Yes Xus txais lub Cim Ntxuav. (Jesus baptism)
Hnub no peb yuav los tham txog Yes Xus txais lub Cim Ntxuav, vim nws yog qhov tseem ceeb heev. Nyob hauv plaub phau ntawv Moo Zoo puav leej hais txog Yes Xus txais lub Cim Ntxuav. Zam Ntxuav Plig yog zoo li lub qhov rooj uas peb yuav tsum chaws mus kom tau koom nrog txog Yes Xus. Yam kuv hais nyob hauv cov lus nthuav thiab zaj peb nyeem hnub no, yog nyob hauv Lus Kas ntawv Moo Zoo. Nws muaj qhov txawv me ntsis ntawm lwm zaj hais txog kev txais lub Cim Ntxuav thiab nws tseem ceeb kawg. Thawj yam uas kuv xav soj ntsuam nyob hauv zaj no, yog qhov Yes Xus txais lub Cim Ntxuav. Nws yog kev txaj muag uas zam tsis dhau. Nov yog thawj pab neeg ntseeg uas lawv sau hais txog lawv tus Mes Xias, txog Tswv Ntuj thiab lawv kom Yes Xus txais lub Cim Ntxuav ua kev tig los yuav lub siab tshiab. Lawv kom Yes Xus sawv nyob nruab nrab hauv cov neeg txhaum thiab nrhiav lub Cim Ntxuav tig los yuav lub siab tshiab ntawm Zam Ntxuav Plig.
Zam pom Yes Xus nws hais rau Yes Xus tias : “Kuv yog tus yuav thov kom koj ntxuav kuv, vim li cas koj thiaj tuaj nrhiav kuv ?”
Vim li ntawd thiaj yog qhov txawv thiab txaj muag. Tsis kav lawv kuj muab sau nyob hauv ntawv Moo Zoo, kom peb yuav tsum lees txais qhov tseeb. Nov thiaj yog qhov txawv txav thiab qhov ntxim siab tim 2 hais txog lub Cim Ntxuav, yog qhov tias Zam Ntxuav Plig ua dab tsi nyob hauv teb chaws suab puam ? Zam Ntxuav Plig yog Ntxas Kas Lias uas nws yog ib tug yaj saub tus tub. Yog tias koj yog yaj saub, mas koj yuav muab kiag koj tus yaj saub rau koj tus tub ua. Qhov loj tshaj ntawd yog Zam Ntxuav Plig niam raug ntsia tias nws kuj yog ib tug nyob hauv cov yaj saub thiab. Tus neeg no yog tseem yaj saub tiag. Li ntawd, lo lus nug tseeb yog qhov tias :
“Vim li cas nws ho tsis nyob hauv lub tuam tsev teev Ntuj uas cov yaj saub nyob, nws mus ua dab tsi nyob teb chaws suab puam ?”
Tam sim no peb yuav los kawm kom paub txog cov liv xwm me ntsis, yog hais txog tus neeg loj thiab txaus ntshai nyob hauv His Xas Lais liv xwm. Kuv hais txog tus neeg muaj zog thiab tseem ceeb. Kuv tab tom hais txog tus vaj Hes Los. Hes Los nce ua vaj lub caij Los Mas nto npe thiab tab tom muaj zog. Nws raug faib los ntawm Mark Anthony thiab Octavian tom qab nyiag tua Julius Caesar. Chiv thawj lawv yog phooj ywg, tab sis tsis sib raug zoo. Tom qab lawv rais ua yeeb ncuab sib ntaus sib tua thiab mos deev tej poj niam ua lwj liam. Hes Los yog tus neeg muaj tswv yim uas tiv Octavian thiab Anthony. Hes Los xub txhawb nqa Anthony, tab sis thaum Anthony swb, mas Hes Los mus tuaj Octavian tog. Lub caij ntawd, nws tau ua tus kav cov His Xas Lais nyob Yus Das qab teb. Nws tab tom ua dab tsi ? Lub caij ntawd nws tab tom tsim kom nws muaj meej mom nyob hauv nws kev ua vaj thiab tshaj ntawd, nws tab tom txhim lub tuam tsev teev Ntuj tshiab. Nco ntsoov tias peb hu ua phab ntsa quaj taug. Zim txwv no yog sab phab ntsa xov lub tuam tsev teev Ntuj uas raug Hes Los txhim kho dua tshiab tib xyoos ntawd. Xws li 20 los 30 xyoo ua ntej Yes Xus yuav yug los. Tam sim no koj yuav pom tias muaj dab tsi txawv txav nyob hauv zaj ntawd. Nws tsis yog ua sawv daws tub txib zoo xwb, nws tseem yog tus txhim ntau lub tuam tsev zoo nkauj thiab. Koj yuav nyeem txhua yam nyob hauv kev ntseeg, koj vam dab tsi ntawm Mes Xias, koj yuav rov nco txog tus tshaj lub Moo Zoo thiab cov Nkauj Paj Nruag. Koj xav tau dab tsi los ntawm Mes Xias ? Yes Xus yuav yog tas tsoom His Xas Lais tus vaj. Yes Xus yuav rhuav lub tuam tsev teev Ntuj thiab rov txhim dua tshiab.
Hes Los tuag rau lub caij Yes Xus yug los. Li ntawd, zim txwv no thiaj yog ntu ntawm Zam Ntxuav Plig. Yog ntu txuas los ntawm Hes Los. Hes Los cov xeeb ntxwv yog cov ris thiab saib tas txhua yam hauv lub teb chaws thiab lub tuam tsev teev Ntuj. Ces cov Leej Choj nyob hauv lub tuam tsev teev Ntuj uas zwm rau Hes Los thiaj tawm tas. Lawv rhuav lub tuam tsev teev Ntuj thiab zim txwv no rov txhim dua lub tuam tsev teev Ntuj tshiab nyob teb chaws suab puam. Thov peb saib yam uas Zam tab tom ua. Qhov ntawd yog muaj neeg coob coob tuaj ntxuav txim txhaum ntawm Zam. Vim li cas koj thiaj mus Yes Lus Xas Les kom tau ntxuav koj cov txhaum ? Zam tab tom tshaj lub Moo Zoo rau lawv mloog ib yam li koj mus hauv tsev teev Ntuj thiab mloog nthuav ntawv Moo Zoo. Tam sim no koj tau hnov Zam cov lus nyob teb chaws suab puam, thiab qhov tseem ceeb tshaj lub Cim Ntxuav yog dab tsi ? Cov neeg mus tsev teev Ntuj puav leej paub tias yog kev da dej raws li Mikvah Mikvah. Yog lub dab da dej uas npaj koj tus kheej kom nquag mus tsev teev Ntuj, thov Ntuj thiab ua hauj lwm pab luag tej. Zam tsim nyog nyob hauv tsev teev Ntuj, tab sis nws tsis nyob, nws nyob teb chaws suab puam thiab nws ua cov kab ke ntxuav. Nws tab tom ntuas tsoom sid thiab ua lub Cim Ntxuav rau lawv, kom lawv txawj npaj txawj tu lawv lub siab.
Tam sim no kuv coj peb mus rau Zam ntawv Moo Zoo seb yog zoo li cas. Yes Xus tuaj ntawm ntug dej Yos Las Das, Zam pom Yes Xus nws hais tias :
“Saib seb, Tswv Ntuj tus yaj.” Thaum peb nyob hauv tsev teev Ntuj, thaum cev lub ncuav mov, peb kuj hais zoo ib yam li ntawd. Tam sim no Zam nyob hauv teb chaws suab puam nrog cov hauj lwm tshiab, yog kev ntxuav txhaum, kev qhuab qhia, kev da dej Mikvah. Nws hais tias : “Saib seb, Tswv Ntuj tus yaj”. Yes Xus yog tus yaj yuav los ua cov txim txi ntuj daws peb cov txhaum.
Vim li cas Yes Xus thiaj tuaj qhia peb ? Yes Xus tuaj kom tau kho thiab cawm peb. Tab sis ntau tus thawj coj hauv lub Koom Txoos hais tias Yes Xus tuaj kom tau tuag. Yes Xus tuaj xws li Tswv Ntuj tus yaj, kom tau ua txim txi Ntuj daws peb cov txhaum. Tam sim no peb rov los tham txog qhov kuv tau hais thaum lub hauv paus tias : kev txais lub Cim Ntxuav yog qhov txaj muag. Qhov ntawd tsuas yog thawj pab neeg ntseeg thaum ub thiaj xav li thiab lawv nrhiav lo lus teb. Vim li cas Tswv Ntuj Leej Tub thiaj nrog cov neeg txhaum nqes mus hauv tus niam dej Yos Las Das ? Qhov ntawd yog qhov Zam tau hnov. Yog tias muaj ib leeg muaj txhaum xwb, nws yuav tsis yog lo lus teb. Yes Xus yog Tswv Ntuj tus yaj, thaum koj coj tus yaj mus hauv tsev teev Ntuj. Koj yuav coj tus yaj tsis muaj qhov chaw tib mus cev rau tus Leej Choj. Tus yaj yuav raug txiav caj dab thiab raug phua. Lawv yuav muab ib lub tais los cug ntshav thiab muab hliv ywg lub thaj txi Ntuj. Tom qab ntawd tus yaj yuav raug hlawv ua txim txi Ntuj. Qhov no yog qhov tshwm sim rau peb txhua tus tej siab ntsws thiab fab ntsuj plig. Thaum ntawd cov neeg uas tuaj lawv tau muab tas lawv cov txhaum coj los tso rau saum tus yaj txi Ntuj uas yog tus yaj dawb huv. Peb yuav xav tias qhov uas tshwm sim rau tus yaj ntawd, tsim nyog yuav tshwm sim nyob hauv peb. Tab sis tus yaj raug hlawv ua txim txi Ntuj, mas yog lub Cim ntxuav kev txhaum. Nws cov ntshav raug hliv thiab nws lub cev raug cev ua txim txi Ntuj, kom tau ntxuav kev txhaum. Thaum Yes Xus tawm tuaj ntawm tus niam dej Yos Las Das, mas Zam tau tshaj tias Yes Xus yog Tswv Ntuj tus yaj. Ces qhov tshwm sim hauv Yes Xus lub neej thiaj yog qhov tseeb tiag. Yes Xus cov ntshav ntws tawm los thiab nws lub cev yog txim txi Ntuj nyob saum Ntoo Cuam. Hmo ua ntej Yes Xus yuav tuag uas lawv noj Pluas Hla, Yes Xus tuav lub ncuav mov thiab nws hais tias : “Nov yog kuv lub Cev uas yuav muab rau nej.” Thiab Yes Xus tuav lub ntim, nws hais tias : “Nov yog lub ntim rau kuv cov ntshav, yog cov ntshav yuav ntws los daws nej cov txhaum.” Txhais tias tas Yes Xus lub neej thiab txoj sia yog hais txog ua txim txi Ntuj, vim peb cov txhaum.
Tam sim no peb pom lawm tias vim li cas Yes Xus thiaj nyob nraim ntawm cov neeg txhaum ib sab yam tsis txaj muag ? Tab txawm yog tus me nyuam yaj dawb huv, tsis kav cov txhaum ntawm kev txi Ntuj kuj nyob tas hauv nws. Yes Xus yog tus ris tas lub qab ntuj neeg cov txhaum thiab nws txaus siab. Yes Xus txais lub Cim Ntxuav, vim yog lub qhov rooj uas nws yuav tsum tau chaws mus. Yes Xus lub Cim Ntxuav yog daim iav ua kom peb nkag siab txog zaj no meej kawg. Tam sim no peb tawm ntawm Yes Xus lub Cim Ntxuav mus rau lub thaj txi Ntuj, thaj txi Ntuj yog dab tsi ? Lub thaj txi Ntuj yog peb qhov chaw nrog Yes Xus sib ntsib, yog hais txog lub Moo Zoo. Yog thawj ntu nyob hauv lub thaj txi Ntuj. Yog cov lus Yes Xus hais rau peb nyob hauv ntawv Moo Zoo, thiab peb teb Yes Xus cov lus nyob hauv cov Nkauj Paj Nruag.
Yam peb pom nyob hauv lub thaj txi Ntuj, yog qhov xaus tas txhua yam ntawm Yes Xus txoj kev tuag. Nws tau daws tas lub ntiaj teb neeg cov txhaum. Yog ib qho tshwj xeeb uas txhua txhua xyoo peb siv sij hawm rau Yes Xus lub Cim Ntxuav. Peb yuav xav tias yog qhov txawv txav, qhov ua xyem xyav thiab txaj muag. Tab sis vim tej kev ua li no thiaj ua kom Yes Xus pab peb dim ntawm peb cov txhaum. Zam lub Cim Ntxuav kuj yog daim iav ua kom peb pom txog Tswv Ntuj tus yaj cov hauj lwm.
Kwv tij Hmoob sawv daws ! Hnub no zaj hais txog Yes Xus txais lub Cim Ntxuav, peb tham los xaus li no xwb. Lwm zaus peb mam rov sib ntsib dua !
