Hnub tim 12 lub 5 hlis 2025
Hwm Leej Ntshiab Nereus, Achilles, thiab Pankras tuag ua tim khawv.
Raws Tswv Ntuj cov lus hauv ntawv Hauv Paus, Tswv Ntuj tau tsim tas puas tsav yam zoo heev. Yog kev ntshiab huv, kaj nrig thiab tsis muaj txhaum. Tab sis khuv xim uas neeg xaiv tig nrob qaum rau Tswv Ntuj. Qhov tiag tiag tsim nyog neeg yuav lees cia Tswv Ntuj ua tus coj kev thiab ua qhov chaw vam hauv lub neej. Tab sis neeg rov tsa tus kheej thiab mloog Xas Tas cov lus ntxias. Neeg rov sib pub kev ua lub neej qis qis, zoo li tus kab mob sib kis uas tsis muaj tshuaj kho tau.
Txawm li cas kuj xij, hais txog Tswv Ntuj, mas txhua tus neeg tseem yog Tswv Ntuj me nyuam, yog tus duab, yog tsev neeg ntawm Tswv Ntuj tas mus li. Tswv Ntuj thiaj hu peb kom rov qab mus hauv peb lub tsev tseeb tiag, uas muaj Yes Xus ua lub qhov rooj. Pob Zeb thiab tus thawj tub rog Kos Nes Lias thiab nws tsev neeg twb xub nkag mus hauv lawm. Ces thov kom peb txiav txim siab meej tseeb thiab chaws hla lub qhov rooj no. Vim nyob hauv ntawv Moo Zoo hnub no, Yes Xus zeem tseeb li ntawd.
