ZAJ NYEEM HNUB TIM 13 LUB 8 HLI 2025
HNUB NCO TXOG LEEJ NTSHIAB VAJ QHIA POOS XIS AS NOS
COV LUS NYOB HAUV MAS TAIS NTAWV MOO ZOO (MT 18:15-20)
Cov kwv tij, hnub no lub Moo Zoo hais txog kev sib qhia sib ntuas, thiab sib koom teev Ntuj. Cov lus no yog cov lus zoo coj peb lub neej nyob koom zej koom zos. Huab Tais Yes Xus cov lus qhia yog kom peb nyob sib nyiam sib hlub, kom peb nyiam tas sawv daws tsis hais tus txheeb los tus nrug, tus tseem los tus qhua, tus phooj ywg los tus yeeb ncuab.
Huab Tais Yes Xus hais rau peb tias thaum peb pom tus neeg twg ua tsis yog mas peb yuav tsis txhob chim rau nws, tiam sis peb yuav tau ntuas nws kom tig los ua qhov yog. Peb yuav muab siab rau ntuas nws kom txog qhov kawg, yog nws tsis yuav peb lus li, mas peb mam tsum. Txawm tias txog qhov kawg nws yuav los tsis yuav peb hais, los peb tsum tau zam rau nws mas Ntuj thiaj yuav zam rau peb thiab zam rau nws. Qhov no yog lub hwj chim Huab Tais Yes Xus pub rau peb.
Huab Tais Yes Xus hais li no “Yoj koj ib tug kwv tij ua txhaum, koj yuav mus cuag nws. Koj ntuas nws ntsiag ntsiag tsis txhob cia tus sab nraud paub. Yog nws mloog koj hais mas koj pab tau nws. Tab sis yog thaum koj hais, nws tsis mloog mas koj coj lwm tus nrog koj mus ntuas nws dua. Yog nws tseem tsis mloog mas koj yuav hais rau koj pawg neeg paub, kom lawv pab nrog koj mus ntuas. Yog nws tsis mloog thiab ces kav liam, koj yuav saib nws zoo li ib tug neeg teev pej kum dab los yog ib tug sau se.”
Cov lus no yog kom peb mus ntuas tsis yog mus cem.
Lo lus ‘ntuas’ yog hais qhia kom tus neeg txhaum paub txog nws qhov txhaum, kom nws tig los yuav lub siab tshiab. Piv li koj muaj ib tug kwv tij nyiam haus dej haus cawv tsheej hnub tsheej hmo, koj hlub nws ces koj tsis xav kom nws quav cawv. Koj mus ntuas nws txog yam tsis zoo thaum ib tug neeg quav cawv, koj maj mam hais kom nws mem tau tias kev haus dej haus cawv tsis zoo li cas rau nws lub cev thiab lub neej. Yog nws mloog koj, mas nws yuav tso tseg txoj kev haus cawv.
Lo lus tias ‘ib tug neeg teev pej kum dab los sau se’, mas yog lo lus cov Yus Das muab piv rau cov neeg txhaum. Cov Yus Das tsis fim cov teev pej kum dab thiab cov neeg sau se.
Huab Tais Yes Xus lo lus no thiaj yog hais qhia peb tias thaum peb ib tug kwv tij tsis yuav peb thiab zeej tsoom hais lawm, peb tso tseg txhob fim nws, cia nws nyob nws li ntawd saib puas muaj ib hnub nws yuav thim xav tau. Qhov no tsis yog kom peb txhob liam fab rau; peb kuj tseem niaj hnub thov Ntuj rau nws, thov Tswv Ntuj tshoj nws lub siab kom tig los yuav siab tshiab tau.
Tsis yog peb yuav thov Ntuj ib leeg xwb, peb tseem yuav hais zeej tsoom kom pab nrog peb thov Ntuj rau nws, peb tso siab tias yog peb sib sau tuav txog Huab Tais Yes Xus lub npe thov mas Huab Tais Yes Xus yuav los nrog peb thov rau tus ntawd, ces Tswv Ntuj yim yuav mloog peb xwb xwb.
Kwv tij Hmoob, muaj ib tug Xib Hwb hais zoo li no tias nyob hauv ib nkawm niam txiv twg, yog nkawd muaj lus sib cav sib ceg yuav sib nrauj. Yus pom ces yus hlub nkawd, yus mus tsham nkawd thiab nrog nkawd tham ntsiag ntsiag saib nkawd puas yuav mloog yus hais. Yog nkawd tsis mloog, mas cia yus coj ib ob tug nrog yus mus hais ntxiv, nkawd tseem tsis mloog thiab. Koj kuj yuav hais cov neeg nkawd hwm pab nrog koj mus hais ua zaum kawg, yog nkawd tseem tsis yuav thiab, ces koj cia li ntawd txhob hais lawm. Tab sis koj yuav thov Ntuj rau nkawd lub neej kom nkawd thim xav, koj yuav nyob deb deb hlub nkawd. Yog tias txog qhov kawg, nkawd sib nrauj, los koj thiaj yuav tsis tu siab tias ua cas koj tsis cev tes pab nkawd. Thaum nkawd sib nrauj li ntawd, muaj ib hnub nkawd yuav paub tias koj mus hais nkawd mus cheem nkawd vim koj tsis xav kom nkawd lub neej puas.
Nyob zoo sawv daws.
