Zaj nyeem hnub tim 7 lub 5 hlis 2026
Hnub Tsib, Lis Piam 5 caij Hla
Cov lus nyob hauv Zam Ntawv Moo Zoo (Z 15: 9-11)
Kwv tij sawv daws, hnub no, yog hnub peb hwm txog Leej Ntshiab Mas Thias, uas yog tus Hauv Xa Lus nyob rau Yes Xus pab 12 leeg thwj tim, uas Tswv Ntuj tau xaiv nws los hloov Yus Das Kas Lis Yaus chaw.
Kwv tij sawv daws, Tswv Ntuj txoj hauj lwm yuav tshwm sim tuaj zoo li cas, mas peb yuav paub tsis tau, tiam sis, thov kom peb ntseeg tias, txhua txhia yam uas Tswv Ntuj qhia peb thiab nws txib kom peb ua, puav leej zoo tas nrho thiab muaj txiaj ntsim tas huv si.
Thov kom peb tso siab rau Huab Tais Yes Xus cov lus, vim nws yog txoj hmab rau peb tuav thiab yuav taug mus cuag tau peb tus Tswv Ntuj.
Huab Tais tau xaiv peb los ua nws cov me nyuam, zoo yam li nws tau xaiv Leej Ntshiab Mas Thias los nyob hauv pab 12 leeg Hauv Paus Xa Lus, mas peb yuav zoo siab, thiab peb yuav tsum txuag peb tus kheej kom phim peb yog Tswv Ntuj ib tug me nyuam zoo nyiam. Yog peb tsis txuag peb tus kheej, peb coj lub neej ua ywj peb siab, thiab peb tsis coj Tswv Ntuj txoj lus los nyob hauv peb lub neej, mas qhov kawg yam phem yam tsis zoo yuav chaws tau los hauv peb siab thiab coj peb ncaim ntawm Tswv Ntuj.
Li ntawd, kev teev Ntuj thiab txais cov Cim Ntshiab uas Huab Tais Yes Xus pub rau peb thiaj yog qhov pab txhawb peb sab ntsuj plig kom peb taug nraim Tswv Ntuj txoj hauv kev, thiab ua Tswv Ntuj ib tug me nyuam zoo, nyob rauv txoj kev nyiam kev hlub. Ces peb thiaj yuav loj hlob tuaj nyob rau hauv peb txoj kev ntseeg Ntuj tau.
Nyob zoo.
