ZAJ NYEEM HNUB TIM 11 LUB 7 HLI 2025
HNUB NCO TXOG LEEJ NTSHIAB NPES NIS DIS NOS
COV LUS NYOB HAUV MAS TAIS NTAWV MOO ZOO (MT 10: 16-23)
Kwv tij Hmoob sawv daws, thaum peb hnov Huab Tais Yes Xus cov lus no, mas ua cas yuav yog ib cov lus ntxhib ua luaj! Tus yuav ua Yes Xus thwj tim nws yuav raug txom nyem npaum no diam lod? Ib zeej tsoom yuav ntxub nws tas npaud? Yog li peb puas tseem yuav ua Huab Tais Yes Xus thwj tim mus ntxiv?
Kwv tij Hmoob, tsis tas peb yuav ua Huab Tais Yes Xus cov thwj tim, los yog ntseeg txog Huab Tais Yes Xus, ces peb thiaj raug txom nyem raug hiam raug ntxub zoo li hais. Peb pom tias muaj ntau leej, lawv tsis ntseeg txog Huab Tais Yes Xus, lawv coj lwm yam kev teev hawm, tsis kav lawv yeej raug txom nyem ib yam thiab. Li ntawd, peb txhob hais tias ‘ntshai kuv yuav tsis ntseeg txog Yes Xus, kuv thiaj tsis ntsib kev txom nyem, kuv thiaj yuav tsis raug hiam, kuv thiaj tsis muaj chaw ntxub ntxaug nrog kuv tsev neeg.”
Huab Tais Yes Xus hais tias “Nej ua neeg xyuam xim xws li nab.”
Nab yog ib tug tsiaj nrawm, yog ib tug tsiaj tsis lam tau lam tom yog tias nws tsis xub raug thab ua ntej, nws yog ib tug tsiaj nyiam khiav zoo dua nrog lwm yam tsiaj sib tog. Yog li mas Huab Tais Yes Xus thiaj hais kom cov thwj tim yoog raws li nab tus yeeb yam; yog ua neeg xyuam xim, tsis txhob khav theeb, tsis txhob nrog luag tej muaj plaub mus ntug.
Huab Tais Yes Xus hais tias “Nej ua siab dawb xws li nquab.”
Nquab yog tus tsiaj ntse, tsis thab plaub, tsis ua kev kub ntxhov rau luag tej. Yog li mas cov thwj tim thiaj yuav yoog nqaub tus yeeb yam; yog ua neeg siab dawb, txawj ntse, nyiam tsim kev thaj yeeb.
Huab Tais Yes Xus kuj tseem hais cov lus kom cov thwj tim paub tias yog hnub twg lawv ntsib teeb meem los raug xwv txheej, mas kom lawv to taub tias nyob hauv lawv lub neej yeej yuav ntsib tej xwm ntawd. Tab sis, lawv yuav tso siab rau Tswv Ntuj, lawv yuav ua tiag nyiaj ris tej xwm phem ntawd. Tsis yog lawv tiv tib neeg, tab sis yog lawv tiv txoj kev txhaum nyob hauv neeg.
Kwv tij, peb cov ntseeg txog Yes Xus, peb yog nws cov thwj tim. Yog li Huab Tais Yes Xus thiaj xav kom peb ua neeg xyuam xim thiab ua neeg siab dawb, Huab Tais Yes Xus xav kom peb ua siab ntev tiv kom txhob poob rau hauv kev ua txhaum, mas peb yeej yuav tau txais kev cawm. Tab sis yog peb tiv tej yam phem luag ua rau peb tsis tau, peb cia li ua pauj rau luag, mas yog peb tab tom poob rau hauv dab phem kev ntxias mus ua txhaum; thaum ntawd peb yuav tsis tau txais kev cawm.
Kwv tij Hmoob sawv daws, txawm tias niaj hnub peb raug luag lwm tus hiam, raug lawv tsim txom, raug sawv daws ntxub; los peb txhob hiam lawv, txhob muab txim rau lawv, txhob ntxub tus ntxub peb ntawd. Peb yuav muab lub siab nyiam uas Tswv Ntuj cog rau hauv peb mush lub lawv. Peb ua li no, mas peb thiaj nyob tau koom nrog lawv mog.
Nyob zoo sawv daws
