Qhia txog lub Caij Tos Huab Tais 3 (Introduction to the liturgical season of Advent)

Kev rov tuaj ntawm Yes Xus, yog kev cia siab mus ib txhis.

Zaj teev Ntuj hauv lub caij no, yog xyaw cov lus txhais. Tshwj xeeb tshaj yog nyob hauv ntawv His Xais uas hais txog cov lus cog, lus nplij siab thiab kev tso siab rau cov neeg uas tab tom raug sim nyob hauv kev raug ntiab. Kev raug tso tseg thiab kev piam sij hauv kev rhuav Yes Lus Xas Les uas yog lub tuam ceeb ntshiab. Kev rhuav tshem hauv kev ua Tswv Ntuj haiv neeg. Hais txog cov His Xas Lais, mas nov yog lub caij tu siab thiab tsis tso siab. Li ntawd, tib neeg thiaj raug caw kom tos txog hnub Tswv Ntuj yuav tawm tuaj, ib yam li kev tsiv ntawm Hais Nkws Tos teb uas tos txog tus daws tso thiab tus cawm kom dim.

Kev tuaj hauv tus neeg tshiab, tsis yog lub caij kawg xwb. Tab sis yog tus Mes Xias uas yuav ua Tswv Ntuj tub txib. Nws yuav ua raws cov lus cog thiab kev cia siab hauv txheej neeg muaj kev thaj yeeb thiab nyab xeeb.

Cov lus txhais no yuav rais ua qhov tseeb nyob hauv Yes Xus. Cov His Xas Lais kev cia siab tseem muaj nyob thiab cuam tshuam txog peb cov neeg ntseeg tas mus li. Nyob hauv cov liv xwm uas peb pom, thiab hauv txhua yam xwm txheej uas ua kev kub ntxhov rau peb kev ua neej nyob. Txhua lo lus cog thiab txhua lo lus txhais, tsis hais hauv cov His Xas Lais los sab nraud, puav leej rais ua qhov tseeb rau peb thiab yog qhov tseeb tseem uas tshwm sim. Yog cov lus cog tab tom rais ua qhov tseeb. Thawj yam tseem ceeb tshaj hauv kev tsuj xeeb lub Cim Yug, thiab nyob siab dua txhua yam hauv Leej Ntuj Plig Ntshiab cov hauj lwm, ua kom tas cov liv xwm rais ua Tswv Ntuj lub Ceeb Tsheej.

Lub Caij Tos Huab Tais, yog tus qauv ntawm kev tos.

Lub Cim uas ua kom nco txog lub Caij Tos Huab Tais, yog cov neeg muaj suab nto npe. Yog tus neeg tseem ceeb nyob hauv Ntawv Ntshiab. Xws li Mab Liab uas yog Yes Xus niam, Yos Xes uas yog Mab Liab tus txiv, Zam Ntxuav Plig thiab His Xais. Dhau no lawm tseem muaj lwm tus neeg uas tuaj yeem muab los qhia rau cov neeg ntseeg tias ; lawv yog tus piv txwv ntawm kev tos thiab ceev faj. Xws li Es Lis Xas Npes thiab Ntxas Kas Lias uas yog tus txheeb ze Mab Liab. As Nas tus txwj laus qhia kev ntseeg. Xis Mes Oos tus neeg nyiam teev Ntuj thiab cov zov yaj nyob Npes Les Hes. Dhau no lawm tseem tshuav Tswv Ntuj cov neeg pluag txom nyem coob coob suav tsis txheeb, uas lawv cia siab txog txoj kev daws tso no. Tsis hais hauv tej keeb kwm thiab hauv lawv lub cev nqaij. Ces peb yuav xaus qee yam ntawm cov piv txwv muaj txiaj ntsim qab hau nyob hauv kev qhia kev ntseeg.

Hais txog His Xais

Nyob hauv lub Caij Tos Huab Tais, peb nyeem phau ntawv His Xais yuav luag tas. His Xais yog tus Yaj Saub uas peb ntxim siab tshaj, ib yam li cov His Xas Lais raug ntiab nyob Npas Npis Los uas lawv tos txog kev cawm. His Xais cov lus kheev kheev ntsia pom txog yav tom ntej hauv kev cia siab. Yog kev nplij siab rau Tswv Ntuj haiv neeg. Nws hais txog tas Tswv Ntuj txhua lo lus nyob hauv cov lus cog. Nws thov kom muaj kev zoo siab tas mus li nyob hauv lub caij tos, lub caij nrhiav, lub caij mus kev, lub caij sib ntsib uas yuav mus txog qhov zoo txhij txhua.

His Xais yog pov thawj ntawm kev cia siab. Nws tshaj txog kev thaj yeeb uas Tswv Ntuj tus Mes Xias yuav coj tuaj. Nws cov lus ua kom pom txog kev rov tsiv teb tsaws chaw hauv teb chaws suab puam. Kev rov los nyob nyab xeeb thiab kev rov txhim Tswv Ntuj lub tuam ceeb. Kev nyeem thiab mloog His Xais cov lus, ua kom peb tig mus rau qhov chaw Tswv Ntuj nyob. Peb maj mam paub thiab nrog Tswv Ntuj sib ntsib, kom txhob sib nrug, txhob txawv ntsej muag thiab sib swm ntau dua qub.

Yog qhov zoo heev uas tau pom kev siv phau ntawv His Xais nyob hauv cov kab ke. Yog cov zaj nyeem ua ntu zus nyob hauv cov Txoos niaj hnub, hauv lub Caij Tos Huab Tais.

  Hais txog Zam Ntxuav Plig.

Cov kab ke no qhia tias ; Zam yog ib tus neeg tseem ceeb. Nws npaj txoj kev rau tus Mes Xias yuav tuaj nyob hauv peb, kom tas ib zeej tsoom neeg tau ntsib nws, vim nws yog tus Yaj Saub kawg. Nws tau tshaj txog cov Yaj Saub dhau los thiab thov kom sawv daws hloov siab. Ntawv Ntshiab hais txog Zam tias ; nws yog lub suab nqua hu kom muaj kev tsiv teb tsaws chaw ncaj ncees thiab rov sib haum xeeb nrog Tswv Ntuj. Zam yog tus Yaj Saub uas txhim tsa tau txhua yam tiag tiag. Nws ua kom ib zeej tsoom neeg pom txog Tswv Ntuj tus Yaj, tus uas yuav ris tas ntiaj teb neeg cov txhaum. Zam cov lus qhuab qhia yog kev tshaj lub Moo Zoo hauv kev ua tim khawv tseeb tiag. Nws yuav pauj kev ncaj ncees tseeb tiag nyob hauv nws lub neej.

Hais txog Yos Xes.

Hauv Ntawv Ntshiab tsis tshua hais txog Yos Xes ntau pes tsawg, tab sis yeej muaj txaus qhia kom peb nkag siab txog zaj piv txwv no.

Yos Xes yog tus teeb lo lus nug txog yam yuav tshwm sim rau nws. Nws muab siab rau txog lub Cim qhia tias Tswv Ntuj nyob hauv nws lub neej.

Yos Xes yog tus txiv neej ywj pheej thiab qhib siab mloog Tswv Ntuj lus, kom cov lus ntawd rais ua qhov tseeb tiag nyob hauv nws lub neej.

Yos Xes yog tus tsis ua xyem xyav txog Tswv Ntuj, nws ruaj nreb rau tej yam ntawd. Nws cia Tswv Ntuj ua tus coj kev.

Hais txog Mab Liab.

Cov neeg ntseeg ntseeg tias Mab Liab muaj tus cuj pwm raws li kev ntseeg. Thiab nyob hauv lub Caij Tos Huab Tais, Mab Liab yog tus piv txwv qhia txog kev ceev faj. Vim tsis muaj lwm tus poj niam zoo li Mab Liab, nws cia siab txog tus Mes Xias xeeb nyob hauv nws lub cev 9 lub hlis.

Txawm li cas kuj xij, nov yog kev cia siab hauv lub siab. Nyob hauv Mab Liab, mas peb sawv daws tos txog kev cawm thiab kev daws tso. Thaum lawv noj tshoob nyob Kas

Nas, Mab Liab hais kom Yes Xus muab dej txia ua cawv txaus lawv haus, vim nraug vauv cov cawv tas lawm. Cov kab ke tseeb tshaj ntawm Niam Mab Liab hauv lub Caij Tos Huab Tais, yog kev tawm tuaj ntawm nws thiab yog nws tus piv txwv.

Hnub tsuj xeeb Niam Mab Liab yog hnub tim 8 lub 12 hlis. Txij hnub tim 17 txog 24 lub 12 hlis, kev tawm tuaj ntawm Mab Liab ntau zaus nyob hauv kev nyeem Ntawv Ntshiab thiab kev teev Ntuj. Xws li nws lub cev xeeb tub thiab yug Yes Xus. Zim txwv no lub Koom Txoos tseem xeeb nws nyob hauv cov neeg ntseeg. Peb yuav cav txog nws nyob hauv peb cov lus thov Ntuj. Tus puv txiaj ntsim, tus tau txais koob hmoov ntau tshaj ib zeej tsoom poj niam huv tib si. Nws yog tus nkauj xwb uas yog Yos Xes poj niam. Tus yog Tswv Ntuj tus ntxhais txib. Yog tus poj niam tshiab thiab yog tus Es Vas tshiab. Yog Xis Yoos leej ntxhais. Tus nkauj xwb hauv kev tos txais Tswv Ntuj. Tus nkauj xwb hauv kev muab siab rau mloog.