HNUB TIM 11 LUB 11 HLIS; HNUB NCO TXOG LEEJ NTSHIAB MAS TIS NUS NYOB TUJ
COV LUS NYOB HAUV LUS KAS NTAWV MOO ZOO (LK 17: 1-6)
Kwv tij Hmoob, lub Moo Zoo nej tau hnov nyob hauv hnub no mas muaj 3 lo lus kuv xav coj los hais rau nej.
Lo lus tim 1 yog lo lus tias ‘Tus coj kom luag ua txhaum mas nws txoj hmoov phem.” Lo lus tim 2 yog lo lus tias ‘Yog koj tus kwv thov txhaum,mas koj yuav zam rau nws.’ Thiab lo lus tim 3 yog lo lus tias ‘Koj txhab kev ntseeg rau peb mas!’
3 lo lus no yog cov lo lus peb zoo khaws coj los ntuas siab, kom peb taug tau Tswv Ntuj txoj kev uas yog txoj kev ntshiab.
Huab Tais Yes Xus paub zoo tias nyob hauv txhua tus neeg mas sawv daws yeej muaj lub siab phem siab tsis huv, sawv daws nyiam ua qhov txhaum ntau dua nyiam ua qhov zoo, sawv daws lub siab ib mus rau txoj kev txhaum. Yog li mas Huab Tais Yes Xus thiaj hais tias peb yuav cheem tsis tau kom txhob muaj kev coj luag tej mus ua txhaum: yam li peb pom ib tug kwv tij tsis hlub niam tsis hlub txiv, mas peb yuav cheem tsis tau kom nws txhob ua li ntawd; peb pom ib tug hluas ua tub sab tub nyiag, mas peb cheem tsis tau kom nws txhob ua tub sab.
Tab sis Huab Tais Yes Xus hais ntxiv tias peb cheem tsis tau, tab sis peb txhob coj kom luag ua txhaum. Lo lus no yog Huab Tais Yes Xus xav qhia peb kom ceev faj peb tus kheej tsam lam ua ib tug piv txwv tsis zoo rau lwm tus yoog raws. Yam li peb tsis txhob ua tus neeg tsis hwm niam hwm txiv, tsam peb cov me nyuam pom ces lawv yoog raws li peb tus yam ntxwv ntawd; peb txhob ua tub sab mas lwm tus thiaj tsis xyaum ua tub sab li peb.
Huab Tais Yes Xus hais tias yog peb tus kwv ua txhaum, peb cheem tsis tau tab sis peb muaj cai ntuas nws thiab qhuab qhia nws kom paub qhov twg yog thiab tsis yog. Yog tias peb tus kwv tij tsis hlub niam tsis hlub txiv ntawd tu siab rau nws cov txhaum, nws tig los thov txhaum ntawm peb mas peb yuav tau zam pub rau nws. yog peb tus kwv tij nyiam ua tub sab, nws xam pom nws qhov txhaum ces nws tu siab thiab thov kom peb zam rau nws, mas peb kuj yuav tau zam txhaum rau nws.
Peb ua li no mas lwm tus thiaj pom tias peb coj tau qhov zoo, ces lawv yuav kawm ntawm peb. Yog peb tsis zam txhaum, tab sis peb muab txim rau tus kwv tij tig los yuav siab tshiab, mas yog peb tab tom coj lwm tus kom mus ua qhov txhaum ntag. Peb yuav tau ceev faj!
Kwv tij Hmoob, peb yog neeg mas peb tsis muaj zog yuav tiv tau lub siab phem txoj kev ntxias, yog li niaj hnub peb thiaj yuav tau tsa ncauj hais rau Huab Tais Yes Xus tias “Huab Tais, koj txhab kev ntseeg rau peb mas, kom peb muaj ib lub siab ntseeg ces peb thiaj yuav rho tau kev txhaum tus cag tawm hauv peb nruab siab mus. Vim koj tau hais tseeb kawg tias ‘yog nej muaj kev ntseeg luaj li lub noob zaub roj, mas nej yuav hais tau rau tsob ntoo txiv pos no tias rho koj cov cag, koj tshais mus cog koj rau hauv dej ntuj; mas tsob ntoo pos yuav mloog nej lus’.”
