ZAJ NYEEM HNUB TIM 13 LUB 3 HLIS 2025
HNUB TSIB, LIS PIAM 1 CAIJ PLAUB CAUG
(ET 14: 1-3, 12-14; MT 7:7-12)
Kwv tij Hmoob sawv daws, lub Moo Zoo hnub no Huab Tais Yes Xus qhia peb tias raws li ntiaj teb ib txwm ua kam, thaum peb thov ib yam dab tsi ntawm lwm tus mas tus neeg ntawd yeej yuav pub rau peb, thaum peb nrhiav ib yam dab tsi mas peb yeej yuav ntsib, thiab thaum peb khob ib lub qhov rooj twg yeej yuav muaj neeg qhib rau peb. Ntawm Tswv Ntuj kuj zoo li ntawd; yog peb thov Tswv Ntuj mas Tswv Ntuj yuav pub rau peb, yog peb nrshiav Tswv Ntuj mas peb kuj yuav ntsib Tswv Ntuj, yog peb khob Tswv Ntuj lub qhov rooj mas Tswv Ntuj yuav qhib txais peb ib yam thiab.
Peb ua neej nyob mas peb tseem paub ntxiv tias yog peb lam thov kom tag cai, lam nrhiav kom tag kev, lam khob kom zoo saib xwb; mas peb ceeb laj tau kev pab, tau ntsib, thiab tau kev txais. Ntawm Tswv Ntuj kuj ib yam, yog peb tsis muaj siab tiag mas tab txawm Tswv Ntuj hlub peb npaum cas los nws kuj yuav pub tsis tau rau peb. Tsis yog Tswv Ntuj tsis pub tab sis yog peb lub siab txais tsis tau.
Tswv Ntuj yeej ib txwm pub rau peb lawm, tsuav yog tias peb puas ua tiag thov, peb puas ua tiag nrhiav, peb puas ua tiag khob.
Huab Tais Yes Xus hais ntxiv tias “Nej xav kom luag ua zoo li cas rau nej mas nej yuav xub ua rau luag tso.” Lo lus no nyob hauv ntau ntau haiv neeg thiab ntau ntau txoj kev teev hawm yeej qhia li ntawd; yam li hais tias yog koj ua zoo rau tus twg mas tus ntawd yuav ua zoo rau koj, yog koj ua phem rau tus twg mas tus ntawd kuj yuav ua phem rau koj.
Tab sis nyob hauv txoj kev teev hawm Yes Xus los yog ntseeg Ntuj mas yuav txawv me ntsis, vim Huab Tais Yes Xus qhia ntxiv tias yog koj tus yeeb ncuab ib ncuav pias rau koj sab plhu xis mas koj tig sab nplhu laug rau nws ntaus thiab, koj yuav thov Ntuj rau tus foom phem rau koj.
Li ntawd mas Huab Tais Yes Xus thiaj tsis yog kom peb nco txog cov peb xav kom lawv ua zoo rau peb xwb, tiam sis peb tsum xub ua qhov zoo rau lwm tus ua ntej tso txawm tias lawv yuav nyiam yuav ntxub peb, lawv yuav yog peb tus phooj ywg los tus yeeb ncuab.
