ZAJ NYEEM HNUB TIM 12 LUB 2 HLIS 2025
HNUB PLAUB, LUB LIS PIAM 5 CAIJ NYOB NRUAB XYOO
HP 2: 4-9, 15-17; MK 7: 14-23
Kwv tij Hmoob, lub Moo Zoo hnub no mas Huab Tais Yes Xus qhia tias yam ua kom neeg tsis huv yog tej yam tawm hauv neeg nruab siab los. Tej yam txhiam xws neeg noj yuav ua tsis tau kom neeg tsis huv.
Tos Huab Tais Yes Xus hais cov lus no vim cov Fas Lis Xais thiab cov Kws Ntawv Ntshiab hais tias cov Yus Das txoj kab ke ntxuav tes ua ntej mam noj mov pab tau kom lawv tsis lo txhaum.
Huab Tais Yes Xus hais tias muaj 13 yam ua rau neeg tsis huv:
- Lub tswv yim phem txhawv hauv neeg nruab siab.
- Kev ua dev ua npua.
- Kev ua tub sab.
- Kev tua neeg.
- Kev deev luag txij nkawm.
- Kev cuaj khaum.
- Kev lim hiam.
- Kev ua cuav.
- Kev ntxias luag ua plees.
- Kev khib.
- Kev xyav luag moo.
- Kev muab hlob.
- Kev ywj fab ywj fwj.
Nyob hauv 13 yam ua rau neeg tsis huv no, kev ywj fab ywj fwj yog lub hauv paus chiv txhua yam tsis huv. Kev ywj fab ywj fwj no yog ‘kev ruam qauj’.
Peb ruam qauj mas peb thiaj tsis paub tias peb yog Tswv Ntuj me nyuam, peb lub laj lim yog Tswv Ntuj muab ua rab twj pab peb hla lub neej nyob hauv ntiaj teb. Tsim nyog peb yuav feeb meej thiab xyuam xim mas peb lub tswv yim thiaj ntse tuaj, peb thiaj mem tau tias peb yog Tswv Ntuj me nyuam, peb yuav ua xis peb Txiv siab. Yog li Huab Tais Yes Xus thiaj hais tias “Nej mloog kuv kom to taub mog” thiab hais rau cov thwj tim tias “Nej tsis muaj tswv yim li lod.”
Kwv tij Hmoob, peb tsis txhob ua tus neeg ruam ywj fab ywj fwj ntxiv. Peb yuav nrhiav kom to taub Tswv Ntuj lub siab nyiam nyob hauv Huab Tais Yes Xus lub neej thiab cov lus qhia. Peb yuav xyuam xim ua neej mus raws qhov tseeb. Peb yuav hwm ntuj thiab hwm neeg. Peb pom tias peb ua txhaum ua yuam kev, mas peb kav tsij tig los kho thiab ua kom yog.
Kwv tij, cov Fas Lis Xais thiab cov Kws Ntawv Ntshiab yuam kev, lawv ntshai tsam tej yam tsis huv sab nraud nkag rau hauv neeg lub cev ces ua rau neeg tsis huv; lawv tsis nco tias neeg tus yeeb yam los yog cov hauj lwm tawm hauv neeg los thiaj yog yam tsis huv tiag. Li ntawd, lawv thiaj ntsia tsis pom lawv kev txhaum.
