Cov neeg ntseeg nyob Seoul, ua hmoov tsuj xeeb txwm 50 xyoo hauv kev txhawb nqa kev ua hauj lwm.

Cov neeg ntseeg nyob Seoul, ua hmoov tsuj xeeb txwm 50 xyoo hauv kev txhawb nqa kev ua hauj lwm.

Hnub Tsib hauv lub lis piam tag los, lub Koom Haum txhawb nqa kev ua hauj lwm hauv lub Cheeb Koom Txoos Xes Us (Seoul) ua hmoov tsuj xeeb txwm 50 xyoo.

Lub thaj txi Ntuj ua Tswv Ntuj tsaug yog ua nyob hauv lub tuam tsev teev Ntuj Myeongdong. Lub thaj txi Ntuj yog pib thaum 14.00 teev yav hnub qaij.

Muaj tus Tswv Qhia Peter Soon-taick Chung ua tus coj lub Txoos. Muaj cov Txiv Plig thiab cov neeg ntseeg ze 100 leej uas lawv muab tus kheej los txhawb nqa kev ua hauj lwm tuaj koom. Lub Koom Haum no teeb tsa hnub tim 17 lub 4 hlis xyoo 1975, yog pib los ntawm cov Txiv Plig kev txhawb nqa. Yog lub Koom Haum me me uas pib los ntawm cov Txiv Plig thiab 15 tus poj niam neeg ntseeg. Lawv tau txais kev taw qhia los ntawm Txiv Plig Kim Deok-jae uas tuag mus lawm.    

Lub Koom Haum hloov dua npe tshiab kom raug cai hu ua : “Lub Koom Haum txhawb nqa kev ua hauj lwm”, hauv lub 10 hli xyoo 1977. Thiab txij ntawd los yog lub Cheeb Koom Txoos Xes Us ua tus saib xyuas. Rov xav txog qhov pib ntawm lub Koom Haum, Tswv Qhia Chung piav tias : “Lub Koom Haum yog pib nyob hauv hnub tim 17 lub 4 hlis 1975. Muaj cov Txiv Plig thiab 15 tus neeg poj niam neeg ntseeg ua cov pib txoj hauj lwm no, nyob hauv lub Cheeb Koom Txoos Xes Us.”