Qhov Game ntawm kev txaus siab.
Hnub no kuv xav nrog nej tham hais txog ib qho uas yog qhov tseem ceeb, nws yog zaj hais txog kev khav theeb thiab kev daws kho nws. Kuv hais tias tseem ceeb heev, vim kuv tsis pom ib tug xib hwb twg tsis hais txog qhov teeb meem uas peb muaj, yog kev khav theeb. Muaj tseeb tiag uas lawv tau txais qhov no los ntawm qhov pov thawj nyob hauv Ntawv Ntshiab. Nws muaj dab tsi tshwm sim rau peb ? Kev txhaum uas yog qhov phem tshaj. Qhov kev txhaum ntawd, yog qhov sawv daws lees txais tias yog kev khav theeb. Kuv pom tias peb kheev kheev hais tias : “Oh, nws yog kev ntshaw.” Nws yog qhov peb kheev kheev ua txhaum ntawm poj niam thiab txiv neej loj kawg. Yog kev txhaum loj heev. Kev txhaum ntawm kev sib deev, nws yog teeb meem loj. Thov txhob nkag siab kuv yuam kev, vim tsis muaj ib tug xib hwb twg hauv fab ntsuj plig yuav hais tias kev ntshaw los kev txhaum hauv kev sib deev yog txhaum loj tshaj. Kev txhaum uas phem tshaj yog kev khav theeb muab hlob.
Ntawv Ntshiab kheev kheev hais txog qhov no.
Kev khav theeb muab hlob yog dab tsi ? Tos Mas hais tias nws yog kev hlub tus kheej ntau dhau los yog txawv txav. Kev hlub tus kheej uas raug cai yog dab tsi ? Muaj tseeb tiag uas kev hlub tus kheej ntau dhau, yog kev muab hlob. Leej Ntshiab Aus Nkus Tis Nus hais tias : “Thaum koj to hau ntsoov rau koj tus kheej, mas yog kev muab hlob. Kuv kuj hais li no thiab. Qee zaus nws kuj yog kev xav uas txwv kom peb txhob pom qhov tseeb. Nws raug yus txoj kev xav npog tas. Nws yog kev muab hlob ntawm peb uas ua kom peb txhob pom txog qhov tseeb. Nws zoo li lub neej nyob hauv fab ntsuj plig nqaim nqaim. Tej zaum kuv yuav siv lo lus paj lug hais txog qhov tsaus ntuj uas rub tas txhua yam los rau tus kheej. Tiag tiag mas tsim nyog yuav tawm mus rau lub ntuj dav, tab sis nws raug rub mus rau qhov chaw nqaim. Kev ntxhov siab ntawm kuv, nws yog kev muab hlob. Nws yog qhov laij thawj tias vim li cas thiaj yog txhaum loj. Nws yog los qhov twg los ?
Kuv ib txwm nyiam Paul Tillick cov lus uas nws hais tias : “Kev muab hlob tshwm sim los ntawm kev ntshai.” Sim xav seb, kev txwv yog kev ntshai. Peb yog cov pluag txom nyem, peb raug hem, peb tsis tuaj yeem vam khom tus kheej tau. Li ntawd, peb thiaj muaj tus xeeb ceem zoo li tej tsiaj tus xeeb ceem uas tiv thaiv tus kheej tsis tau. Peb tsim phab ntsa thiab tej yam los thaiv, peb tig nrob qaum rau lub ntiaj teb. Peb rais ua neeg cam thawj thiab hais tiag tias vim kev ntshai. Yes Xus tau hais li cas ? Kev nyiam kev hlub uas zoo txhij txhua, yuav rhuav tshem txhua yam kev ntshai tawm mus. Hom tshuaj kho kev muab hlob, yog kev ua neeg me. Peb nkag siab txog kev ua neeg me sab nraud, tab sis tus yawm sij tseem ceeb yog los ntawm lo lus Humilitas los yog humos, uas txhais tias zoo li av. Nws puas yog txaus luag ? Tej zaum nej yuav xav tsis txog zaj no, av uas txawj ua neeg me nws tau chwv txog qhov tseeb. Sim xav txog cov neeg ua liaj uas lawv txhais tes raus nyob hauv av, lawv tau kov txog qhov tseeb. Ntawd yog kev ua neeg me. Peterson hais tias : “Kev muab tus kheej saib hlob, hauv kev ntseeg yog zoo li kev txom nyem.” Ntawd yog qhov uas ntawv Moo Zoo muab rau peb. Peb muaj tej zaj zoo zoo uas Yes Xus piav rau peb, Yes Xus hais tias :
“Thaum koj raug caw ntawm ib tug neeg twg, kom mus koom noj tshoob, koj txhob xaiv lub rooj uas muaj meej mom pem hauv ntej. Koj yuav mus zaum lub rooj uas qis tshaj.” Peb paub tias Yes Xus tab tom hais txog dab tsi. Li ntawd, hauv rooj tshoob txhua tus puav leej nyob ntawd, vim nws yog qhov chaw sawv daws nyob ua ke. Cov neeg muab hlob li peb xav tau dab tsi ? Peb xav tsa peb tus kheej nyob siab, peb txuag tus kheej. Yog koj xaiv kev taug hauv fab ntsuj plig, koj yuav pom yam no tau nyob txhua qhov chaw. Kuv yuav hais ib qho piv txwv txog lub ntiaj teb uas kuv paub puas tau ? Nws yog lub Koom Txoos. Kuv tsis tau xaiv lub Koom Txoos, vim lub Koom Txoos Kav Tos Liv yog qhov chaw siab heev. Peb muaj tus coj, muaj Txiv Plig, muaj Tswv Qhia, muaj Tswv Qhia Liab thiab nyob hauv cov Tswv Qhia Liab kuj muaj ib tug thawj coj. Vaj Qhia yog tus loj thiab nyob siab tshaj txhua txheej. Peb muaj kev teeb ua txheej ua theem zuj zus zoo heev.
Yog koj coj kev khav theeb muab hlob tuaj, nws yuav muaj dab tsi tshwm sim ? Sawv daws tab tom sib txeeb qhov chaw siab thiab leej twg yuav raug xaiv nyob qhov chaw siab ? Kuv nco tau tias ntau xyoo tag los, kuv tau mus ib qho hauj lwm nyob Los Mas. Kuv mus koom kev sib tham thiab kuv mus txog ntxov. Lawv twb npaj cov rooj zaum txhij lawm. Kuv thiaj xaiv chaw zaum uas tsis yog zaum pem hauv ntej, tab sis nws kuj nyob pem hauv ntej thiab. Vim kuv xav tau ib lub rooj zaum kom zoo zaum, tab sis muaj ib tug txiv neej yuag tsawg los hais rau kuv tias : “Nov yog cov Tswv Qhia Liab thiab cov Tswv Qhia lawv li chaw zaum.” Ces nws coj kuv mus zaum nram qab uas yog cov Txiv Plig txheej qis zaum. Qhov ntawd yog ib tug piv txwv rau kuv. Peb kheev kheev ua li ntawd, vim peb xav tsa peb tus kheej kom nyob siab. Tab sis thaum ntawd, kuv tsis tau xav li ntawd. Kuv tsuas yog xav tau ib lub rooj zoo zaum me ntsis xwb.
Kuv nco txog ib lo lus ntawm Oscar Wilde uas nws hais tias : “Ib yam uas phem tshaj yam koj xav tau, yog tau yam koj xav tau.” Kuv pom tias qhov no tshwm sim nyob hauv kuv lub neej thiab lwm tus lub neej. Yam uas kuv xav tau, qhov kawg kuv kuj tau thiab txaus siab. Thaum kuv tau lawm, kuv tsuas zoo siab ob peb hnub xwb. Dhau ntawd kuv kuj xav tias nws yog yam phem tshaj uas yuav tshwm sim rau kuv. Ces ua rau kuv txom nyem siab thiab tsis zoo nyob kiag.
Yes Xus hais li cas ? Kuv paub tias thaum koj nkag mus hauv kem tsev hauv rooj tshoob, kuv paub tias koj txoj kev khav theeb muab hlob yuav qhia dab tsi. Koj xav mus zaum qhov chaw siab tshaj. Vim li cas ne ? Vim koj tab tom xaiv yuav tawm ntawm Game mus. Kev tua Game ntawd yuav ua kom koj kub ntxhov, tsis hais koj yuav muaj peev xwm thiab tsis muaj. Tsis hais koj yuav yeej los yuav swb. Kev tua Game yam txaus siab, kev qhuas tus kheej thiab kev nrhiav lub meej mom yuav ua kev piam sij rau koj. Kuv thov rov qab piav txog qhov no me ntsis, muaj ib zaj yeeb yaj duab nyob hauv xyoo 1980. Kuv xav tias lub npe Game sib tua tej zaum nws yog qhov pib nyob hauv hlwb hlau los yog Computer. Ces peb sawv daws puav leej nyiam hlwb hlau. Qhov no nws yog ib zaj ntawm ib tug me nyuam tub uas nyiag nkag mus hauv kev tiv thaiv teb chaws NORED. Nws ua kev kub ntxhov rau fab Nuclear ntawm peb. Raws li kuv nco tau, qhov Climax los yog qhov nyuab hauv zaj yeeb yaj duab no yog lawv nyob NORAD. Txhua yam tab tom ua mus thiab pib ntawm kev tua Nuclear. Pib ntawm As Mes Lis Kas xub tua los yog Lav Xias xub tua. Lub nroog no thiab lub nroog tod yuav muaj dab tsi tshwm sim. Dhau ntawd lawv ntsia lub hlwb hlau, lawv pom txhua yam tshwm sim ntau txhiab ntau vam nyob ntawm lawv lub ntsiab muag. Tias leej twg yog tus yuav yeej Nuclear thiab zaj yeeb yaj duab kuj xaus. Ntawm lub hlwb hlau yuav muaj suab nrov tias ; ib qho hauv kev yeej, yog txhob tua Game.
Kuv rov qab hais kab lus no dua, vim nws cuam tshuam txog fab ntsuj plig. Nws muaj qhov Game uas peb sawv daws nyiam ua si. Peb sawv daws puav leej yog neeg txhaum. Peb saws daws puav leej muaj kev khav theeb muab hlob thiab kev ntshai. Li ntawd, peb thiaj tiv thaiv txuag peb tus kheej thiab sib tw kom tau qhov chaw. Tab sis tib txog kev yuav yeej qhov Game no, yog txhob tua Game. Thov tawm ntawm qhov Game los. Koj yeej paub zoo tias kuv tab tom hais txog dab tsi ?
Nqes ntawm koj daim phiaj los thiab koj paub tias kuv tab tom hais txog dab tsi ? Kuv tsis quav ntsej tias koj yog tus tsim vaj tse cuab tam, koj yog kws kho mob, koj yog neeg txawj ntse, tsis hais koj yuav nyob rau qhov twg, koj yeej paub tias kuv tab tom hais txog dab tsi. Koj tuaj yeem muab koj lub neej coj los rau qhov Game no tias : leej twg nce leej twg nqis thiab leej twg tau ntsej muag, leej twg poob ntsej muag. Kuv nyob saum qhov siab tshaj thiab sawv daws pom kuv. Ua ntej koj yuav paub, koj twb poob rov los lawm. Txhob kov Game no. Ntawd yog qhov Yes Xus tab meeg hais. Kom koj nyob ntawm qhov chaw qis tshaj. Thov muab siab rau txhob kov Game no. Thov yog qhov xaus. Peb coob leej yog neeg txhaum, peb siv sij hawm thiab siv zog ntau kawg rau kev muab siab rau txog lwm tus. Los yog ua kom cov neeg nyob ib ncig peb xav tias peb yog tus neeg tshwj xeeb. Thov hnov qab mus, vim nws yog kev nkim sij hawm dag. Koj tab tom muab tag koj txoj kev sov siab rau kev xav uas tsis meej tseeb ntawm lwm tus. Thov txhob ua li ntawd. Koj yuav nrhiav yam uas ua kom Tswv Ntuj txaus siab, vim ntawd yog txoj kev ua neeg me.
Kwv tij Hmoob sawv daws ! Hnub no peb tham txog kev ua si hauv kev txaus siab los xaus li no xwb. Thov nej khaws kab lus kawg no tseg ! Nej yuav nrhiav yam uas ua kom Tswv Ntuj txaus siab, txhob ua neeg khav theeb thiab muab hlob. Vim kev khav theeb muab hlob yog kev txhaum. Nej yuav ua neeg me nyob ntawm ib tsoom neeg thiab ntawm Tswv Ntuj xub ntiag. Thov Huab Tais Yes Xus Pleev lub txiaj ntsim nrog nej nyob, ua nej siab kaj lug. Lwm zaus peb mam sib ntsib dua, nej sawv daws nyob zoo.
