Koj thov dab tsi ntawm Tswv Ntuj ? (What Do You Ask God For?)
Hnub no peb yuav coj nej los nyeem 3 zaj nyeem, xws li thawj zaj nyeem yog nyob hauv phau ntawv Thoob Tsib zaj 7 : 7-11. Zaj nyeem ob nyob hauv ntawv Hes Nplaws zaj 4 : 12-13 thiab Mas Kos ntawv Moo Zoo zaj 10 : 17-30.
Peb xub pib ntawm phau ntawv Thoob Tsib ua ntej. Koj yuav xav tias koj tab tom saib ntawv Thoob Tsib uas nyob hauv Ntawv Ntshiab. Nyob hauv nws muaj phau ntawv Thoob Tsib, Nkauj Paj Nruag thiab ntau phau ntawv uas yog sau lub caij yuav xaus ntawv Cog Lus Qub. Phau ntawv no muaj ntau yam kev thoob tsib thiab yog qhov tseeb ntawm fab ntsuj plig uas peb txhua tus tau txais txiaj ntsim qab hau.
Tus piav nws xav tias yog tus vaj Xas Los Moos ua tus sau phau ntawv Thoob Tsib, tab sis Xas Los Moos tsis yog tus sau phau ntawv no.
Tsis kav luag kuj ntsia pom tias Xas Los Moos yog ib tug neeg thoob tsib thiab yog tus piv txwv zoo. “Kuv thov Ntuj thiab xyuam xim, kuv thov kom Leej Ntuj Plig Ntshiab kev thoob tsib los nyob saum kuv.”
Nyob hauv phau ntawv Cog Lus Qub no, yog koj thov dab tsi ntawm Tswv Ntuj los yog Tswv Ntuj tuaj nrhiav koj thiab nug koj tias : “Koj xav tau dab tsi ?” Mas koj yuav thov dab tsi ntawm Tswv Ntuj thiab koj yuav thov li cas ? Qhov no yog lo lus nug meej kawg. Koj yuav ua tib zoo xav txog lo lus nug no seb, yog Tswv Ntuj hais rau koj tias : “Kuv yuav muab yam koj xav tau pub rau koj”. Los yog koj yuav hais tias : “Tshuav ib yam uas kuv xav thov ntawm Tswv Ntuj.” Yam koj xav thov ntawd yog dab tsi ? Ces yuav muaj ntau yam koj xav tau tshwm sim nyob hauv koj nruab siab, tab sis yam uas tus neeg ntse thov, mas yog lub tswv yim ntse thiab kev thoob tsib.
Kev thoob tsib yog dab tsi ? Kev thoob tsib yog tus vaj ntawm kev ncaj ncees. Kev thoob tsib qhia kom yus paub txog yam zoo thiab yam phem, qhov yog thiab tsis yog. Piv li koj yog ib tug neeg muaj peev xwm tshaj, tab sis koj tsis paub siv koj lub peev xwm thiab tsis paub tias yuav rho los siv thaum twg, mas koj lub peev xwm yuav muaj txiaj ntsim qab hauv dab tsi ?
Tej zaum koj yog tus neeg ncaj ncees thiab siab txias tshaj plaws, tab sis koj tsis paub siv kev ncaj ncees li cas thiab yuav siv thaum twg. Ces koj txoj kev ncaj ncees tsis muaj qab hau dab tsi kiag. Qhov ntawd thiaj hais tias kev thoob tsib yog tus vaj ntawm kev ncaj ncees, kev ncaj ncees uas tseem ceeb tshaj plaws.
Li ntawd, lub tswv yim ntse thiab kev thoob tsib thiaj yog thawj yam uas Yes Xus thov. Yam ob uas Yes Xus thov, yog tus ntsuj plig thoob tsib. Kev thoob tsib tsis yog kev paub xwb, nws muaj kev txawj ntse, kev txawj ntse fab Technique, muaj kev txawj ntse txog lwm yam nrog thiab.
Tam sim no peb los mloog ntxiv mus, vim nws yog qhov tseeb kawg. Kuv nyiam koj, yog txhais tias nyiam kev thoob tsib ntau dua lwm yam. Tus sau thiaj xav tias tus neeg no yog Xas Los Moos uas yog cov His Xas Lais tus vaj. Kuv nyiam kev thoob tsib dua kev muaj hwj chim. Muaj coob leej neeg uas lawv xav tias :
kheev lam Tswv Ntuj hais tias :
“Nej thov dab tsi ntawm kuv los tau.” Mas lawv yuav thov kev ua vaj, vim lawv xav ua tus kav teb chaws. Lawv xav kom luag tej mloog thiab ua raws li lawv, ces lawv thov kom Tswv Ntuj pub lub zog rau lawv.” Lub hwj chim yog qhov neeg ntshaw tshaj, tab sis Xas Los Moos hais tias : “Tsis yog ! Kuv nyiam kev thoob tsib dua lub hwj chim.” Vim li cas Xas Los Moos hais li ntawd ? Vim tias koj muaj hwj chim nyob thoob ntiaj teb, tab sis yog koj tsis xyuam xim thiab tsis muaj kev thoob tsib, mas koj yuav tsis paub yuav ua li cas rau koj lub hwj chim. Ces koj lub hwj chim yuav tig rov los ua phem rau koj thiab rhuav koj ib yam li Xas Los Moos. Koj sim xav seb, yog koj muaj hwj chim ua dab tsi los tau raws li koj xav, koj tuaj yeem ua txhua yam ywj koj siab. Tab sis koj tsis paub tias yam Tswv Ntuj xav tau yog dab tsi ? Koj tsis muaj kev ncaj ncees thiab tsis thim xav, ces koj yuav vwm. Koj yuav coj kev piam sij los nyob ib ncig koj. Ces qhov kawg luag yuav txov koj, vim koj siv koj lub zog lub hwj chim mus ua tej yam phem ua yog koj ntiag tug. Li ntawd, yog muaj ib yam uas koj yuav thov, mas koj txhob thov kev muaj hwj chim, koj yuav thov lub tswv yim ntse thiab kev thoob tsib.
Mloog nws hais ntxiv mus. “Kev nplua nuj pauv tsis tau nws, nws yog kev thoob tsib. Thiab kuv kuj tsis xav muab nws sib piv nrog tej hlaws npliag deg, vim nyiaj kub yog zoo li cov xuab zeb xwb.”
Qee leej xav tau lwm tus lub zog, tab sis yog Tswv Ntuj hais tias : “Nej thov dab tsi ntawm kuv mas !” Ntshe coob leej yuav thov kev nplua nuj xwb. Kuv kuj paub tias muaj coob leej uas lawv tsis xav tau kev thoob tsib, lawv tsuas xav tau kev nplua nuj thiab yam uas kev nplua nuj muas tau xwb.
Zoo li koj mus ncig teb chaws, koj pom tej yam zoo uas xuas nyiaj muas tau. Ces koj xav tau nyiaj tau kub, xav tau tej hlaws npliag deg, tab sis Xas Los Moos hais tias : “Tsis yog ! Kuv tsis xav tau nyiaj kub, vim nyiaj kub thaum muab los piv rau kev thoob tsib lawm, nws tsuas zoo li cov xuab zeb xwb.”
Vim li cas ? Vim tias koj muaj cuab tam nplua nuj nyob ntiaj teb, tab sis koj tsis paub tias Tswv Ntuj xav kom koj ua dab tsi. Koj tsis paub siv koj lub cuab tam mus rau qhov zoo, ces zoo li nws tsis muaj nuj nqis dab tsi kiag. Piv li cov tub ua yeeb yaj duab, cov tub hu nkauj thiab cov tub ncaws pob uas lawv tau txais nyiaj ntau plhom ua paj tshab. Tab sis lawv cov nyiaj tsis muaj qab hau, vim lawv muab nyiaj nkim rau tej yam ntxias dag thiab kev quav yeeb quav tshuaj, ces lawv cov nyiaj rov rhuav tshem lawv. Yog tias koj muaj cai thov ib yam dab tsi ntawm Tswv Ntuj, mas koj txhob thov kev nplua nuj, koj yuav thov lub tswv yim ntse thiab kev thoob tsib xwb.
Qhov kawg no, dhau ntawm kev noj qab haus huv thiab kev zoo nkauj zoo nraug lawm, kuv tseem nyiam koj. Koj yog kev thoob tsib. Muaj qee leej hais tias kuv tsis tau vwm rau kev muaj hwj chim, kuv tsis tau vwm rau kev nplua nuj. Yog tias kuv thov tau yam twg ntawm Tswv Ntuj, mas kuv yuav thov kom muaj lub cev ntaj ntsug zoo nkauj zoo nraug, thov kom kuv tau noj qab nyob zoo. Yog koj muaj lub cev ntaj ntsug khov kho muaj zog xws li tej tug txiv nees, tab sis koj tsis paub kev ua lub neej, mas koj lub cev ntaj ntsug kuj yuav piam sij mus nrog tej yam tsis zoo.
Kuv thov hais txog zaj ntawv Moo Zoo hnub no. Vim nov yog zaj hais txog ib tug hluas nplua nuj. Nws yog neeg zoo. Nws tuaj cuag Yes Xus thiab nws txhos caug thov Yes Xus tias : “Xib Hwb ! Kuv yuav ua dab tsi thiaj yuav tau txais txoj sia nyob mus li los ua cuab tam ?” Tswv Ntuj xav kom nws ua dab tsi ne ?
Yes Xus hais tias : “Koj puas tau ua raws cov lus qhia ?” Tus hluas nplua nuj teb tias : “Xib Hwb ! Txij thaum kuv yav hluas los, kuv yeej coj raws nraim li ntawd.” Tab sis Yes Xus hais tias tshuav ib yam uas tus hluas nplua nuj ntawd tsis tau ua. Qhov ntawd yog qhov tias : “Koj mus, koj muab koj lub cuab tam muag, muab tus nqi pub rau cov neeg pluag, koj yuav tau ib lub cuab tam muaj nqis nyob saum ntuj. Ces koj los raws kuv.”
Qhov ntawd txhais tias nws tau txais kev thoob tsib ua paj tshab, tab sis nws tsis yuav. Nws nyiam lub cuab tam thiab kev nplua nuj ntau dua. Thaum Yes Xus hais tias :
“Koj mus, koj muab koj lub cuab tam muag, muab tus nqi pub rau cov neeg pluag.”
Mas tus hluas nplua nuj ntawd rov mus thiab nws ua ntsej muag ntshaus. Zaj no yog ib zaj txaus xav thiab tu siab kawg nyob hauv Ntawv Cog Lus Tshiab, vim raws li peb hnov, thaum Yes Xus tau ntsib leej twg, lawv zoo siab muab tas txhua yam tso pov tseg thiab raws Yes Xus. Tab sis tus hluas nplua nuj ntawd ua ntsej muag ntshaus. Cov Thwj Tim tso lawv cov tsig cuab ntses pov tseg thiab raws Yes Xus. Mas Tais tus neeg sau se kuj raws Yes Xus, tab sis muaj ib tug hluas uas nws yuav tsum xaiv kev nplua nuj thiab kev thoob tsib. Nws xaiv kev nplua nuj, ces nws thiaj rov mus ntsej muag ntshaus ntsho. Nws xav tau txoj sia nyob mus li, tab sis nws ntshaw nyiaj txiag. Muaj coob leej xaiv xws li tus hluas nplua nuj ntawd. Vim lawv xav tias yog lawv nplua nuj lawm, lawv muaj hwj chim, lawv ua dab tsi los tau. Tab sis yog lawv tsis muaj kev thoob tsib thiab lub tswv yim ntse, mas lawv tsis paub tias yuav muab tej kev nplua nuj ntawd coj mus siv li cas. Ces txog qhov kawg tej kev nplua nuj thiab lub hwj chim ntawd yuav rov rhuav lawv kom piam sij. Koj yuav xaiv lub tswv yim ntse thiab kev thoob tsib, ces koj thiaj yuav ntsib txoj kev nyob sov siab uas tseeb tiag.
