Tus Tswv Qhia Mias Mas hais tias : “Lub Koom Txoos Mias Mas yuav nyob ib sab ntawm cov neeg tsiv teb tsaws chaw, tab txawm muaj kev tsis sib haum xeeb kuj xij.”
Tab txawm tias kev siv dav hlau pov hoob pob tseem muaj tsis tseg, kev tsis ruaj ntseg thiab kev lag luam ua teeb meem rau tib neeg kev ncaj ncees heev zuj zus kuj xij.” Tswv Qhia hais tias : “Peb tab tom raug cov teeb meem kev tsiv teb tsaws chaw loj kawg, tab sis lub Koom Txoos cov hauj lwm tseem ua ntxiv mus, tab txawm muaj teeb meem li cas kuj xij.” Cov Txiv Plig tseem nyob rawv hauv lawv cov tsev teev Ntuj, tawm mus tsham cov yim neeg, mloog lawv tej kev ntxhov siab, muab kev txhawb nqa thiab nplij lawv nyob hauv lub Moo Zoo. Lub nroog Taungngu nyob hauv thaj tsam Bago uas nyob npuas Mias Mas nruab nrab, feem coob yog cov Karen. Tseem muaj kev sib ntaus sib tua ua ntu zus los ntau caum xyoo. Kev sib ntaus sib tua nthuav dav nyob hauv ntau qhov chaw txij thaum muaj kev txeeb teb chaws hauv lub 2 hlis xyoo 2021 los. Kev sib tua ntawm cov tub rog thiab kev siv dav hlau pov hoob pob tau ua rau tsoom pej xeem coob kawg yuav tsum khiav tso vaj tse tseg thiab ua kev kub ntxhov rau kev ncaj ncees nyob Mias Mas teb heev kawg. Xov xwm tshaj tias : “Lub Leej Haum Kuj hais tias ; yuav muaj cov neeg khiav tsiv teb tsaws chaw nyob hauv lub teb chaws ze ntawm 3 plom 600 tawm txhiab leej nyob hauv xyoo 2026.” Tswv Qhia Nes Nes hais tias : “Muaj kev tua saum nruab ntug nyob ib puag ncig hauv txhua lub nroog, ua rau tsoom pej xeem ntshai thiab nrhiav kev khiav kom dim. Nyiaj kuj poob nqis tuaj thiab tsoom pej xeem tab tom ntsib kev txom nyem loj kawg.” Lub Koom Txoos tseem ua cov hauj lwm saib xyuas fab ntsuj plig, ua hauj lwm pab dawb thiab pab kev kawm. Ua ke ntawd kuj xyuam xim ua kom tau txuag tib neeg txoj sia. 64 tus Txiv Plig uas nyob hauv lub Cheeb Koom Txoos, mas muaj 44 tug tau ua cov hauj lwm saib xyuas fab ntsuj plig. Tej kev kub ntxhov no tseem ua teeb meem heev kawg rau cov tub ntxhais hluas. Coob leej tau khiav tawm mus, vim kev kawm puas tsuaj. Hos lwm cov neeg tab tom xav txog lawv lub neej yav tom ntej nyob hauv lub teb chaws. Tab txawm muaj tsov rog thiab kev tsiv teb tsaws chaw, Tswv Qhia Nes Nes hais tias : “Lub Koom Txoos yuav muab siab rau nyob ze cov neeg pluag txom nyem.” Nws tseem hais txog qhov cheem tsum hauv kev sib hais haum txog kev sib tua nyob Mias Mas teb uas muaj heev zuj zus. Nws lees tias txhua pab pawg neeg tsis muaj kev sib tso siab, ces ua rau kev sib tham kom haum yog qhov nyuab kawg.
