Kev pab ntawm cov neeg ntseeg Kav Tos Liv tseem muaj txhab ntxiv, vim muaj neeg tuag los ntawm av qeeg nyob Mias Mas teb coob.

Kev pab ntawm cov neeg ntseeg Kav Tos Liv tseem muaj txhab ntxiv, vim muaj neeg tuag los ntawm av qeeg nyob Mias Mas teb coob.   

Lub Koom Txoos nyob As Xias tau thov kom sawv daws xa kev pab, mus cov neeg raug av qeeg nyob nruab nrab hauv Mias Mas teb, vim muaj kev piam sij dav kawg. Raws li tus zauv tshaj tawm kawg nkaus ntawm cov tseem hwv Mias Mas, mas cov neeg tuag yog 3,145 leeg. Hos cov raug mob yog 4,589 leeg thiab muaj cov ploj lawm nrhiav tsis tau yog 221 leeg. Cov tub tshawb nrhiav neeg tuag tab tom muab siab rau nrhiav tsis tu ncua. Lub Koom Haum tib neeg kev ncaj ncees kuj muab siab rau nrhiav tshuaj kho mob thiab tsev ntaub mus pab cov pej xeem uas raug kev kub ntxhov.

Hais txog Thaib teb, mas Vas Tis Kas tus tiam lis tau thov kom cov neeg ntseeg sib pab tej yam cheem tsum mus rau cov tau txais kev kub ntxhov thiab.

Kev pab cuam yuav xa mus rau tus tiam lis nyob Bangkok, txij hnub tim 3 mus txog hnub tim 10 lub 4 hlis. Lub sij hawm txais tos kev pab cuam yog 9 teev sawv ntxov mus txog 4 teev tsaus ntuj.     

Tej yam yuav xa mus pab, yog tsev ntaub, pam vov chaw pua, hnab pw, tshuaj txhuam hniav, xab npus, ntaub roj hmab, txhiam xws noj, tshuaj, thoob rau dej haus, vij tsam, tswm ciab thiab teeb hluav taws xob uas yog siv phiaj ziab tshav ntuj.

Yog muaj dab tsi xav paub ntxiv, mas nug tau ntawm Vaj Qhia tus tiam lis nyob Thaib teb, lub sij hawm ua hauj lwm.