ZAJ NYEEM HNUB TIM 12 LUB 10 HLI 2025
HNUB CHIV LIS PIAM 28 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 17: 11-19)
“Tsis muaj kaum leej rov huv tuaj lod? Tshuav cuaj leeg ne, lawv dua qhov twg lawm?”
Cov kwv tij hmoob, peb tau hnov peb niam peb txiv, cov pog yawm txwv koob qhia peb tias peb yuav tsum txawj lub txiaj lub tsim. Leej twg muaj lub txiaj ntsim rau peb mas, peb yuav tsum txawj kev ua tsaug. Tej tug hais lus ua tsaug, tej tug ua yam zoo rov ua tsaug. Hauv lub Moo Zoo hnub no kuj zoo ib yam thiab. Muaj kaum tus mob ruas tuaj cuag Huab Tais Yes Xus thov kom nws khob lawv kom huv. Huab Tais Yes Xus kuj kho lawv txhua tus kom huv tuaj. Tiam sis, thaum sawv daws rov huv tuaj tas lawm, muaj ib tug xwb tig hlo rov qab los ua Huab Tais Yes Xus tsaug. Cuag leeg lwm tus tsis rov qab tuaj ua Yes Xus tsaug.
Cov kwv tij, nej mloog lub Moo Zoo hnub no tas lawm ces, nej ne, nej xav li cas? Tej zaum mas peb yuav qhuas txog tus Xas Mas Lias ntawd uas nws rov qab ua Yes Xus tsaug. Thiab tej zaus, peb yuav tsis nyiam los cem cuag leej neeg uas tsis rov qab ua Yes Xus tsaug, puas yog? Tiam sis, kuv xav tias, tej zaus, peb kuj ua neeg zoo li cuag leeg neeg ntawd thiab. Txhua hnub Tswv Ntuj pub lub txiaj ntsim rau peb, peb tau txais, tiam sis, peb tsis txawj ua Tswv Ntuj tsaug hauv peb lub neej. Peb xav tias qhov peb tau txais yog qhov uas peb tsim nyog tau txais. Lo lus As Kiv hais tias: We take things for granted. Yog tias muaj ib tug neeg pub nyiaj txiag rau yus, yus zoo siab, yus ua nws tsaug. Tiam sis, thaum Tswv Ntuj pub sij hawm, pub txoj sia, pub pa, pub cov neeg nyob ib npuag ncig yus, pub cov yus hlub, yus tsis xav ua Tswv Ntuj tsaug. Zoo li cuag leej neeg uas tsis txawj ua Yes Xus tsaug hauv lub Moo Zoo hnub.
Li ntawd mas, peb cov ntseeg sawv daws, peb txhob ua zoo xws li cuag leej neeg hauv lub Moo Zoo hnub no uas tsis rov qab ua Yes Xus tsaug. Ntawm peb mas, peb yuav tsum txawj ua Tswv Ntuj tsaug rau txhua yam lub txiaj tsim Tswv Ntuj pub rau yus. Txawm tias nws yog yam me me zoo xws li tsis muaj qab hau dab tsi xwb, kuj ua Tswv Ntuj tsaug. Hnub twg peb txawj ua Tswv Ntuj tsaug rau yam me me peb txais hauv peb lub neej, hnub ntawd, peb yuav paub tias Tswv Ntuj khuv leej peb, Tswv Ntuj nrog nraim peb, Tswv Ntuj hlub peb.
Nyob zoo sawv daws.
