Kev tsuj xeeb nyob Chiangmai, coj tus tub tshaj Ntuj Lus PIME rov los rau nws qhov chaw pib.

Cov kab ke tsuj
xeeb lub lis piam tag los ntawm tus Tswv Qhia tshiab nyob Chiangmai, yog lub caij
rov los tsev thiab rov pib dua tshiab ntawm nws. Hnub tim 29 lub 7 hli tag los, muaj
ntau txhiab tus neeg ntseeg tuaj sib sau ua ke nyob hauv lub tsev teev Ntuj hwm Yes
Xus lub Siab, kom tau ua cov kab ke tsa Txiv Plig Peter Suphot Roeksujarit ua Tswv
Qhia tshiab kav lub Cheeb Koom Txoos Chiangmai.
Hnub tim 30 lub 7 hli thaum sawv ntxov, Tswv Qhia Peter Suphot tau ua lub thaj txi
Ntuj tsa nws ua Tswv Qhia raug cai los txais txoj hauj lwm ua Tswv Qhia nyob hauv lub
tsev teev Ntuj thiab yog kev pib kav lub Cheeb Koom Txoos ntawm nws. Hauv cov neeg
uas tuaj koom ntawd, kuj muaj cov tim xyoob tshaj Ntuj lus ntawm lub Koom Haum
txawv teb chaws hauv Vaj Qhia los yog PIME, tau ua kev zoo siab nyob hauv
Facebook. Yog lub Koom Haum tshaj Ntuj lus ntawm Vaj Qhia MISSIO AD GENTES.
“Kuv lub siab xav txog Tswv Qhia cov lus tias : ‘Caritas Omnia Cordis Unit- kev
nyiam kev hlub yog sawv daws qhov chaw sib sau siab.’ Tswv Qhia sau tias :
“Lo lus no ua rau kuv xav txog kuv txoj kev pib ua nyob Thaib teb. Tswv Qhia piav
txog thawj xyoo nyob Chiangmai uas nws tseem yog ib tug tub tshaj Ntuj Lus PIME
hluas hluas. Nws txoj hauj lwm yog kawm ntawv Thaib xws li lwm tus tub tshaj Ntuj
Lus. Nws hais tias : “Kuv yuav tsum kawm kom paub txhua lo lus thiab lub ntsia ntawm
xeem lus tshiab, tab sis kuj yuav tsum kawm xeem lus ntawm tib neeg lub siab thiab.”
Cov hnub ntawd qhia kuv tias ; kev sib tham tseeb tiag yog pib hauv kev muab siab rau
mloog, kev ua neeg me, kev ua siab ntev thiab kev nyiam kev hlub. Thaum rov los rau
kev tsuj xeeb zaum loj no, nws hais tias nws nco tau tias ; kev kawm ntawm nws tsuas
yog qhov pib xwb. Xeem lus tseem ceeb uas cov tub tshaj Ntuj Lus yuav tsum hais, yog
xeem lus ntawm kev nyiam kev hlub.

Kev nyiam kev hlub yog tus choj tuam nyob hauv cov lus uas hais tsis txaus. Kev nyiam
kev hlub yog qhov sau tas ib tsoom neeg hauv tej kab lis kev cai, hauv xeem lus thiab
hauv tej kev cai sib txawv kom los nyob ua ke hauv Leej Pleev tsev neeg.
Hauv kev ua ib tug Tswv Qhia mas nws xam pom tias : kev txais lub Cim Tiag Tes ua
Tswv Qhia ntawd muaj txiaj ntsim qab hau dua qhov raug tsa ua tus coj lub Cheeb
Koom Txoos tshiab. Nws hais txog Vas Tis Kas Ob cov lus qhuab qhia, nws nco ntsoov
tias Tswv Qhia yog tus theej cov Thwj Tim tej hauj lwm mus rau luag tej, qhuab qhia
thiab tswj hwm raws Lumen Gentium tsab cai uas lub Koom Txoos teeb tsa. Tswv
Qhia yog lub hauv paus thiab yog tus cag ntsia tsis pom hauv kev sib luag nyob hauv
lub Koom Txoos. Vas Tis Kas tsab cai Christus Dominus tseem hais ntxiv tias :
“Tswv Qhia yog tus tswv zov yaj raws Yes Xus lub siab. Raug hu kom ua tub txib, tsis
yog txais lub koom meej, tab sis kom tau txais kev cawm ntawm fab ntsuj plig hauv kev
ua neeg me thiab kev khuv leej hauv kev tshaj lub Moo Zoo.”
Hais txog Tswv Qhia Peter Suphot, mas cov hauj lwm no yuav tshwm sim nyob hauv
lub Cheeb Koom Txoos uas muaj ntau yam kab lis kev cai nyob Thaib teb. Lub Cheeb
Koom Txoos Chiangmai kav tas Thaib qaum teb, thiab yog qhov chaw cov neeg
Thai Lanna thiab txhua haiv neeg tsawg nyob coob. Nws muaj ntau xeem lus thiab
nyias muaj nyias tej kab lis kev cai. Tswv Qhia Peter Suphot xaiv ‘Caritas Omnia
Cordis Unit- kev nyiam kev hlub uas sau tas neeg txhua lub siab, yog lo lus nyob rawv
hauv nws nruab siab. Nws hais tias : “Kev muaj ntau yam sib txawv yog qhov paj tshab
uas qhia kom txawj sib hwm thiab txhawb nqa kev mus kev ua ke.”

Kev hu kom ua tus tub tshaj Ntuj Lus uas tau txais kev txhim kho.
Tus Txiv Plig ntawm PIME hais tias : “Kev tsuj xeeb zaum no tau txhim kho lub suab
hu kom nws ua tub tshaj Ntuj Lus.” Nws hais tias : “Peb cov hauj lwm tsis yog tias hla
dhau ciam teb xwb, tab sis yog kev hla dhau ciam hauv tib neeg lub siab.”
Tsis hais peb yuav raug xa mus qhov twg kuj xij, peb raug hu kom ua qhov pov thawj
ciaj sia tias lub Moo Zoo raug tshaj tawm meej tseeb nyob hauv peb tej kev ua hauv
kev nyiam kev hlub, kev khuv leej thiab kev sib koom siab.

Nws xaus cov lus hauv kev thov Ntuj tias ; thov kom kev ua hauj lwm ntawm Tswv
Qhia Peter Suphot, yog tus piv txwm ntawm lo lus uas nyob nraim hauv nws. Thov
kom kev ua hauj lwm ntawm Tswv Qhia Peter Suphot uas yog Caritas Omnia
Cordis Unit ua tus coj, yog pov thawj ciaj sia tias ; kev nyiam kev hlub yog lub zog sau
tas lub Koom Txoos thiab kho lub ntiaj teb. Thov kom nws sau tas cov neeg ntseeg los
ua ib tse neeg nyob hauv Yes Xus Pleev. Ua kom pom txog tus Zoo Tswv Zov Yaj, tus
muab nws txoj sia los txhiv nws pab yaj. Caritas Omnia Cordis Unit thov kom tas
txhua yam no tsis yog tias ; yog lo lus ntawm Tswv Qhia xwb, tab sis yog cov hauj lwm
niaj hnub ntawm peb txhua leej txhua tus thiab.