Hnub no yog hnub chiv tim 27 lub 7 hli xyoo 2025
Hnub no, Huab Tais Yes Xus qhia ib zaj teev Ntuj tseem ceeb tshaj plaws rau cov thwj tim paub. Txij no mus, thaum lawv xav teev Ntuj los thov Ntuj, lawv yuav tsum hais zaj teev Ntuj no. Zaj no yog zaj Peb Txiv Nyob Saum Ntuj. Thaum peb hais zaj peb txiv nyob saum ntuj, tsis yog peb lam hais los tsis rau siab hais, hais ua si xwb. Tiam sis, peb tab tom hu txog Tswv Ntuj uas yog peb Txiv. Thaum peb hu txog nws lub npe, peb tab tom lees txais tias peb yog Leej Txiv cov me nyuam. Peb ntseeg txog nws, peb vam khom rau nws, peb npuab peb lub siab nyob ntawm Tswv Ntuj. Tswv Ntuj tib tug xwb yog peb qhov chaws vam khom.
Txiv plig thov caw peb sawv daws twm txog Huab Tais Yes Xus cov lus hnub no tias: “Nej thov Ntuj yuav pub rau nej. Nej nrhiav, ces nej yuav ntsib.” Lo lus no muaj lub ntsiab lus tob tshaj, phim rau peb coj mus xav kom zoo. Huab Tais Yes Xus hais tseg, “Nej yuav tsum thov, ces Tswv Ntuj yuav pub rau nej. Nej yuav tsum nrhiav, ces nej yuav ntsib.” Huab Tais Yes Xus tsis hais lus dag rau peb, qhov nws hais yog qhov tseeb. Tiam sis, nyob ntawm peb mas, peb puas nquag teev Ntuj, peb puas nquag thov Ntuj. Peb puas nquag nhriav kom tau ntsib Tswv Ntuj? Peb puas tso siab rau nws, thiab ntseeg tiag tiag tias Tswv Ntuj yuav mloog peb cov lus thov, ces nws yuav pub rau peb raws li peb thov?
Huab Tais Yes Xus lo lus tias “Nej thov, Ntuj yuav pub rau nej. Nej nrhiav, ces nej yuav ntsib” tsis txhais tias peb thov dab tsi kuj xij, Tswv Ntuj yuav pub, peb xav tau dab tsi kuj xij, Tswv Ntuj yuav pub txhua tsav txhua yam, tsis hais nyiaj txiag, suab npe, los ntau yam uas lub ntiaj teb neeg no qhuas txog. Qhov tiag mas, Tswv Ntuj yuav pub yam uas muaj qab hau rau peb, muaj nqes rau peb lub neej. Txhob tsis nco qab, hauv zaj peb txiv nyob saum ntuj, peb kuj hais tias “kom muaj raws li koj nyiam nyob ntiaj teb no, li nyob saum ntuj.” Txhais taut tias peb vam thiab cia siab rau Tswv Ntuj, peb thov, tiam sis, Tswv Ntuj yuav pub rau peb raws li Tswv Ntuj lub siab nyiam. Tswv Ntuj yuav pub rau pe braws li Tswv Ntuj pom zoo rau peb. Peb yuav tsum ua Tswv Ntuj tsaug. Peb yuav tsum teev Ntuj, peb yuav tsum qhuas txog Tswv Ntuj tsis tseg. Peb nrhiav, ces peb yuav ntsib Tswv Ntuj. Ntawm peb cov neeg ntseeg lub neej, peb puas tau nrhiav Tswv Ntuj tiag tiag? Yus nrhiav Tswv Ntuj, tsis yog txhais tias yus nrhiav nws thaum yus muaj teeb meem los xwv txheej xwb, tiam sis, yus nhriav Tswv Ntuj txoj kev hlub, yus nrhiav Tswv Ntuj txoj kev ncaj ncees, yus nrhiav Tswv Ntuj txoj kev zam txhaum. Yus xav yuav lub siab tshiab niaj hnub tsis tseg. Yus nrhiav Tswv Ntuj vim yus nyiam nyiam Tswv Ntuj. Qhov kawg, mas Tswv Ntuj tsis ua kom peb poob siab. Peb yuav ntsib Tswv Ntuj tiag tiag.
Li ntawd, kwv tij zoo nyiam sawv daws, thov kom peb nquag nquag teev Ntuj, hais zaj Peb Txiv Nyob saum ntuj teev Ntuj tsis tseg. Txhob tsis nco qab: “Nej thov ,Ntuj yuav pub rau nej. Nej nrhiav, ces nej yuav ntsib.” Nyob Zoo sawv daws!
