Muab koj tsev neeg cev rau Tswv Ntuj. (Freeing Your Family for God)
Xav tias koj paub zoo lawm tias : qhov peb hais tias Ntawv Ntshiab yog yam muaj nqis hauv tsev neeg thiab nws yeej yog li ntawd tiag tiag. Tab sis nws kuj tsis yog qhov peb cia li xav txog thiab lam hais. Tam sim no xav tias koj yuav nkag siab lawm tias kuv hais txog dab tsi. Thaum peb xav txog 2 zaj uas lub Koom Txoos muab los qhia peb paub. Thawj zaj yog kuv kheev kheev qhia tib neeg thaum pib nyeem Ntawv Ntshiab thawj zaug, thiab kom ua tib zoo xav txog thawj qib lus. Qhov ntawd yog Ntawv Cog Lus Qub, Xas Muas phau ob. Yog ib zaj ntxhov kawg nyob hauv kev piav thiab muaj tus ua yeeb yam uas peb nco tau zoo. Xas Muas yog ib tug tub yug los ntawm As Nas. As Nas yog ib tug poj niam His Xas Lais uas muaj txiv lawm, tab sis nws tsis tuaj yeem muaj me nyuam tau nyob rau lub caij ntawd. Zaj no yog ib zaj mob siab thiab txaus xav kawg. Kuj yog qhov txaj muag ntawm cov poj niam, vim muaj me nyuam tsis tau. Li ntawd, txhua txhua xyoo As Nas thiab nws tus txiv thiaj nce mus pem lub nroog Xis Laus. Xis Laus yog qhov chaw khaws lub Xab Cog Lus ua ntej lub tuam tsev teev Ntuj nyob Yes Lus Xas Les. Yog qhov chaw ntshiab tshaj nyob His Xas Lais thiab As Nas nkawd nce mus thov Ntuj tas li. As Nas thov kom Tswv Ntuj pub ib tug tub rau nws. Txhua xyoo nws ua neej lwj siab ntsuav, vim muaj coob leej neeg pom tias nws nyob hauv kev thov Ntuj tas mus li kom tau qee yam. Nws thov tas thov dua thiab nws thov Tswv Ntuj tas niaj tas xyoo. Zaum no nws thov Ntuj ntev loo thiab nws hais lus ntxhi xwb. Pom nws di ncauj ua zog, tab sis tsis hnov nws lub suab. Tsis muaj leej twg pom nws, tsuas yog Es Lis ib leeg pom xwb. Es Lis yog tus Leej Choj nyob hauv lub tsev teev Ntuj. Es Lis pom li ntawd, Es Lis xav tias yog As Nas vwm cawv.
Es Lis thiaj mus hais rau As Nas tias :
“Koj yuav vwm cawv mus txog thaum twg ? Koj ua kom koj zoo cawv sai mas !”
As Nas teb tias : “Txiv tswv, kuv kawg yog ib tug poj niam ua neej lwj siab ntsuav xwb. Kuv tsis tau haus cawv txiv ntoo los cawv txhuv li. Kuv hais kuv txoj kev lwj siab rau Tswv Ntuj xwb.” Li ntawd, Es Lis thiaj tsis mloog As Nas cov lus, tab sis As Nas kuj hais tas zog tias yav tag los nws tau hwm Tswv Ntuj thiab thov Ntuj tas mus li.
As Nas cov lus thov Ntuj yog li no :
“Huab Tais Xas Npas Os ! Yog koj xav ntsia koj tus ntxhais txib txoj kev nyem, yog koj nco txog nws, yog koj muab ib tug tub rau kuv, mas kuv yuav muab nws rau Tswv Ntuj tas ib sid. Kuv yuav cia tus neeg ntawd nyob ntawm koj xub ntiag xws li tus Nas Ntxis mus txog hnub nws tuag.” Txhais tias rab chais yuav tsis chwv nws taub hau.
Peb paub tias Tswv Ntuj mloog As Nas cov lus thov, ces As Nas thiaj xeeb tub thiab nws yug tau ib tug tub. Nws muab tis npe hu ua Xas Muas. Lo lus Xas Muas txhais tias “thov ntawm Tswv Ntuj los”.
As Nas tu nws tus tub mus txog lub caij cais tau mis thiab txawj noj mov, ces As Nas coj tus me nyuam rov mus pem lub tsev teev Ntuj nyob Xis Laus. Nws mus ntsib Es Lis thiab hais rau Es Lis tias : “Txiv tswv, kuv yog tus poj niam uas tau txhos caug nyob ze koj ntawm no thov Tswv Ntuj. Thaum ntawd kuv thov kom Ntuj pub tus me nyuam no rau kuv. Tswv Ntuj tau mloog kuv lo lus thov, mas nyem no kuv tso tus me nyuam no rau Tswv Ntuj kom nws nrog Tswv Ntuj mus txog hnub tuag. Kuv muab nws cev rau Tswv Ntuj.” Ces As Nas cia Xas Muas nyob ntawd, vim nws muab pub rau Tswv Ntuj lawm.
Zaj no yog ib zaj txaus tu siab kawg nyob hauv Ntawv Ntshiab. Koj sim xav seb, yog koj muaj ib tug tub thiab koj muab tso tseg li ntawd koj xav li cas ? Tus me nyuam ntawd yog As Nas thov ntawm Tswv Ntuj los, tab sis nws ua raws nws cov lus cog, ces nws tsis ntxhov siab tsis txhawj, nws tsis hloov siab. Nws muab nws tus tub ua paj tshab pub rau Tswv Ntuj, vim Tswv Ntuj mloog nws cov lus thov.
Tam sim no peb yuav tig los saib zaj nyob hauv ntawv Moo Zoo uas peb ib txwm hnov kam, yog zaj hais txog Mab Liab, Yos Xes thiab Yes Xus lawv nce mus pem lub nroog Yes Lus Xas Les kom tau koom ua hmoov Hla. Thaum ntawd Yes Xus muaj kaum ob xyoos. Thaum Yos Xes thiab Mab Liab nkawd rov los mus tsev, mas Yes Xus tseem nyob Yes Lus Xas Les. Mab Liab nkawd tsis paub, nkawd xav tias nkawd tus tub nrog pab neeg tuaj ua ke rov qab lawm. Nkawd mus ib hnub kev nkawd mam pib nrhiav nkawd tus tub hauv cov neeg txheeb ze thiab cov swm neeg. Nkawd nrhiav tsis tau, ces nkawd rov mus nrhiav nkawd tus tub pem Yes Lus Xas Les.
Thaum zoo li ntawd, mas zoo li koj tab tom ploj ib tug tub. Nyob hauv koj lub siab, koj yuav txhawj yuav ntshai thiab xav ntau heev puas yog ? Mab Liab thiab Yos Xes nkawd kuj txhawj thiab ntxhov siab heev, vim nkawd nrhiav tau 3 hnub tsis pom nkawd tus tub. Koj xav tias yog koj tus tub ploj lawm 3 hnub, koj tsis paub tias nws nyob rau qhov twg, koj nug thiab nrhiav tas txhua txhia qhov chaw. Koj xav tias koj puas pw tsaug zog tau ? Thaum ntawd Mab Liab thiab Yos Xes nkawd lub siab ntxhov hnyo ib yam li koj ntag. Qhov kawg Mab Liab thiab Yos Xes nkawd mus nrhiav tau nkawd tus tub nyob hauv lub tuam tsev teev Ntuj nyob Yes Lus Xas Les. Nws zaum hauv nruab nrab cov kws txoj cai, nws mloog lawv thiab nug lawv. Cov neeg uas tau hnov Yes Xus hais lus, puav leej yoob tas rau nws lub tswv yim ntse thiab nws cov lus teb. Thaum nkawd pom Yes Xus nkawd xav tsis thoob thiab Mab Liab hais rau Yes Xus tias :
“Me tub, vim li cas koj ua li ntawd rau wb ? Saib seb ! Koj txiv wb nrhiav koj, wb ntxhov siab tas nrho.” Qhov ntawd yog Mab Liab nthuav tawm txog nkawd txoj kev ntxhov siab. Nws kuj zoo ib yam li As Nas tso nws tus tub rau Tswv Ntuj.
Peb yuav los mloog seb Yes Xus hais li cas. Yes Xus hais tias : “Vim li cas neb nrhiav kuv ? Neb tsis paub tias kuv yuav leg kuv txiv cov hauj lwm lod ?” Mab Liab thiab Yos Xes nkawd tsis to taub cov lus uas Yes Xus hais rau nkawd. Peb yuav nkag siab tias Mab Liab thiab Yos Xes nkawd yog niam yog txiv, nkawd ntshai thiab txhawj npaum li cas. Thaum nkawd hnov Yes Xus hais tias : “Ua cas neb ntxhov siab, neb puas paub tias kuv yuav tsum nyob hauv kuv txiv lub tsev ?”
Cov lus no ua rau nkawd xav tsis thoob thiab ceeb loj kawg. Tab yog peb tus me nyuam hais li ntawd rau peb, los ntshe peb yuav ceeb thiab xav tsis thoob ib yam.
Tam sim no peb to taub meej txog ob zaj no thiab qhov kuv xub hais thaum pib yog tej zaj no, yog kev hlub hauv yim neeg nyob hauv Ntawv Ntshiab. Peb kheev kheev xav txog kev nyiam kev hlub nyob hauv yim neeg thiab kuv tsis tau tiv txog, vim qhov ntawd yog ib feem hauv peb txoj kev xav. Nws muaj tshwm sim nyob hauv ob zaj peb hais no. As Nas thov Ntuj tas zog thiab nws quaj, vim nws xav tau ib tug me tub. Mab Liab ntxhov siab thiab nws txhawj, vim nws nrhiav tsis tau nws tus tub. Tas ob zaj no puav leej yog kev hlub nyob hauv yim neeg. Qhov no peb yuav xav tias yog kev zam rau ib tug neeg, kom nws tau ua nws cov hauj lwm tiav raws Tswv Ntuj lub hom phiaj.
Zaj hais txog Xas Muas thiab Yes Xus, yog kev ua raws Tswv Ntuj lub hom phiaj. Nws tseem ceeb dua kev nyiam kev hlub hauv yim neeg. Kuv thov hais rau nej tias : kev ua raws Tswv Ntuj lub hom phiaj nws tseem ceeb tshaj txhua yam. Vim Ntawv Ntshiab yeej txhua yam thiab kev nyiam kev hlub. As Nas yog ib tug neeg tseem ceeb, nws yog tus neeg siab ntshiab nyob hauv Ntawv Cog Lus Qub. Vim li cas peb thiaj hais li ntawd ? Vim nws muab nws tus tub rau Tswv Ntuj.
Tam sim no peb paub zaj no meej lawm, thov peb txhob tso peb txoj kev xav los kav peb nyob hauv txoj kev nyiam kev hlub peb tej me nyuam. Yog peb ua li ntawd, dab tsi yuav tshwm sim ? Yuav ua rau lawv ua tsis taus pa, vim peb tsis tau tso kom lawv tau kev ywj siab. Tsis tau tso kom lawv tau ua tej yam uas Tswv Ntuj xav kom lawv ua.
Yog As Nas tsis tso Xas Muas mus, peb yuav tsis muaj tus vaj Das Vis uas Xas Muas pleev tseg. Txoj kev cawm yuav tsis muaj thiab cov His Xas Lais yuav tsis muaj tus yaj saub tshaj Tswv Ntuj cov lus. Tas txhua yam no yog paj tshab los ntawm As Nas. Qhov muaj nqis ntawm As Nas tsev neeg uas nws tso nws tus tub ua nws cov hauj lwm yog qhov tseeb rau Yes Xus. Yog tias As Nas txoj kev xav nrog Mab Liab, Yos Xes thiab Yes Xus raug kav, mas lawv yuav tsis muaj hnub tau kev ywj siab nyob hauv Tswv Ntuj lub tsev thiab ua yam Leej Txiv xav kom lawv ua. Qhov ntawd yog qhov tau hnov lub zog hauv ntawv Moo Zoo ua hauj lwm thaum Yes Xus muaj 12 xyoos. “Vim li cas neb nrhiav kuv ? Neb tsis paub tias kuv yuav tsum nyob hauv kuv Txiv lub tsev lod ?” Ntau xyoo dhau los, kuv tau hnov coob leej hais tias yog kuv, mas ntshe kuv twb npuaj nws ntsej muag lawm. Vim thaum ntawd lawv npau taws rau zaj ntawd. Tab sis Ntawv Ntshiab coj peb mus rau qhov chaw tshiab thiab tob dua ntawd. Qhov muaj nqis tiag hauv tsev neeg raws Ntawv Ntshiab yog dab tsi ? Nws yog kev tso tseg, nws yog kev tso kom tau ua Tswv Ntuj cov hauj lwm.
Thaum kuv tab tom khaws cov lus no, kuv niam tau tag sim neej xyoo tag los lawm. Nws muaj kev xav tob kawg hais txog zaj no. Kuv niam kuv txiv muaj kev xav ntau ntau yam txog tej me nyuam. Nkawd xav kom peb nyob hauv tsev tas mus li. Tab sis kuv niam ib txwm hais tias : txhob ua li ntawd. Lawv yuav tsum nrhiav kom pom lawv txoj hau kev. Thov kom Tswv Ntuj foom hmoov zoo rau nws, vim nws zoo ib yam li As Nas. Nws muaj kev hlub tob tshaj qhov peb xav thiab nws tsis kav me nyuam, ces tsim nyog peb yuav txhawb zog rau nws, kom nws nrhiav pom nws cov hauj lwm raws li Tswv Ntuj lub hom phiaj.
