Lub Koom Txoos nyob Is Ntos Nes Xias qhib kev pab thoob teb chaws, tom qab av qeeg muaj ceem hauv lub pov txwv Flores.
Tom qab av qeeg tshaj 7 Richter nyob hauv lub pov txwv Flores nyob Is Ntos Nes Xias teb. Ua rau neeg tuag 53 leeg thiab tsoom pej xeem ntau txhiab leej yuav tsum khiav tawm hauv lawv tej vaj tse mus.
Lub Koom Haum saib xyuas kev piam sij nyob Is Ntos Nes Xias teb (BNPB) tshaj tias ; muaj neeg tuag 53 leeg thiab raug mob 135 leeg hauv hnub tim 16 lub 8 hli. Av qeeg hnub tim 15 lub 8 hli no thiab muaj av co ua zog koog li ntawm 1,000 zaug. Hauv qee thaj tsam hluav taws xob thiab kev sib txuas lus los yog kev siv xov tooj raug txiav tu tas. Kav Tos Liv lub Koom Haum Caritas tab tom txuas lus nrog lub Cheeb Koom Txoos Ruteng, Labuan Bajo, Kupang, Maumere thiab Ende kom tau soj ntsuam txog kev piam sij, kev pab cov neeg raug xwv txheej thiab muab kev pab sai sai hauv kev ua hauj lwm. Ib lub Cheeb Koom Txoos ib txog kev pab. Lub Koom Txoos Kav Tos Liv tau sau kev pab hauv cov Cheeb Koom Txoos, hauv cov tsev teev Ntuj, hauv pab neeg Caritas thiab cov tub ua hauj lwm nyob hauv lub nroog Ruteng. Lub Koom Haum Caritas tau pab cov neeg raug xwv txheej, cov raug mob ntawm lub tsev kho mob thiab rub cov tsev ntaub tos txais neeg. Ua ke ntawd av tseem ua zog koog ua ntu zus thiab. Kev soj ntsuam ua ntej mas yog xav tau kev pab cuam sai fab dej haus, txhiam xws noj, chaw nyob chaw pw, tsev plob thiab kev kho mob. Tshwj xeeb tshaj yog cov neeg pluag txom nyem. BNPB hais txog kev piam sij ntawm tej vaj tse yog 914 lub, tsev kawm ntawv yog 93 lub, tsev kho mob 36 lub thiab tseem hwv cov tsev ua hauj lwm 38 lub. Av qeeg yog thaum tseem tab tom ua thaj txi Ntuj hwm Niam Mab Liab nce mus saum Ntuj. Txiv Plig Galvani ntawm lub Koom Haum Camillian hais rau tsab ntawv xov xwm Fides tias : “Thaum av tab tom qeeg muaj ceem, mas Txiv Plig thiab cov neeg ntseeg sib tw khiav tawm hauv tsev teev Ntuj mus. Lub ru tsev teev Ntuj vau los yuav luag tsuam lub thaj txi Ntuj. Kev ceeb toom hais txog Xws Nas Mib tseem ua kom cov neeg nyob raws ntug dej hiav txwv kav tsij khiav mus rau tej qhov chaw siab ua ntej yuav tsis muaj lus ceeb toom ntxiv. Tab txawm yuav muaj kev piam sij thiab av qeeg ua ntu zus, tsis kav Txiv Plig Galvani hais tias :
“Hnub hwm Niam Mab Liab nce mus saum Ntuj, yog hnub muaj kev ntshai thiab kev tsis ruaj khov, tab sis kev ntseeg thiab kev cia siab ntawm ib tsoom neeg tseem muaj.”
Nws thov kom sawv daws sib koom siab thov Ntuj pub rau cov neeg raug xwm txheej, cov tsev neeg uas tau txais kev kub ntxhov thiab cov tub khaws neeg tuag.
