeg, nws thiaj xa Leej Tub tuaj yug ua neeg; yog Huab Tais Yes Xus, kom tau cawm peb.
Hnub no, peb thiaj zoo siab thiab ua Tswv Ntuj tsaug.
Nyob zoo sawv daws.
