ZAJ NYEEM HNUB TIM 28 LUB 6 HLI 2026
HNUB CHIV LIS PIAM 13 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 10: 37-42)
Kwv tij Hmoob sawv daws, hnub no Huab Tais Yes Xus qhia ob lo lus qhia tseem ceeb uas kuv thov kom peb cov ntseeg muab khaws cia los xav tswv yim txog. Yam tim 1 Huab Tais Yes Xus hais tias “tus nyiam nws niam nws txiv dua kuv, nws tsis tsim nyog nrog kuv. Tus nyiam nws tej tub tej ntxhais dua kuv, mas nws tsis tsim nyog nrog kuv.” Ua ntej txhua yam mas, txhob xav yuam kev nawb. Huab Tais Yes Xus hais li no tsis txhais tias nws qhia kom peb ntxub los tso niam txiv pov tseg los tso tej me tub me ntxhais pov tseg. Huab Tais Yes Xus hais li no kuj vim tias nws xav qhia peb kom paub meej kawg tias Tswv Ntuj yog qhov uas tseem ceeb tshaj plaws. Vim li ntawd, ntawm peb lub neej peb txhob tso Tswv Ntuj pov tseg. Tej zaus, peb ntxhov siab kawg uas rau peb nco tsis tau Tswv Ntuj los ua rau peb tso Tswv Ntuj pov tseg. Txhob ua li ntawd. Txawm li cas kuj xij yuav tshwm sim tuaj hauv peb lub neej, txhob tsis nco qab Tswv Ntuj.
Yam tim ob, Huab Tais Yes Xus hais tias, “Leej twg pub dej rau ib tug neeg me me no haus, vim tus no yog ib tug thwj tim, tab yog yog ib khob dej txiag xwb, tsis kav, nws yuav tau txais koob haum.” Huab Tais Yes Xus hais li no, nws xav qhia peb tias txawm tias qhov zoo yam me me xwb peb tau ua rau luag lwm tus, peb kuj ua xis Tswv Ntuj siab kawg. Yam zoo tsis hais yam me los yam loj, yog peb ua rau luag vim peb nyiam lawv, Tswv Ntuj kuj txais siab kawg.
Li ntawd, peb tsis ua zoo rau peb tsev neeg los niam txiv me tub me nyuam xwb, peb yuav tsum ua rau luag twm tus thiab. Thaum peb ua zoo rau luag lwm tus, kuj txhais tau tias peb pom Tswv Ntuj tseem ceeb dua lwm yam lawm. Thov peb twm txog lub Moo Zoo hnub no kom zoo thiab coj los ua raws mog.
Nyob zoo sawv daws.
