Lo lus hauv lub neej, lub 3 hlis 2026.
“Nej sawv, nej txhob ntshai.”
Yes Xus nrog Pob Zeb, Yas Kos thiab Zam lawv nce mus saum lub roob siab. Nyob ntawd cov Thwj Tim tau pom lawv tus xib hwb lub koob meej thiab tau hnov Leej Txiv lub suab hais lus hauv twv huab tuaj tias : “Tus no yog kuv Leej Tub uas kuv nyiam, nws yog kuv qhov chaw zoo siab. Nej mloog nws mog !”
Nov yog kev pom uas tshwj xeeb kawg. Kev tau nyob ntawm Tswv Ntuj xub ntiag ua kom yam uas nws tsim tau paub txog nws nyob hauv lub koob meej. Thaum hnov li ntawd, cov Thwj Tim ntshai thiab lawv khoov ntsej muag ti av. Tab sis Yes Xus txav los plhws lawv thiab nws hais rau lawv tias : “Nej sawv, nej txhob ntshai.
Lo lus tias ‘sawv’, yog tib lo lus uas siv kam nyob hauv ntawv Moo Zoo uas hais txog Yes Xus kev sawv hauv cov tuag rov los. Ib yam li lo lus tias ‘neb txhob ntshai mog’, yog thawj lo lus uas Yes Xus hais rau ob tug poj niam nyob ntawm lub ntxa khoom, tom qab Yes Xus sawv rov los. Thiab cov Thwj Tim tau pom Yes Xus lub ntsej muag ci ntsa iab. Qee zaus peb raug kev ntshai nias tseg thiab raug yuam hauv kev sim, ces peb lub neej zoo li tsis muaj kev tawm. Thaum tej yam no tshwm sim, mas peb tsis tuaj yeem vam txog peb lub zog tau. Yog peb xav pom kev muab siab rau thiab lub zog txhib peb hauv kev ntseeg, mas peb tsim nyog yuav vam txog Tswv Ntuj lub txiaj ntsim coj peb kev tas mus li. Leej twg uas tsis ntsib dua kev nyuab siab nyob hauv lub neej ? Tej kev nyuab siab ntawd, tej zaum nws yuav tuaj raug peb nyob hauv tus yam ntxwv tsis zoo. Xws li kev pluag txom nyem, kev nyuaj siab, kev ua xyem xyav thiab kev ntxias dag. Tshaj qhov ntawd lawm hauv tej zej zog tseem muaj ntau tsav ntau yam nyob ncig peb, xws li tsov rog, kev phem thiab kev tsis ncaj ncees kuj yog qhov uas txaus ntshai tib yam.
Thaum ntsib tej kev ntshai no, kev ua xyem xyav yuav nkag los thiab peb yuav rov nug tus kheej tias : “Tswv Ntuj txoj kev nyiam kev hlub ploj dua twg lawm ?”
Yes Xus tuaj nyob hauv txhua yam xwv txheej uas mob thiab nws ris tas peb tej kev nyuab siab nyob hauv nws. Yes Xus yog kev nyiam kev hlub thiab hauv kev nyiam kev hlub ntawd, yog qhov daws ntiaj teb kev ntshai tag nrho. Txhua zaus uas peb raug kev ntshai nias los yog tej kev mob kav peb, mas peb yuav paub qhov tseeb uas zais nyob hauv. Ntawd yog Yes Xus nyob rau hauv. Thov peb qhib siab rau Yes Xus tuaj nyob hauv peb lub neej, thiab thov kom peb ua lub neej ntxiv mus raws li Tswv Ntuj lub hom phiaj uas yog nyiam peb tej txheeb ze. Peb yuav pom tias Yes Xus yog kev nyiam kev hlub mus li. Peb yuav hais rau Yes Xus ib yam li cov Thwj Tim hais tias :
“Koj yog Tswv Ntuj Leej Tub tiag.”
“Nej sawv, nej txhob ntshai.”
Leej twg tau pom Tswv Ntuj nyob hauv nws lub neej, mas puav leej yog Tswv Ntuj kev nyob uas tau pom thiab tau kho mob los ntawm nws cov lus. Qee zaus cov neeg ntseeg tej pov thawj kuj nrog peb mus ua ke hauv tej kev txhawj xeeb dawb huv no, thiab txhawb kom peb rov sawv. Kom peb tawm ntawm peb tus kheej thiab pib nrog Yes Xus, nrog peb cov txheeb ze mus kev ua ke.
Lub qab xyoos tsaib no, kuv lub teb chaws ntsib kev nyuab siab loj kawg. Kuv lub nroog raug kev kub ntxhov thiab kev ntshai. Kuv txhawj xeeb txog kuv tsev neeg, kuv tej phooj ywg thiab kuv kuj txhawj xeeb txog tus kheej. Hauv ntau yam kev ntshai ntawd, kuv maj mam tso siab rau Tswv Ntuj thiab sawv ntseg ntxiv mus. Tab txawm yuav muaj ntau yam tshwm sim kuj xij. Ua ntej cov teeb meem no yuav tshwm sim, cov tub ntxhais hluas uas peb ua neej raws lub Moo Zoo tau npaj ntau yam hauj lwm ua ke. Kom tau pab cov tsev neeg pluag txom nyem, uas yog npaj txhiam xws noj thiab txhua yam hauj lwm. Tab sis tej kev ntshai ntawd tau ua rau peb cov hauj lwm nres tas.
Ob peb hnub tom qab ntawd, peb rov tuaj sib sau ua ke thiab sib tham dua. Ces peb pom lub zog thiab dej siab nyob hauv peb. Peb thiaj txiav txim siab tsis pub tej kev ntshai ntawd los nias peb, tab sis peb yuav tso siab rau Yes Xus thiab ua ntxiv mus hauv tej yam uas peb twb tau pib lawm. Peb ua nyob hauv txoj kev ntseeg uas peb sib koom ua ke. Peb thiaj tuaj yeem pab tau cov tsev neeg uas lawv xav tau kev pab tiag tiag li ntawm 40 tawm yim. Hauv tej kev nyuab siab ntawd, peb pom tias vim Tswv Ntuj txoj kev nyiam kev hlub thiab peb tej kev sib koom tes, mas peb thiaj tsim tau kev pauv ntxeev tiag.
“Nej sawv, nej txhob ntshai.”
Tom qab nrog Yes Xus nce mus saum lub roob siab, kom tau ntsib Tswv Ntuj thiab hnov nws lub suab lawm. Peb kuj nrog Yes Xus nqes los ib yam. Kom tau rov mus rau tiaj nrag uas peb yuav tau pom peb cov kwv tij coob leej ris kev sab, kev mob, kev tsis ncaj ncees, kev tsis paub txog, kev pluag txom nyem hauv fab ntsuj plig thiab toob xib puaj yam. Tab txawm peb yog neeg ntseeg, tsis kav peb yuav ua tiag ntxeem thiab peb txawj yuam kev. Tab sis lo lus no txhib kom peb tawm mus kev ua ke, kom tau coj Tswv Ntuj cov txiaj ntsim uas peb tau txais mus txog txhua leej txhua tus.
Kwv tij Hmoob sawv daws ! Lo lus hauv lub neej lub 3 hlis no, yog ib lo lus txhawb zog zoo kawg. “Nej sawv, nej txhob ntshai.” Thaum peb raug xwm txheej los ntsib kev ntshai, mas peb yuav xav txog Yes Xus lo lus no. Kom peb txoj kev ntseeg txhib peb sawv ntseg ntxiv mus. Nyob zoo nej sawv daws !
