ZAJ NYEM HNUB TIM 8 LUB 3 HLIS 2025
HNUB NCO TXOG LEEJ NTSHIAB ZAM NYIAM TSWV NTUJ
(HX 58:9-14; LK 5:27-32)
Kwv tij Hmoob, hnub no peb hnov lub Moo Zoo hais txog Huab Tais Yes Xus hu Les Vis. Peb pom tias Les Vis hnov Huab Tais Yes Xus hu mas nws tso tas ib puas tsav yam tseg ces nws raws Huab Tais Yes Xus mus; nws ua Huab Tais Yes Xus thwj tim. Les Vis tseem qhib tsev txais Huab Tais Yes Xus los so hauv nws tsev thiab. Les Vis yog ib tug piv txwv rau peb pom tias lub caij Plaub Caug no peb yuav ua li cas thiaj yog tseem thwj tim tiag, thiab yog peb txiav siab raws Huab Tais Yes Xus lawm mas peb tau tus dab tsi.
Les Vis ua txoj hauj lwm sau se uas yog ib txog hauj lwm cov Yus Das saib tias yog hauj lwm txhaum rau Tswv Ntuj. Cov Yus Das ntsia cov neeg sau se yog neeg muaj txhaum, yog neeg lwg pej xeem noj haus, yog neeg tsob hwb pej kum teb, yog neeg ntxeev siab rau haiv Yus Das.
Les Vis paub tias nws yog neeg txhaum, ces thaum nws hnov Huab Tais Yes Xus lub suab hu mas nws tso pluav txoj kev ua txhaum pov tseg mus txais txoj sia tshiab.
Les Vis xav kom nws cov phooj ywg nyob hauv txoj kev txhaum tau ntsib thiab paub Huab Tais Yes Xus tus npo nws hauv kev txhaum mas nws thiaj caw Huab Tais Yes Xus mus noj mov hauv nws tsev, nws caw cov phooj ywg sau se tuaj koom rooj qav.
Cov Yus Das lawv tsis fim cov neeg muaj txhaum, lawv tsis koom nrog cov neeg txhaum noj mov ua ke vim lawv ntshai tsam lawv kis cov txhaum ntawm cov neeg txhaum, tab sis tsis yog Huab Tais Yes Xus. Huab Tais Yes Xus zoo siab nyob nrog cov neeg txhaum, kom tau pab cawm cov neeg txhaum.
Kwv tij Hmoob sawv daws, peb rov los saib ntawm Les Vis mas ntshai thaum nws hnov Huab Tais Yes Xus hais tias “Koj raws kuv mus” mas ntshai nws ceeb hlo thiab xav tuaj nruab siab tias “Ab! Ua cas tus Xib Hwb Yes Xus hu tus neeg muaj txhaum li kuv kom mus ua nws thwj tim ne.” Thaum nws caw Huab Tais Yes Xus mus noj mov tom nws tsev mas ntshai nws kuj xav tias “Uag! Ua cas Xib Hwb Yes Xus yuav hlub thiab saib taus kuv ua luaj no, nws thiaj mloog tus neeg muaj txhaum li kuv no lo lus caw.”
Ntshai Les Vis xav li ntawd mas nws zoo siab hlo tso txhua yam tseg, nws hloov lub siab tshiab tso kev txhaum rau tom qab.
Zaj no ua rau nco txog Huab Tais Yes Xus zaj paj lug hais txog tus neeg nrhiav tau lub hub nyiaj faus hauv daim teb, ces nws muag lub cuab tam kom tau nyiaj mus muas daim teb muaj hub nyiaj faus cia ntawd. Les Vis nrhiav tau qhov zoo tshaj rau nws lawm tiag.
Kwv tij, peb sim muab peb piv rau Les Vis; peb yog ib tug neeg muaj txhaum, yog ib tug neeg xav tig los ua dua lub neej tshiab tab sis peb tsis pom qab yuav ua li cas, ces peb cia li hnov Huab Tais Yes Xus hu tias “Koj los ntseeg txog kuv” thiab hais rau peb tias “Kuv xav mus hauv koj tsev” mas ntshai peb yuav zoo siab npaum cas.
Yog peb xav muaj kev zoo siab xws li Les Vis mas peb txhob kaw peb lub siab rau Huab Tais Yes Xus, peb txhob npog pob ntseg kom tsis tau hnov Huab Tais Yes Xus lub suab hais lus rau peb. Peb kav tsij txiav siab tso lub neej qub tseg, txiav siab raws Huab Tais Yes Xus, txhob txaj muag hais rau Huab Tais Yes Xus tias “Huab Tais, hnub no thov koj los so hauv kuv tsev, los koom rooj qav nrog kuv os.”
Huab Tais Yes Xus tau hais tseg tias tus txais ib tug me me hauv nws tsoom kwv mas yog txais nws ntag, yog li mas tsis yog peb yuav hais cov lus ntawd rau Huab Tais Yes Xus xwb, peb tseem yuav hais rau cov neeg nyob ncig peb thiab tias “Me phooj ywg, koj los so hauv kuv tsev mas, koj los nrog kuv noj mov ua ke os.”
