Tus Txiv Plig Is Ntias tuam choj txuas kev ntseeg hauv kev sib tham ta sib sim neej.
Nyob hauv 40 xyoo dhau los, Txiv Plig Thomas tau txhawb nqa kev sib tham ntawm txhua txoj kev teev hawm nyob hauv kev kawm, kev tshawb fawb thiab kev muaj feem cuam ntiag tug. Hauv kev ua tus tsim thiab tus thawj coj lub Koom Haum rau kev kawm sib haum xeeb thiab kev thaj yeeb (IHPS). Nyob Nyus Des Lis txij xyoo 2014 los, nws tau ua hauj lwm txhawb nqa kev sib nkag siab hauv cov teev hawm Hinduism, cov Islam, cov Jainism, cov Buddhism, cov Sikhism, cov Bahai, cov Judaism, cov Ahmadiyya thiab lwm cov kev teev hawm.
Hauv lub ntiaj teb uas muaj kev ntxub ntxaug thiab muaj kev sib ntaus sib tua tshwm sim hauv lub npe kev ntseeg, kev sib tham ntawm txhua txoj kev teev hawm thiaj yog qhov tsim nyog kawg hauv lub caij no. Txiv Plig Thomas hais tias : “Nws cov hauj lwm tau txais lub zog txhawb siab los ntawm Vaj Qhia Fas Ntshis Kus tsab ntawm Fratelli Tutti.” Txiv Plig Thomas ua tiav ntau yam, xws li yog ib tug tim xyoob hauv thawj pab tub tshaj Ntuj Lus ntawm Leej Ntshiab Thomas (MST). Yog thawj tug Txiv Plig uas tau txais daim ntawv pov thawj xeem lus Hindi hauv lub tsev kawm txheej siab Banaras Hindu, thiab yog thawj tug lwm tswj ntawm cov teb chaws hauv cov kav xwm kev sib haum xeeb fab kev ntseeg ntawm cov Tswv Qhia Kav Tos Liv nyob Is Ntias (CBCI). Nws tuav txoj hauj lwm no tau 9 xyoos hauv kev txhawb siab saib xyuas tsev neeg. Nws mus kawm nyob hauv Seminary xyoo 1969, thiab tom qab no nws tau kawm Hindi cov kev cai kom tau ua tub txib rau cov neeg nyob nruab nrab hauv Is Ntias teb kom zoo tuaj. Nws daim ntawv pov thawj kev soj ntsuam, yog ‘Kabir thiab Christian Philosophy’. Yog soj ntsuam txog qhov muaj nqis ntawm fab ntsuj plig ua ke nrog kev ntseeg Philosophy thiab Leej Ntshiab Kabir hauv tiam 15, nrog rau cov neeg ntseeg tej kev xav. Tom qab no cov hauj lwm no raug luam tawm ua xeem lus Hindi thiab tau txais qhov paj tshab Sahityik Kriti Samman ntawm lub Koom Haum Hindi.
Dhau no lawm nws tseem kawm xeem lus Urdu nyob hauv cov Mawv Xis Lim lub tsev kawm txheej siab Aligarh, kom tau txhawb kev sib raug zoo nrog cov Mawv Xis Lim. Thiab nws tau ua tus thawj coj ntawm lub Koom Haum kev teev hawm thiab kab lis kev cai. Txhawb nqa kev sib tham ntawm cov kev teev hawm, kev kawm tshaj tej kab lis kev cai thiab kev kawm ntau xeem lus.
Dhau ntawm cov hauj lwm tshaj Ntuj Lus no lawm, Txiv Plig Thomas tseem tau piav txog lub teb chaws, saib xyuas kev soj ntsuam txheej siab, sau 12 phau ntawv ua lus Aas Kiv thiab lus Hindi hais txog kev sib haum xeeb ntawm cov kev teev hawm thiab tsim kev thaj yeeb. Luam ntau zaj lus thiab tawm 2 thom nkauj.
Thaum FABC tab tom xav txog lub Koom Txoos cov hauj lwm hauv kev ua tus tuam choj nyob As Xias, mas kev muab siab rau tas ib sim neej ntawm Txiv Plig Thomas hauv kev sib tham, yog tus piv txwv muaj zog qhia tias ; kev sib hwm thiab kev thaj yeeb tsim tau li cas los ntawm kev sib raug zoo dhau kev ntseeg.
