Zaj nyeem hnub tim 12 lub 4 hlis 2026
Hnub Chiv, Lis Piam 2 caij Hla
Cov lus nyob hauv Zam Ntawv Moo Zoo (Z 20: 19-31)
Kwv tij zoo nyiam sawv daws, hauv lub Moo Zoo hnub no, peb paub tias Huab Tais Yes Xus tawm los ntsib nws cov thwj tim. Nws foom koob hmoov rau lawv; nws pub kev thaj yeeb rau lawv. Sawv daws zoo siab uas lawv tau ntsib Huab Tais Yes Xus. Lawv zoo siab uas lawv tau txais koob hmoov ntawm Yes Xus. Ntawm no mas lawv ntseeg tiag tiag tias Huab Tais Yes Xus sawv rov los ntawm kev tuag muaj txoj sia tshiab lawm tiag. Txawm tias hnub ntawd, Tos Mas tsis nyob. Nws tsis pom Huab Tais Yes Xus, ces nws thiaj tsis ntseeg. Nws tsis ntseeg qhov tseeb uas nws cov kwv tij qhia nws thiab ua tim khawv txog qhov tseeb tias yog Huab Tais Yes Xus tiag. Nws sawv rov los tiag. “Peb pom Huab Tais lawm.”
Tos Mas hais tias “Yog kuv tsis pom lub qhov txhab ntsia hlau nyob hauv nws ob txhais tes, yog kuv tsis muab kuv tus ntiv tes ntxig lub qhov ntsia hlau, thiab yog kuv tsis muab kuv txhais tes rau ntawm nws phab tav, mas kuv tsis ntseeg.” Hais li ntawd qhia tau tias Tos Mas tsis ntseeg tiag tiag tias muaj kev sawv rov los tiag. Thiab Huab Tais Yes Xus sawv rov los tiag.
Kwv tij sawv daws, qhov kawg, Tos Mas lees tias nws ntseeg txog Yes Xus tiag. Nws ntseeg tias Huab Tais Yes Xus yog Tswv Ntuj tiag. Tos Mas yog tus piv txwv rau peb thiab. Ntau zaus, peb tsis nkag siab qhov tshwm sim hauv peb lub neej. Peb tsis ntseeg tias yog Tswv Ntuj tus ua kom txhua yam tshwm sim tuaj. Peb tsis ntseeg tias Tswv Ntuj muaj hwj chim dua luaj lwm tus dab. Kuj thov kom Tos Mas tus piv txwv qhia kom peb muaj txoj kev ntseeg ruaj khov, tsis ua xyem xyav. Ntseeg ruaj ruaj zuj zus. Zoo li Huab Tais Yes Xus qhia Tos Mas tias “Vim koj pom kuv, mas koj thiaj ntseeg. Cov uas tsis tau pom tab sis lawv ntseeg, mas lawv txoj hmoov zoo.
Nyob zoo sawv daws.
